“Bitcoin, Pizza, ma le Mauaina o le Fiafia Tumau,” Mo le Malosi o le Autalavou, Fep. 2023.
Bitcoin, Pizza, ma le Mauaina o le Fiafia Tumau
E leai se mea e mafai ona faatusalia i mea o loo teuina e le Tama Faalelagi mo i tatou.
Ata na tusia e Amber Day
Mo le toatele, e itiiti ni mea e sili atu ona tofo lelei nai lo le pizza [pisa]. E faalagolago i le vaega pito i luga e te filifilia, o le pizza [pisa] e mafai ona avea ma soo se mea e te manao ia avea ai!
O lau pizza [pisa] e mafai ona feu (tau lava o le faaopoopo o le jalapeños po o fasi polo feu mumu). E fesoasoani foi ia te oe e ‘ai ai au fualaauaina pe afai e te faapitoina i luga ia spinach [laupele ninii], aniani, pulouaitu, po o olive uli. Faatasi ai ma le tele naua o filifiliga mananaia—mai le sosisi e oo i le fala—o le pizza [pisa] e mafai ona tofolelei mo le toetoe lava o tagata uma.
Ae o se fesili malie lenei: e te totogia se $400 miliona (Tala Amerika) mo se pizza [pisa]?
O le Pizza [Pisa] Taugata Lava
I tausaga ua mavae, sa faafesuiaia ai e se alii i Florida, ISA, le 10,000 bitcoins, o se tupe faaeletonika, mo ni pisa se lua. I lena taimi, sa lei taugata tele le bitcoin. O le fefaatauaiga e tutusa ma le $40. I ni nai tausaga mulimuli ane, na matuai maualuga lava le tau o le bitcoin. I le taimi nei, o na bitcoin e 10,000 semanu o lona tau e toeitiiti $400 miliona! O lea, afai na te faaaogaina le 10,000 bitcoins e faatau ai ni pisa se lua i le asō, o le a ia totogiina le $400 miliona—mo pisa!
Afai e te tilotilo i ai i lena auala, o na pisa e lua o pisa aupito sili ona taugata. Ou te faamoemoe sa tofo lelei!
Vaai i talaatu o Iinei ma le Taimi Nei
Ana faapea e iloa e lena alii le tau o le a i ai le bitcoin, e te manatu o le a ia faafesuiaia pea mo pisa? O le lesona mo i tatou e le tatau ona tatou lafoaia mea e taua mo se mea tatou te mananao ai i le taimi nei.
O le fuafuaga a le Tama Faalelagi mo i tatou o le ola e faavavau. E leai se aofaiga o le bitcoin, pisa (tofolelei e pei ona i ai), po o se isi lava mea e mafai ona faatusa i mea ua Ia teuina mo i tatou. Ua Ia folafola mai o mea uma ua ia te Ia o le a avea ma a tatou pe afai tatou te faamaoni.
Valaaulia i le Fiafia Tumau
Ia Aperila 2020, sa folasia mai ai e Peresitene Russell M. Nelson se faatusa fou O Le Ekalesia a Iesu Keriso o le Au Paia o Aso e Gata Ai “o le a faailoa ai le tulaga totonugalemu o Iesu Keriso i Lana Ekalesia.” I le totonugalemu o le “Alii toetu ma soifua o loo aapa mai e opo mai tagata uma o le a o mai ia te Ia.”1
O lenei mea e faavae i luga o le faatusa maamora o Keriso. O le uluai faatusa, na fauina e le vane-faatagata Tenimaka o Bertil Thorvaldsen, o loo i totonu o se falesa i Copenhagen, Tenimaka. I luga ae o le uluai faatusa o Keriso o loo i ai upu nei: “O lo’u Atalii pele lena: ina faalogo ia outou ia te ia” (Mareko 9:7). Ma i le pito i lalo, e faitauina faapea: “Ia outou o mai ia te au” (Mataio 11:28).2
O le valaaulia a le Tama Faalelagi e faalogo i Lona Alo ma le valaaulia a Iesu Keriso e o mai ia te Ia o a Laua valaaulia ia i tatou ia maua le fiafia tumau.
Faalogo ia te Ia
Na aoao mai Peresitene Nelson, “Soo se taimi lava e faalauiloa mai ai e [le Atua] Lona Alo Pele e, … Na te faia lea mea i ni nai upu ofoofogia. … Faalogo ia te Ia! …
“Ua silafia e lo tatou Tama … o le mea o le a sili ona fesoasoani tele ia i tatou, o le faalogo lea i Lona Alo.”
E mafai ona e faalogo ia te Ia e ala i le suesueina o tusitusiga paia ma auai atu i le malumalu. E mafai ona e aoao le ala e talanoa atu ai le Agaga Paia ia te oe ma uai atu i upu a perofeta, tagatavaai, ma talifaaaliga.
Na saunoa Peresitene Nelson “I na upu e fa—‘Faalogo Ia te Ia’—ua aumai ai e le Atua ia i tatou se mamanu mo le manuia, fiafia, ma le olioli i lenei olaga.”3
O Mai ia te Ia
Po o le a lava le mea e te manao i ai i le olaga—e aofia ai le fiafia—o le valaaulia a le Faaola e tutusa lava i taimi uma: “O mai ia te au.”
Tatou te o atu ia te Ia a o tatou faatinoina le faatuatua ia te Ia, o i le lotu, taumamafa i le faamanatuga, ma alolofa i le Atua ma o tatou tuaoi (tagai Mataio 22:37–39). Na aoao mai foi Iesu e ala i faataitaiga lea e tatau ona tatou tatalo ma faamagalo atu i isi.
Ina ia fausia lou olaga i aoaoga a Iesu Keriso e manaomia ai le galue ma le taimi, ae e te le tau faia na o oe. O Iesu o “le ala, ma le upu moni, ma le ola” (Ioane 14:6). O le a Ia fesoasoani ia te oe.
Ma, i se aso, e mafai ona e toe tepa i tua i se olaga o le a e mitamita ai ma le Faaola. Ma o lena mea o le a sili atu ai lou fiafia nai lo se isi lava mea—e oo lava i le pisa