“Taulimaina o le Atuatuvale,” Mo Le Malosi o le Autalavou, Fep. 2023.
Ou Te Mafaia Mea Uma ia Keriso
Ua faasoa mai e le autalavou le ala na faamalosia ai e Keriso i latou e faia mea faigata (tagai Filipi 4:13).
Taulimaina o le Atuatuvale
I ni nai tausaga ua mavae, sa ou matauina ai ua amata ona faateleina lo’u vaivai, leai se fiaai, ma ua mou atu le naunau mo mea na masani ona ou fiafia i ai. Ina ia faafaigofieina, sa ou faanoanoa. I taimi uma. O le mea e sili ona leaga, sa ou lagonaina le vavaeeseina mai le Tama Faalelagi.
Sa ou mafaufau sese o lo’u lava le agavaa o le mafuaaga lea ma afai e mafai ona ou amiotonu atili, o le a ou toe fiafia. Ae ina ua mavae se tausaga o taumafai e faaleleia mea uma e au lava ia, sa ou lagonaina le tuulafoaiina. O fea le filemu folafolaina na ou sailia? Sa i ai taimi na ou le fia ola ai. Mulimuli ane, na iloa e ou matua ua i ai se mea na faaletonu. Sa ou vaaia se foma’i faapolofesa ma amata ona inu ni fualaau, ae sa leai se mea na suia.
I le Alema 36:18–20, o loo faamatala ai e Alema na ia aapa atu i le Faaola i lona faanoanoa. Na ia faapea mai ʼoi, le olioli e, ma le malamalama ofoofogia tele na ou vaaia; ioe, sa faatumulia loʼu agaga i le olioli sa sili atu ona tele e pei o loʼu tiga!” A o ou faitauina nei upu i se tasi po, sa le mafai ona taofia lo’u lagonaina o le matau’a. Sa ou aioi atu mo se toomaga i le tatalo e le mafaitaulia. Sa ou fesili ifo ia te au lava ma loimata, “Aisea ua ou le maua ai le olioli na maua e Alema le Itiiti?”
Na auaua’i le oo mai o la’u tali, e tasi le manatu i le taimi. O le tasi o se ata: o se atavali o le Faaola i Ketesemane, o loo taatia i luga o le eleele i le faanoanoa tele ma toetoe lava a lofituina atoa i le pogisa. Sa ou iloaina ma le manino atoatoa na Ia silafia tonu lava le avega sa ou amoina, ma o le a Ia le tuuina mai ia te au e tauave na o au.
Sa leai se taimi na faaleleia ai e mea na tutupu i latou lava, ae faatasi ai ma le fesoasoani faapolofesa ma le alofa tunoa mai le Alii, ua sologa lelei ai mea uma mo au. E le o taimi uma e aluese ai le atuatuvale. Peitai, ua ou malamalama nei o lo’u faanoanoa o le a faafesuiai ma le olioli, i lenei olaga ma le olaga a sau.
Anna B., Kalefonia, ISA