“Dipuk Raan ko Rem̧m̧an,” N̄an Kōkajoorļo̧k Jodikdik ro, Jān. 2023.
Mour Jipan̄
Dipuk Raan ko Rem̧m̧an
Kōjatdikdik, jipan̄, im kōmour rej pād ijeņ n̄an ro raar jo̧o̧r jān kakkure.
Juon iien iaar kelo̧k ioon eria eo eobrak kōn baat jān juon kijeek epaak. Ke baluun eo ej kelo̧k, kōm eaar eļļā jān baat ko imejatoto n̄an juon mejatoto eo ealikkar im emeramram. Iaar kile bwe meram in aļ im mejatoto eo erreeo eaar pād ijo aolep iien, ak kajoor eo aō n̄an m̧ōņōņō kaki ekar penjak kōn men ko rej kinōōr eō. Kijeek eo ekar jab aō bōd, ak ekar jelet wōt mour eo aō.
Kakkure ej āinwōt menin. Ro rej jo̧o̧r jān kakkure jeban ņa ruweer, ak rej naaj wōt m̧adm̧ōde leen jerbal ko aer. Kakkure emaron̄ pinej kōļmenļo̧kjeņ eo ad im kōm̧m̧an bwe en pen ad en̄jake iakwe eo an Anij. Emaron̄ bōk iien n̄an ro raar jorrāān n̄an mijaļ m̧ōņ ko an Setan n̄an bar ekkeijeļ ippān m̧ool ko indeeo. Ak kōjatdikdik, jipan̄, im kōmour rej bun̄tōn ko aolep repād ilo iaļ in!
Juon Bwebwenato
Stacie1 jemān ekar rikakkure. Ekar ba n̄an e ke eban em̧m̧an an kōm̧m̧an ilo aolep men n̄e erūttoļo̧k. Ekar kōm̧m̧an bwe en en̄jake jaorōk eo an.
Ke Stacie ekar etal n̄an college, ekar lukkuun alikkar an ļōmņake. Eaar jino bar etal n̄an jar im kar en̄jake iakwe eo an Anij n̄an e im baam̧le eo an. Ālkin jet iien, ej lo an aenōm̧m̧an ilo gospel in im jemdoon eo an ippān Rilo̧mo̧o̧r eo.
Ilo juon jon̄ak juon bilien in ajri ro ipeļaakin laļ in naaj en̄jake jet kakkure ko iiō in.2 Bōlen kwe ak ro jet kwojeļā kajjier rej jelm̧ae en̄jake rot in an Stacie. Ļōmņak kein ilaļ remaron̄ jipan̄.
N̄e Kwoj Ioon Kakkure
N̄e kar kōmetak eok, jouj im ba n̄an ro jet kōn ta eo eaar waļo̧k n̄an eok. Jeļā bwe Anij ej iakwe eok! Im bwe ro uwaan baam̧le eo rōwānōk, ro m̧ōttam̧, im membōr ro an Kabun̄ in ilo mour eo am̧ rej bar ioone. Rej jutak ippam̧ im jipan̄ eok eļļā jān menin.
Im jouj keememej, “Kakkure eban, im ban, im ban am̧ bōd. … Ejjab kwe eo kwoj aikuj ukweļo̧k; ejjab am̧ eddo.”3
Dr. Sheldon Martin, juon therapist ilo Church Family Services, ej ba emaron̄ in lukkuun jipan̄ ro raar jorrāān n̄an mije wōt m̧ool ko aer indeeo m̧okta, kiiō, im jekļaj.
-
M̧okta: “Elōn̄ armej ro rej kea kake eok,” Dr. Martin eaar ba, kalikkar bwe kwe m̧okta im ajri eo eaorōktata nejin jined im jemed ilan̄. Baam̧le eo am̧ indeeo ej ererakļo̧k im ļapļo̧k jān jem̧jerā ko waļo̧k ioon laļ in. Ilo juon kakkobaba kōn kajoor im aenōm̧m̧an jān Jemedwōj Ilan̄, Jisōs Kraist, im Jetōb Kwojarjar, ewōr jibwid im jim̧m̧ad ro ilo ron̄ōl eo juon ro rej kea kake eok im maron̄ jerbal in karejar n̄an eok.
-
Kiiō: “EM̧M̧AN n̄an iakwe eok makke kiiō,” Dr. Martin eaar ba, jekdo̧o̧n kwoj pād ia ilo iaļ in kōmour in. Em̧m̧an n̄an en̄jake illu, būrom̧ōj, ak pok. Kijenmej ippam̧ make.
-
Jekļaj: “Men ko renaaj em̧m̧anļo̧k,” Dr. Martin eaar ba. “Ijeļā menin kōnke ijeļā wōn Rilo̧mo̧o̧r eo. E ej kea kōn eok.” Kōm̧m̧ane ta eo komaron̄e n̄an epaake wōt E. Ilo am̧ kōm̧m̧ane menin, kwonaaj maron̄ in kōttoļo̧k eok jān jemdo̧o̧n ko repoktak im bwe kwon en̄jake aenōm̧m̧an im iakwe eo An.
N̄e Kwoj Ļōmņak eo Mōttam̧ Ej En̄jake Kakkure
-
Kajju kajjitōk ippāer, “Ewōr ke juon ej kakkure eok?”
-
Lukkuun ron̄jake ta eo rej ba. Kwaļo̧k jouj im kōmaanwa.
-
Ba n̄an eo emaron̄ jipan̄, āinwōt juon rūkaki, jinen ak jemān, rikakpilōklōk an jikuuļ, ak ritōl an Kabun̄.
-
M̧ōttā wōt ippāer. Kōm̧m̧an em̧m̧an n̄an er. Jipan̄ er pukot jem̧jerā ko rem̧m̧an.
Bun̄ M̧aanļo̧k Wōt
Rainin, Stacie ej juon eo etijemļo̧k kōn iakwe ilowaan baam̧le eo an make. Jet raan epen, ak ej en̄jake eļap m̧ōņōņō im jeo̧rļo̧k bōd n̄an ro jet.
Stacie eaar ba, “Ijeļā bwe Jisōs Kraist emaron̄ kōmour aolep kinej ko ad.” Ewōr juon men ekar kwaļo̧ke ippān ro jet raar jorrāān, ej pād wōt ilo kōjatdikdik.
Eaar ba, “Aolep iien ewōr kōjatdikdik ilo Kraist,” “men̄e apan̄ ko remaron̄ in ejjeļo̧k jem̧ļo̧kier”.
Jekdo̧o̧n ta apan̄ kwoj jeļm̧ae, wōnm̧aanļo̧k wōt. Kobrak mour eo am̧ kōn em̧m̧an im tōmak ilo jabdewōt men ko komaron̄e. Raan ko rem̧m̧an repād im̧aam̧!