“Kabwilōn̄lōn̄ eo Eļap,” N̄an Kōkajoorļo̧k Jodikdik ro, Jān. 2023.
Itok, Ļoor Eō
Kabwilōn̄lōn̄ eo Eļap
Ewōr juon kabwilōn̄lōn̄ me eļapļo̧k an aorōk jān ko aolep.
Ilo, aolep men rej pidodo (lale Luk 1:37; Philipai 4:13). Ak komaron̄ ke jar kōn lukkuun jabdewōt men im ekar ke m̧ool an itok? Etke jet armej rej ioon kabwilōn̄lōn̄ ko ilo an jet jab ioone? Im ta lukkuun meļeļein menin n̄an eok?
Kabwilōn̄lōn̄ ko jilu etto, im kabwilōn̄lōn̄ ko jilu raan kein, im juon kabwilōn̄lōn̄ eļap ej katakin kōj eļapļo̧k.
1
Kabwilōn̄lōn̄ eo Etto
Kōmeļeļe jān Camila Gray
Meri ekar bwilōn̄ jidik ke enjeļ Gabriel ekar jiron̄ e ke enaaj jinen Rilo̧mo̧o̧r eo. Eban kar kūrm̧ool. Ak enjeļ Gabriel ekar kōmeļeļeiki bwe Jisōs enaaj nejin Anij im kar ba, “Bwe ilo Anij, ejjeļo̧k men ej ben n̄ane” (Luk 1:37). Im enjeļ eo ekar m̧ool. Meri ekar keotak Rilo̧mo̧o̧r eo an laļ.
Kabwilōn̄lōn̄ eo an Rainin
Ruo leddik rej mijenede rej jerbal ilo Mexico rej itotak ikōtaan juon iaļ eobrak kōn armej ro aolep raan. Jet iien remaron̄ kōttar 10 minit m̧okta jān aer kijoon iaļ eo, im rej aikuj ettōr! Innām raar ioon juon eo elukkuun rūtto, lukkuun m̧ōjņo̧ ej membōr eo ejaniknik. Ekar kōņaan etal ippāer n̄an jar, ak—en̄in eitok m̧ōttan apan̄ in—ej aikuj in kijoon iaļ eo e traffic. Im jaab, mijenede ro reban kar jipan̄ e kijoone (ak raar ļōmņak kake!). Ak ekar wōr juon kabwilōn̄lōn̄. “Ke kom̧ro ej tōparļo̧k iaļ eo,” juon iaan mijenede ro ekar ba, “ekar ejjeļo̧k wa ej itok. Kōm eaar maron̄ etetal ilo kadikdik im ejjeļo̧k jorrāān ilo aer kijoone iaļ eo.”
Eban? Bar Ļōmņak!
Kōn Anij, aolep men repidodo (bar men ko reppen!).
2
Kabwilōn̄lōn̄ eo Etto
Ekar wōr juon em̧m̧aan eo ekar “ake,” ak mej rājettin. E ekar tōmak bwe Rilo̧mo̧o̧r eo emaron̄ in kōmour e. Ak Jisōs ekar jepooļ kōn elōn̄ armej ro, im ekar pen n̄an tōpareļo̧k E. Kōn menin ta eo rekar kōm̧m̧ane n̄an em̧m̧aan in? Ro m̧ōttan raar lelaļļo̧k e ilo peet eo an jān bōro̧o̧j in m̧weeo n̄an tōpar Rilo̧mo̧o̧r eo. Jaab, bōlen ekar jab lukkuun pidodo. Ak e im ro m̧ōttan ekar wōr aer tōmak. Im ekar tōprak—Jisōs ekar jeo̧rļo̧k an em̧m̧aan eo jerawiwi im kar kōmour e (lale Luk 5:17–26).
Kabwilōn̄lōn̄ eo an Rainin
Ella W. ekar ikkure ippān ro m̧ōttan ilo paak eo ke jet iaan ro m̧ōttan raar kōjakoik menin mour chameleon eo nejier. Emaron̄ jab lukkuun in aorōk. Ak keememej, chameleon ko rej ukot m̧ōōrā er n̄an ļoor ipeļaakier. Ālkin aer kappukot ilo jidik iien, Ella ekar pepe bwe ren jar ilo tōmak. Eaar m̧ōkaj aer loe chameleon eo ilo juon wōjke! “Ke ej pād ilo pein juon armej, kōm kar kam̧m̧oolol ilo jar n̄an Jemedwōj Ilan̄,” Ella eaar ba.
Kabwilōn̄lōn̄ ko rej Itok ilo Tōmak ilo Jisōs Kraist
Men eo epen ej aolep iien pidodo n̄an Anij. Ak jej aikuj tōmak ilo Rilo̧mo̧o̧r eo (ak ikdeleel n̄an tōmak) im n̄an jerbale bwe tōmak in n̄an kabwilōn̄lōn̄ ko ren waļo̧k.
3
Kabwilōn̄lōn̄ eo Etto
Elizabet im Zacraias rekar m̧are ium̧wūn elōn̄ iiō ko ak ekar jab wōr nejier ajri. Jet iien, remaron̄ kar en̄jake ke jar ko aer ilo tōmak rejjab uwaak. Im ilo m̧ool, rekar lukkuun rūtto n̄an neje. Ak juon enjeļ eaar waļo̧k n̄an Zacraias im kar jiron̄ e ke Elizabet enaaj wōr nejin. (Limo: em̧ool nin̄nin̄ eo ekar Jon Ripeptaij!) Ilo jem̧ļo̧kin, men eo epen ekar pidodo. Ak Elizabet im Zacraias rekar lukkuun kōttar, ilo juon iien eo eaetok (lale Luk 1).
Kabwilōn̄lōn̄ eo Rainin
Lindsey M. ekar en̄taan jān nan̄inmej in kōmālij (epilepsy). “Aolep jibbon̄, ij akweļap n̄an Jema Ilan̄ n̄an bōk nan̄inmej eo,” Lindsey eaar ba. Ak rekar jab jako. Ke Lindsey ekar kōttar bwe en mour, ekar bōk kōjeraam̧m̧an ko an priesthood, eo kar bōktok n̄an e aenōm̧m̧an. Im bwe aenōm̧m̧an in ekar juon kabwilōn̄lōn̄ emakeļo̧k. “N̄e jej oktakļo̧k n̄an Jemedwōj Ilan̄, E enaaj pād n̄an jipan̄ kōj ejjeļo̧k kajjitōk, kwaļo̧k kabwilōn̄lōn̄ ko im letok aenōm̧m̧an,” eaar ba. Āliktata Lindsey eaar m̧wijm̧wij bwe en kar jipan̄ n̄an joļo̧k nan̄inmej in dibubbub eo an.
Kabwilōn̄lōn̄ ko raar Itok Ekkar n̄an Ankilaan Anij
Anij emaron̄ kōm̧m̧an aolep men otemjeļo̧k. Emaron̄ wōr am̧ tōmak eļap. Ak kabwilōn̄lōn̄ ko rej itok ekkar n̄an iien eo an Jemedwōj Ilan̄ im ankilaan im ilo wāween eo An. Lali kabwilōn̄lōn̄ ko jet ilo wāween in, āinwōt aenōm̧m̧an im kajoor n̄an niknik.
Kabwilōn̄lōn̄ eo Eļap
Kōm kar kōnono eļap kōn kabwilōn̄lōn̄ ko. Ak ewōr juon kabwilōn̄lōn̄ eo me eļapļo̧k an aorōk iaer aolep. Kabwilōn̄lōn̄ in ekar ke Nejin Anij ekar itok n̄an laļ in āinwōt juon nin̄nin̄, tokālik kar katakin im kōmour, innām kar leļo̧k mour eo An make. Jisōs Kraist ekar bōk ioon Make jerawiwi ko ad, būrom̧ōj ko, im likjab ko. Kabwilōn̄lōn̄ eo An ekoba raan ko jilu ilo lōb innām jerkakpeje eo me ekar bōktok mour ālkin mej n̄an kōj aolep. En̄in kabwilōn̄lōn̄ eo kar ukōt aolep men otemjeļo̧k.
Epidodo n̄an kajjieon̄ bōk tōmak ilo juon kabwilōn̄ļōn̄. Im bwe emaron̄ in pen n̄e jejjab jeļā ankilaan Jemedwōj Ilan̄. Kōn menin ijjelo̧kin mije tōmak eo am ilo kabwilōn̄lōn̄ eo kwoj kōņaan, mije kabwilōn̄lōn̄ in Pinmuur eo an Rilo̧mo̧o̧r eo. Tōmak bwe ejjeļo̧k men epen n̄an Anij, ekoba ta eo kwoj jar kake. Barāinwōt tōmak bwe Ankilaan ej n̄an em̧m̧an eo am̧ make. N̄e jar ko am̧ rejjab uwaak ilo wāween ko kwoj kōtmene, E enaaj kōkajoorļo̧k eok im jipan̄ eok niknik.
Kōjatdikdik eo Eļap
Ilo am̧ mije tōmak eo am̧ ilo Jisōs Kraist, kwonaaj jeļā ta meļeļein menin aolep men rej pidodo ippān Anij. Kwonaaj tōmak bwe Jemedwōj Ilan̄ emaron̄ uwaake jar ko am̧, im kwonaaj lōke Ankilaan im bōk aenōm̧m̧an eo An n̄e men ko rejjab tōprak āinwōt kar pepe. Kōn menin likūt tōmak eo am̧ ilo Jisōs Kraist. Ej ej menin kabwilōn̄lōn̄ eo. Im aolep men rej pidodo n̄an E.