“Tōmak ilo Maroklep,” N̄an Kōkajoorļo̧k Jodikdik ro, Tij. 2022.
Tōmak ilo Maroklep
Errein jejjo iaan elmakwot ko me raar jipan̄ eō kōn kajjitōk ko im pere ko.
Pija ko jān Getty Image ko
Ke iaar juon ļaddik edik, baam̧le eo aō ekkā aer loļo̧k Great Basin Nationl Park ilo Nevada, USA. Juon iaan men ko rekabwilōn̄lōn̄ ilo park in ej ro̧n̄ in Lehman.
Ritōl eo ej tōlļo̧k eok n̄an juon ro̧n̄ em̧wilaļ im, ilo jidik iien, ekune aolep meram. Kwoj ioon lukkuun maroklep. Ej juon en̄jake eo enana, im ļōmņak in kappok iaļam̧ nabōjļo̧k jān ro̧n̄ eo ilo an ejjeļo̧k jabdewōt meram elukkuun kam̧ōkm̧ōk. Kam̧m̧oolol, aolep iien ritōl eo ej kejo̧ meram eo im tōļļo̧k eok nabōjļo̧k.
Jet iien jej jelm̧ae kajjitōk ko im pere ko kōn Kabun̄ in im naan in kam̧ool ko ad. Emaron̄ eddo im jab alikkar, āinwōt pād ilo ro̧n̄ in marok.
Enaaj EM̧M̧AN n̄e ewōr kajjitōk ko im n̄ūrbōktak ko. Men eo enaaj kōm̧m̧an eļap oktak ej elmen am̧ tōpari.
Erkein rej jejjo elmakot ko me raar jipan̄ eō.
Kōjerbal Tōmak
Iaar lo bwe n̄e ij jelm̧ae kajjitōk ko im n̄ūrbōktak ko jān juon būruōn tōmak, imaron̄ iien otemjej lo juon wāween n̄an anjo̧. “Tōmak ej jab n̄an bōk juon jeļāļo̧kjeņ eweeppān kōn jabdewōt men” (Alma 32:21). Ak “eļan̄n̄e kom̧ maron̄ jab kōņaan wōt tōmak, kōtļo̧k bwe kōņaan in ej jerbal ilo kom̧,” (Alma 32:27).
Laļ in enaaj jiron̄ eok bwe eļan̄n̄e kwojjab maron̄ kam̧oole juon men kōn juon jon̄ak, ejjab m̧ool. Ejjab wāween eo an Irooj in. Āinwōt an kar Rilo̧mo̧o̧r jiron̄ Tomas, eo ekar jab tōmak m̧ae iien e make ejibwe kinej ko kinjen Rilo̧mo̧o̧r,“E m̧ōņōņō ro raar jab lo, im rej tōmak” (Jon 20:27).
Kajjitōk, Kappukōt, Kaļļaļļaļ
Naan kein “kajjitōk, kappukōt, kaļļaļļaļ” ekkā aer ālijin men ilo jeje ko rekwojarjar (lale Matu 7:7; Katak im Bujen Ko 88:63). Jekjek in an Irooj jipan̄ kōj ej ilo kajjitōk ko ad n̄an ad kajjitōk Ippān kajjitōk ko.
“A eļan̄n̄e jabdewōt iami ej aikuj mālōtlōt, en kajjitōk kōn e ippān Anij” (Jemes 1:5). Kajju n̄an aolep m̧ool ko. Anij ej iakwe eok im enaaj jipan̄ eok.
Kwon juon Rikapukot eo Em̧ool.
Iaar lo bwe ro rej m̧ool in kappukot im ettā ekkā aer lo uwaak ko n̄an lukkuun kajjitōk ko aer. Ilo turājet eo juon, ro rej baj kappukot bōd naaj makunļo̧k im lukkuun makunļo̧k jān m̧ool in.
Kwon juon Rikapukkot eo Em̧ool. M̧ool epād, im komaron̄ loe.
Kōm̧m̧ane juon bo̧o̧k in “Uwaak wōt n̄an tokālik.”
Kōn menin ta eo kwoj kōm̧m̧ane n̄e ewōr ippam̧ ettā im lukkuun kappukot uwaak ko im rejjab kajju waļo̧k?
Bar juon alen, iaar kāālet n̄an tōpari kōn tōmak. Iaar kōm̧m̧ane juon bo̧o̧k jidikdik ioon jeļep eo ilo kōļmenļo̧kjeņ eo aō—āinwōt juon men eaorōk. Je ioon kōn naan ko “N̄an Uwaak juon raan Tokālik.”
N̄e ewōr aō kajjitōk ak n̄ūrbōktak iban uwaake, ij je ioon jidik peba, nukwiji, im likūti ilo bo̧o̧k eo. Iaar bar kōro̧o̧l e n̄an jeļōp eo.
N̄an kōm̧m̧ane menin, ij jerbal kōn tōmak ke juon raan Irooj enaaj uwaake. Bōlen E enaaj, bōlen E eban. An wōt pepe ilo jeļāļo̧kjeņ eo An ekwojarjar.
Ilo wāween in, jet iaan kajjitōk ko aō em̧ōj aer uwaak. Ak ej lōn̄ wōt ilo bo̧o̧k eo. Im EM̧M̧AN ippa.
Ro jera rejitenbōro ilo Kraist, kwon rikappukot eo em̧ool.
Ilo am̧ kōļapļo̧k tōmak eo am̧, ankilaan Irooj enaaj pād ippam̧. Im ilo am̧ tōpar E ilo tōmak, E enaaj kwaļo̧k n̄an eok men ko kwoj aikuj in jeļā ilo iien eo ejim̧we.