“Sa Ia Faia A’u ma Faifaiva i Tagata” Mo le Malosi o le Autalavou, Fep. 2023.
Sa Ia Faia A’u ma Faifaiva i Tagata
O Colby Merryman o Topsham, Maine, ISA, o se tagata faifaiva ula ma i tagata.
I le amata ai i ona tausaga talavou, e tatagi le uati faailo a Colby i taeao taitasi i le 4:00 i le taeao., e ta’u atu ai ia te ia e nofo i luga ina ia mafai ona i ai o ia i luga o le vaa i le ta o le 5:00. Tou te silafia, o Colby o se tasi o augatupulaga lona tolu o faifaiva ula mai Maine, ISA. Sa manaomia ona i ai o ia i luga o le sami faatasi ma lona tamā i le 5:00 i le taeao ina ia mafai ai ona faamanuiaina lo la aso i le fagotaina o ula.
O Le Alii Fagota Ula
Sa tele taimi na faaalu ma galue malosi ai Colby ina ia maua lana lava laisene fagota ula. Sa ia faaaluina le 200 o aso ma le 1,000 itula e aoao ai i luga o le sami i le aluga o ni nai tausaga. Sa tatau ona ia aoao e uiga i le taulimaina o vaa ula ma faatautaiga, ma sa ia suesue foi i tulafono ma aiaiga o le saogalemu o le pisinisi.
Fai mai a ia, “Sa ono ou tausaga i le taimi na ave ai au e lo’u tama e fagota mo le taimi muamua. E oo lava i lena vaitausaga, sa tuuina mai ia te a’u le galuega o le ‘saisai’ o ula, po o le tuuina o ni pa’u meme’i mamafa i vae o ula.”
Ina ua atoa le 14 o tausaga o Colby, sa faafaigaluegaina o ia e lona tamā o se tautai, ma i le 15 o ona tausaga, sa faatau ai e Colby lana lava vaa fagota. Sa ia maua foi se aoaoga e uiga i enisinia o afi laiti ma faakamuta e saunia ai o ia e avea ma se vaega o le pisinisi fagota ula.
O le avea ai ma se tagata faifaiva ula o se vaega manaia ma faaleaoaoga o le olaga o Colby. Sa aoaoina ai o ia e pulea lana lava vaa ma nafa ai ma faaiuga na te faia i luga ma fafo o le sami. “O le fagota ula o se galuega faigata faaletino ma e mafai ona lamatia,” o lana tala lea.
O tulafono o le saogalemu na aoaoina ai o ia e lona tamā e puipuia ai o ia faaletino, e pei lava ona puipuia o ia faaleagaga e poloaiga a le Alii. Afai la te galulue malosi ma saogalemu i le vaitau atoa o le fagotaina o ula, ona faatasitasi lea o lo latou aiga mo se “aiga tele o ula” i taumafanafana taitasi e faamanatu ai le tu masani a le aiga o le fagotaina o ula.
E masani ona faaigoa e faifaiva a latou vaa i se tamaitai taua i o latou olaga. Sa faaigoa e Colby lana vaa ia “Angelica Jewel,” o ona tuafafine e toalua. Mulimuli ane sa ia faataueseina le vaa, loli, ma masini e fesoasoani e totogi ai lana misiona.
Seminare i luga o le Vai
Ina ua lava le matua o Colby e amata ai le seminare, sa tatau ona taulimaina se feteenaiga i le faatulagaina o taimi. Na amata le fagotaga i le 5:00 i le taeao ma sa alu ai le tele o itula. O le seminare o le 6:00 i le taeao. Sa le mafai ona i ai o ia i ni nofoaga se lua i le taimi e tasi … pe na te mafaia?
Sa amata ona auai Colby i le seminare i se valaau faavitio i taeao taitasi i le 6:00 ina ia mafai ona ia faataunuuina ona tiute o le fagota ma faalautele ai ana aoaoga faaleagaga. “Sa ou lagonaina i taimi uma sa ou amataina le aso i se malosiaga tele faaleagaga,” o lana tala lea. “Sa ou fiafia lava e i ai i luga o le sami mo le seminare. Sa malū ma toafilemu, ma sa ou lagonaina le Agaga o le Alii iina.”
Na te faalogo ma mafaufau loloto, faitau tusitusiga paia, ma auai i le talanoaga ma ona faiaoga ma tagata o le vasega. Ona oo lea i le 6:45 i le taeao, o le a ia toe foi e fagota.
E moni, o le seminare i luga o se vaa fagota sa le o taimi uma e lelei ai. Sa leotele ma faalavelave le pao o le afi. Sa masani ona sou le sami, ma sa pisi luga o le vaa i galuega o le taeao. O nisi taimi o tau matagi e taofia ai Colby mai se fesootaiga lelei e auai ai i lana valaau faavitio. “O le auai i le seminare i luga o le vaa fagota ula sa faigata,” o lana tala lea. “Semanu e faigofie atu ona le faia. Ae ua ou fiafia lava ona sa ou faaaluina le taimi i aso taitasi e auai ai i le seminare.”
Lesona o Fagotaga Faaleagaga
E le o lesona uma a Colby i luga o le vaa sa faatatau i le fagotaga. “E tele mea e te aoaoina e uiga i le talalelei ao galue i luga o le vasa i totonu o se vaa,” o lana tala lea. “E tele lava mea e tutusa ai. O se tasi o mea na aoao mai e lo’u tamā ia te a’u o le faalagolago lea i le sami ma le tau ma faatuatuaina au masini faatonutonu.”
Sa ia faatusatusaina lenei mea i le mulimuli i le Agaga Paia e ala i afā o le olaga, ma faapea mai o le Agaga Paia e galue o sa tatou masini faatonutonu. “Ua ou malamalama nei i le pogai e taua tele ai le aoao e faalogo ma mulimuli i uunaiga a le Agaga Paia ma le siufofoga o le Alii.”
“Ou te manatu e le faigofie i taimi uma ona avea ma se soo o Iesu Keriso,” na ia fai mai ai, “ae ou te manatu e taua.”
O Faifaiva i Tagata
Ua auauna atu nei Colby o se faifeautalai faamisiona i le Misiona a Iuta Provo. O loo ia galue moni lava i le uiga o le avea ma se “faifaiva i tagata.” Na valaauina e Keriso ia faifaiva masani, o aso uma e avea ma Ana Aposetolo ma fesoasoani e talai atu Lana talalelei. O Colby, lea ua avea nei ma Elder Merryman, ua faapea mai: “E fesoasoani lena mea ou te iloa ai o se tagata o aso uma e pei o au e mafai ona mulimuli i le Faaola pe a Ia valaau mai. Ou te lagona se sootaga i le Faaola ua Ia valaauina au e avea ma fai faiva i tagata, e lafo se upega o le malamalama o le talalelei ma maua mai le gauai a i latou o e ua saunia e mulimuli ia te Ia.”
Ina ua tomanatu Elder Merryman i lona aafiaga i le seminare i luga o le vaa fagota, ua ia fai mai “ua faia ai se eseesega i la’u misiona.” Sa aoaoina o ia e lana vasega seminare i le “tele o tala taua mai tusitusiga paia.” O na tala ma lesona na saunia ai o ia e aoao atu le talalelei e ala i le Agaga. “O aso uma ou te faaaogaina ai lesona sa ou aoaoina i le seminare.”
Ua faailoa mai foi e Elder Merryman le faatosinaga faaleagaga a lona tina i le aumaia o lona lava aiga i le talalelei. Fai mai a ia: “O lo’u tina o le faifaiva i tagata muamua lea. Sa ia faasoa atu le malamalama o le talalelei i lo’u tamā. Ona o ia, ua olioli ai lo matou aiga i faamanuiaga o le malumalu ma le talalelei a Iesu Keriso i lo matou aiga.”
“Ou te iloa e moni le talalelei toefuataiina a Iesu Keriso,” o le tala lea a Elder Merryman. “E suia ai olaga mo le lelei. Ua ou vaai o tupu i tagata sa ou aoaoina a o ou i ai i lau misiona. O le mulimuli i le talalelei ua fesoasoani ou te salamo ai ma latalata atili atu ai ia Iesu Keriso.”