Uiga o se Faatupu Filemu

Saunia e David A. Edwards

Mekasini a le Ekalesia

O nisi nei o faagasologa i totonu o se tagata o loo taumafai e faatupuina le filemu.

O le toatele o tagata e mananao i le filemu—mo i latou lava, o latou aiga, o latou nuu, ma le lalolagi.

Na aoao mai i tatou e le Faaola e amata ia i tatou. Na Ia uunaia i tatou ia avea ma e faatupuina le filemu (tagai Mataio 5:9). Ma ua uunaia i tatou e Peresitene Russell M. Nelson ia “faamutaina feteenaiga o loo sasao i totonu o lou loto, lou aiga, ma lou olaga” (“O Le Mana o le Malosiaga Faaleagaga,” konafesi aoao Ape. 2022 [Liahona, Me 2022, 97]).

O le a la le mea e tupu pe a e le ioe i se tasi e uiga i se mea e taua ia te oe? E faapefea ona e tausia le filemu a o puipuia se manatu mausali po o le tu atu mo se mataupu faavae o le talalelei e pei o le tumau i le mama a’ia’i faalefeusuaiga po o le le kopi i le aoga?

Faagasologa i Totonu

Afai o loo e taumafai moni lava e avea ma se faatupu filemu, o le a e faamalosia ni faagasologa patino lea e tupu i totonu o oe faalelagona, faalemafaufau, ma faaleagaga pe a tulai mai ni feeseeseaiga. O i latou o se vaega o uiga o se faatupu filemu. O nisi nei o na mea.

Faalogo

O le faalogo o lona uiga o le gauai atu i mea e fai mai ai tagata ae le na o le mafaufau i le isi mea o le a e fai atu ai. E ono faaititia le ita o se tasi e iloa o loo faalogoina i latou.

Iloaina o Oe Lava

O le nofouta ia te oe lava o le mafaufau lea i mea o loo e fai atu ai ma le ala o loo e faatinoina ai—ma ia iloa pe faapefea ona oo atu i isi. O lona uiga foi o le iloaina o le mafuaaga ua e fai atu ai ma faia na mea—o ou uunaiga.

Loto Malamalama

O le loto malamalama o lona uiga o le lagonaina o lagona o isi. E te faia se taumafaiga e vaai faalemafaufau ai i o latou lagona pe a latou faalogo i mea e te tautala ai ma vaai pe faapefea ona e faatinoina.

Malamalama

O le malamalama o se nofoaga o faamatalaga ma mea moni e utuvai mai ai. Ae o le mea e sili ona taua, e aofia ai le aoaoina faaleagaga ma aafiaga e mafai ona e faaaogaina ma faasoa atu.

Faatauanau

O le faatauanau o le mamanu o le fesoasoani i tagata ia suia o latou manatu ma lagona e uiga i se mea. Na saunoa mai Elder Neil L. Andersen o le Korama a Aposetolo e Toasefululua, “O e faatupuina le filemu … e faatauanau i le ala a le Faaola” (Ape. 2022 konafesi aoao [Liahona, Me 2022, 18]). O le ala a le Faaola e le faatatau i le na o le sa’o. E faatatau i le alofa i le upumoni ma tagata e te manao e faasoa atu i ai. O le ala a le Faaola e le o le faapea atu e sao oe ae o isi e sese. E faatatau i le faasoa atu o le mea sao i se auala o le a oo moni atu ai i tagata. O lona uiga o le alofa i le upumoni ma tagata e te manao e faasoa atu i ai.

Onosai

I le faatupuina o le filemu, o le onosai o lona uiga o le loto pulea. E masani ona faauigaina o le faamanatu ia te oe lava e le manaomia ona e faalavelave. E le manaomia ona e ita pe le fiafia. E le tatau ona sii lou leo pe leotele. O le a le afaina le tuu atu i tagata e fai mai la latou tala, e tusa lava pe e te le matuai ioeina. O le onosai e le o se vaivaiga. O se vaega o le ala a le Faaola.

Poto

Mo e faatupuina le filemu, o le poto o lona uiga o le mafai lea ona faamasino mea e sili ona lelei e fai i soo se tulaga. Pe tatau ona e faasalaveia pe solomuli? Pe tatau ea ona e ofoina atu le lagolago faalemafaufau, faalelagona, aga malie, molimau? E mafai ona e vaai i taunuuga e ono i ai o filifiliga eseese. O le poto o se meaalofa mai le Atua lea e mafai ona oo mai e ala i aafiaga, suesue, ma mulimuli i Ana fautuaga.

Lotomaualalo

O le lotomaualalo o lona uiga o le faailoa atu lea e te le iloa mea uma ma e te le iloa tali uma. O lona uiga foi o le faailoa atu e silafia e le Atua mea uma ma e mafai ona tuuina atu ia te oe tali. O le lotomaualalo e fesoasoani ia i tatou e faamautinoa ai “ia leai se faamaualuga po o se faasausili e tatau ona latou tuu e faalavelavea [lo tatou] filemu; ma ia tatau i tagata taitoatasi ona manatu taua i le la te tuaoi e pei o ia lava” (Mosaea 27:4).

Faatuatua

O le i ai o le faatuatua ia Iesu Keriso o lona uiga o le faalagolago ia te Ia ma taumafai e tausi Ana poloaiga, e aofia ai le ala e te taulimaina ai tagata. E mafai ona faamautinoa atu ia te oe afai e te sailia le filemu i Lana ala, “o le a galulue faatasi mea uma mo lo outou lelei” (Mataupu Faavae ma Feagaiga 105:40).

Alofa

O le i ai o se alofa o le Atua i o tatou loto e taitai atu ai i le filemu (tagai 4 Nifae 1:15). E fesoasoani tatou te alolofa ai i o tatou uso a tagata ma faamanatu mai ai ia i tatou o i latou o fanau a le Atua.

Taumafai Pea

O le a le faigofie i taimi uma le avea ma se faatupu filemu, ma e mafai ona e faia ni mea sese. Tatou te faia uma lava. Ae ua ta’u mai e le Faaola ia i tatou afai o i tatou o e faatupuina le filemu, o le a faamanuiaina i tatou ma “o le a ta’ua i tatou o atalii o le Atua” (Mataio 5:9).

E aoga le taumafai pea ia maua le filemu. E mafai e le Alii ona faamanuiaina i tatou i se uiga faatupu filemu ina ia mafai ona avea ma natura lona lua ia i tatou. Ona mafai moni lea ona ta’ua i tatou o fanau a le Aloalii o le Filemu.