UpuFaaiu

Pe Manaomia Ea Ona Tatou Atoatoa i le Taimi Nei?

Saunia e Elder Jeffrey R. Holland

O Le Korama a Aposetolo e Toasefululua

Mai se lauga o le konofesi aoao ia Oketopa 2017.

Ata na tusia e Emily E. Jones

Na tusia tusitusiga paia ina ia faamanuia ma faamalosiau ai i tatou, ma e mautinoa lava lo latou faia o lena mea. Ae pe ua e matauina mai lea taimi i lea taimi e faaali mai lava se fuaitau e faamanatu mai ai ia i tatou o loo fai lava si o tatou le ‘a’u’a’u? Mo se faataitaiga: “O lenei, ia atoatoa ona lelei o la outou amio, e pei o lo outou Tamā … i le lagi e atoatoa ona lelei o ia” (Mataio 5:48). I lena poloaiga, tatou te toe fia foi ai i le moega ma toe pulou le ieafu. O lea sini faaselesitila e foliga mai tatou te le gafatiaina. Ae mautinoa lava e le aumaia lava e le Alii ia i tatou se poloaiga Na te silafia e le mafai ona tatou tausiaina.

“Ioe, o mai ia Keriso, ma faaatoatoaina ia te ia,” o loo aioi mai ai Moronae. ‘Alolofa i le Atua ma o outou manatu atoa, mafaufau, ma le malosi atoa, ona … o lona alofa tunoa e mafai ai ona outou atoatoa ia Keriso” (Moronae 10:32; ua faaopoopo le faamamafa). Pau le tatou faamoemoega mo le atoatoa moni o le taliaina lea e avea ma se meaalofa mai le lagi—e le mafai ona tatou “mauaina”.

Sei vagana ai Iesu, e leai lava ni faatinoga atoatoa i luga o lenei malaga faalelalolagi o loo tatou i ai, ao i ai la iinei i le olaga faaletino ia tatou tauivi ia agai i luma tumau ma aloese mai faamoemoega ogaoga o i tatou lava ma isi.

Afai tatou te tutumau, ona i ai lea o se mea i le faavavau o le a faamaea ai ma faaatoatoa ai—o le faauigaga lea o le Feagaiga Fou o le atoatoaga.