“Menin Letok ko an Gospel ilo Guam,” N̄an Kōkajoorļo̧k Jodikdik ro, Jān. 2023.
Menin Letok ko an Gospel ilo Guam
Ioon āne ko ilo lometao, Franchesca ej lo jem̧jerā im aenōm̧m̧an ilo gospel in.
Pija ko jān Cody Bell
Ilo pārijet ko, dān ko rōļae, im ron̄ in etto ko, āneen Guam ej āinwōt jikin kakkije, ak ej āinwōt jabdewōt raan ko wōt ilo mour an Franchesca N. eo me 15 an iiō! Em̧m̧an ippān pārijet ko raiboojoj. “Elimo n̄an diwōj im kōmejatoto.”
Ļotak im rūttoļo̧k ilo Guam, em̧m̧an ippān kōm̧m̧ani men ko inabōj. Eaar ba, “n̄a armej in nabōj, im ejjab lukkuun em̧m̧an ippa pād lowan em̧,” eaar ba. Em̧m̧an ippān aōņōņ lojet, turon̄, im tallōn̄ to̧l ippān ro jinen im jemān im leddik ro ruo jein ak jatin. Em̧m̧an ippāer tallōn̄ to̧ļ ilo ron̄ in etto ko.
“Ilukkuun epaake leddik ro jeiū ak jatū. Eaar ba, rej ro m̧ōtta repaaktata.” Leddik eo jein erūtto ej jikuuļ ilo Hawaii. Franchesca ej kōmeļeļeiki, “social media ej men eo eļaptata an jipan̄ kōj kōnono im tōpar doon.” Em̧m̧an ippān pād epaake im ekkeijeļ wōt ippān doon.
Juon Waanjon̄ak n̄an Ro Jet
Franchesca ej kūlaaj 10 ilo juon jikuuļ an leddik wōt im an Catholic Jikuuļ, ijo e wōt membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Āinwōt membōr eo an Kabun̄ emmake iaan ilo jikuuļ eo an ekar bwe an pen ilo jinoin, ak ekkā an jenoļo̧k. Barāinwōt, ro ipeļaakin rej ļōmņak ej juon men em̧m̧an ilo an m̧ōttan bar juon kabun̄.
N̄an waanjon̄ak, ro m̧ōttan rekar idaak kōpe ilo iien juon kōrālep, im Franchesca ekar maron̄ kōmeļeļeik Naan in Māletlet n̄an er.
Franchesca ekar bar kāālet n̄an jab kanijnij men̄e armej ro jet ilo jikuuļ rej kōm̧m̧ane. Eaar ba, “elōn̄ iien ij atin po, ak men eo me ekar kōkajoorļo̧k eō ej jem̧jerā eo aō make ippān Jemedwōj Ilan̄ ilo jar.” Eaar bar ba, “Ijjab aikuj kōm̧m̧ane men kein, kōnke rebōd im kōnke ij iakwe Jemedwōj Ilan̄ im Jisōs Kraist.”
Lo ro Mōttad
Jet iien emaron̄ pen ilo an make membōr in Kabun̄ in ilo jikuuļ eo an. Ke ekar freshman, Franchesca ekar en̄jake an ajimakeke ilo an nan̄inmej in kar ajedeed im ekar jab lōn̄ m̧ōttan. Ekar mijak in kōnono n̄an ro jinen im jemān kake, ak ke eaar jar, eaar en̄jake im̧we n̄an kwaļo̧k n̄an er ta eo eaar en̄jake.
Āinwōt juon baam̧le, raar pepe n̄an jar kōn e bwe en maron̄ lo ro m̧ōttan me emaron̄ iiaio̧ ippāer. Ilo an kabwilōn̄lōn̄, iien eo wōt ej m̧ōj aer jar, raar ron̄ juon kaļļaļļaļ ilo kōjem eo aer. Ekar juon iaan ro m̧ōttaer jān ward eo juon, im ekar ebbōktok kukiij! Franchesca ekar jeļā bwe Jemedwōj Ilan̄ ekar ron̄jake jar eo aer.
Stake eo an Franchesca ekkar koba in membōr ro jān Guam im āne ko jet. Ward eo an ewōr kurup in jodikdik ro edik uwaaer, ak ward eo an ej āinwōt juon an baam̧le. Membōr ro repaake doon, im menin ekōm̧m̧an bwe en etal n̄an jar kajjojo Jabōt. Rej ro eļap aer jipan̄ im waanjon̄ak ilo mour eo an.
Franchesca ekar bar lo kajoor ilo kūlaaj in jemenere eo an. Eaar ba, “Jemenere ej juon iien eo em̧m̧antata ippa ilo week eo.” “N̄e ij pād ilo jemenere, ej āinwōt n̄e aolep inepata ko aō im jako.”
Em̧m̧an ippān pād ilo jemenere, men̄e ilo online ak ilo likio in armej, im ejjan̄in jako jān kūlaaj men̄e ej aikuj. Ej ba bwe wiik eo an ej em̧m̧anļo̧k kōnke ej kāālet bwe en pād ilo jemenere. N̄e wiik eo an ekam̧ōkm̧ōk, ej lukkuun lale bwe en etal n̄an jemenere kōnke en en̄jake aenōm̧m̧an ijeņ.
Jodikdik ro ewōr aer m̧akūtkūt ko remaron̄ ruo n̄an jilu kōttan ilo juon allōn̄. Franchesca eaar peek juon iaer—ikkure in jota kōn ikkure ko im ikkure jān jeje ko rekwojarjar. Raar jab kanooj ioon doon kōn wōt nan̄inmej in, ak n̄e rej ioon doon, em̧m̧an aer ippān doon.
Jiron̄ ro rej make kōm̧m̧an aer pija in al n̄an al an jodikdik an Kabun̄ in “Good Day” im likūti n̄an kwaļo̧k iakwe im n̄an lōn̄aj ro jet. “Social media emaron̄ lukkuun kakuktok aolep ippān doon, eļaptata ilo iien ko n̄e jejjab lo doon.”
Reim̧aanļo̧k n̄an juon Tampeļ
Ilo Oktoba 2018 kweilo̧k eo eļap, Yigo Guam Temple kar kōjeļļā kake. Franchesca eaar ba, “Jodikdik ro raar m̧ōņōņō—kōm ar aolep jar kake.” Ālkin, ekar kijerjer in lale aer jerbale im kar kōttar n̄an tampeļ eo aer make, eo ekar dedeļo̧k ilo Māe 2022.
M̧okta ļo̧k ekkā aer aolep etal n̄an Philippines ilo tampeļ tūreep ko. N̄an kōļļāiki wōnāān tūreep ko, rej aikuj kōm̧m̧an jāān ilo aer wia kake m̧ōn̄ā im karreeo wa. Kōnke enaaj juon tūreep eļap, raar peeke juon wiik aetokkan. Franchesca ekar m̧ōņōņō bwe emaron̄ etal n̄an tampeļ emakijkij im būki kōjeraam̧m̧an ko ilo an peptaij kōn ro jibwin im jim̧m̧aan.
Aenōm̧m̧an ilo Jar
Franchesca eaar ba bwe eaar kanooj inepata, ak jar eaar jipan̄ e. “Jar elukkuun kajoor. Ilo wōt aō kōnono wōt n̄an Jemedwōj Ilan̄ elukkuun kaenōm̧m̧an eō. E ej ron̄jake im emaron̄ jipan̄.”
“N̄e ij jar, uwaak eo ejjab aolep iien ej itok,” ej ba. “Ej juon en̄jake in tōl me ejipan̄ eō, en̄jake An pād im An iakwe. Ej kaenōm̧m̧an eō im kōm̧m̧an bwe en em̧m̧anļo̧k aō en̄jake.”
Kapilōk eo an n̄an jodikdik ro jet ej:“Jar n̄an Jemedwōj Ilan̄. Kōnono n̄an E. Eļap an jipan̄.”
Ej ba bwe jinen ekkā an inepata ak eļap an bar jipan̄. “Jinō ej juon kōjeraam̧m̧an eļap jān Jemedwōj Ilan̄, im ekar tōl eō.”
Ej ba, “Baam̧le ej juon kōjeraam̧m̧an eļap.” “Ij ļōmņak kōnono n̄an baam̧le eo am̧ ak eo m̧ōttam̧ n̄e kwoj ioon juon men eo eaorōk.”
Franchesca ekōņaan bwe aolep ren lo kōjeraam̧m̧an ko an Irooj kajjojo raan. “Kajjojo kōjeraam̧m̧an emaron̄ pidodo. Etal n̄an jikuuļ ej juon kōjeraam̧m̧an eļap. Ekanooj lōn̄ menin kabwilōn̄lōn̄ ko rem̧m̧an eļan̄n̄e jenaaj joļo̧k jidik iien n̄an kili. Ij m̧ōņōņō bwe ewōr gospel in ilo mour e aō.”