Fesili ma Tali

“E faapefea ona ou lagonaina atili le Agaga pe a aafia i le popolevale po o le popole?”

“Afai e siomia pea oe e se ‘puao o le pogisa,’ liliu atu i le Tama Faalelagi. Ia manatua o Keriso o lou Faaola ma le Togiola, ma o le Atua o lou Tama. … E malamalama i La’ua. Vaai faalemafaufau ia i La’ua o lataane ia te oe, o loo faafofoga ma ofoina mai le lagolago. … Faalagolago i le togiola alofa tunoa a le Alii.”

Sister Reyna I. Aburto, Fesoasoani Lua i le Au Peresitene Aoao o le Aualofa, konafesi aoao Oke . 2019 (Ensign po o le Liahona, Nov. 2019, 58–59).

E Finagalo le Atua ia e Fiafia

“O nisi taimi e faigofie ona taulima lo’u popolevale ma o isi taimi e le mafai ai ona ou galue. E taua le sailia o se auala e faatoafilemu ai. O mafaufauga le manuia, ma le popolevale e mafai ona faatoilalo ai mafaufauga lelei. Ae ia manatua e finagalo le Atua ia e fiafia, o lea ia faalogo i manatu lelei e sau mai ia te Ia. E mafai ona Ia fesoasoani ia te oe pe a e tatalo atu ia te Ia mo le malosi.”

Madi T., 19, Arkansas, ISA

Saili le Lagolago i le Atua ma le Aiga

“Ia manava loloa ma manatua e le o tuua na o oe i le lagonaina o le popolevale. Fai se tatalo e ole atu ai i le Tama Faalelagi e fesoasoani atu ia te oe. O le talanoa atu i se tasi, e pei o ou matua, e mafai foi ona fesoasoani. Saili se polokalama lagolago o uo ma aiga o le a i ai pea iina.”

Jasmine D, 15, Uosigitone, ISA

Ua Auina Mai e le Tama Faalelagi le Fesoasoani

“Pe a ou popolevale, ou te iloa e malamalama le Tama Faalelagi i mea o loo ou lagonaina. E fesoasoani o Ia i a’u uo ia iloa le taimi ou te tauivi ai ma le popolevale, ma ua latou iloa le auala e fesoasoani ai ia te a’u. E faia pea sa’u tatalo i lo’u mafaufau ma e auina mai e le Tama Faalelagi le Agaga Paia e fesoasoani ia te au ia lagona le mafanafana ma le mautinoa sili atu.”

Elsie J., 14, Idaho, ISA

Faamāmā Lou Mafaufau

“Soo se taimi lava ou te lagona ai le popolevale po o le popole, ou te tatalo ia lagona le toafimalie ma faaali atu i le Alii ou te manaomia Lana lagolago. Ona ou taumafai lea e aveese lo’u mafaufau mai mea e faapopoleina ai au e ala i le usuina o viiga po o le faalogologo i musika lelei. E fesoasoani lenei mea ia te au e faamāmā ai lo’u mafaufau, lagona ai le fiafia atili, ma naunau atili ai e mulimuli i uunaiga ou te maua mai le Agaga.”

Nathan M., 18, Iuta, ISA

E Le Tuua Lava Na o Oe

“Ou te tauivi ma le popolevale, ma o nisi taimi e faigata tele ona lagona le Agaga, talanoa i lo’u Tama Faalelagi, ma lagona Lona alofa ma le taitaiga. E ui ou te tauivi ma le popolevale ma lagona le tuuatoatasi o au i nisi taimi, ae ou te iloa e leai lava. O le tatalo ma le faitauina o le Tusi a Mamona e fesoasoani ia te au. Ou te iloa o loo i ai pea le Atua iina e taialaina i tatou i Lona malamalama ma le alofa.”

Cameron K., 12, Nevada, ISA

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“O loo ou tauivi e aapa atu. E faapefea ona ou faauo i tagata?”

Auina mai lau tali ma le ata ae lei oo i le aso 15 o Mati, 2022.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.