“Vaai atu i le Perofeta,” Mo Le Malosi o le Autalavou, Fep. 2023.
Vaai atu i le Perofeta
O loo i ai le mafanafana ma le saogalemu i le faatuatuaina, talitonu, ma mulimuli i le perofeta.
Atapue mai le Getty Images
Sa pei o se taeao masani a o ou savali atu i le aoga. Ae o lenei aso na foliga mai o se aso masani i lo’u olaga e 13 tausaga le matua na liua i se mea e fai si ese i le taimi na ou oo ai iina.
“Na e faalogo i talafou?” o le fesili lea a la’u uo.
“Leai,” na ou tali atu ai. “O le a le mea ua tupu?”
Ina ua ma savavali atu i le ma vasega muamua, sa ki le TV a le faiaoga. O le taimi lena na ou vaai ai i talafou e uiga i mea matautia na tutupu i le taeao o le aso 11 o Setema, 2001, i le Iunaite Setete. O vaalele na ave faamalosi na felelei atu i le Nofoaga Autu o Fefaatauaiga a le Lalolagi i le Aai o Niu Ioka ma le Penetakona e lata i Uosigitone, D.C. Sa lavea se isi vaalele i se laufanua i Penisilevania. E faitau afe na fasiotia pe na manunua. O se aso taufaafefe ma le matautia.
O le taimi lea, o lo’u tamā o se pailate o vaalele tau i luga o se vaa o vaalele i se malaga faamiliteli e ono masina mo le Neivi a le Iunaite Setete. I aso na sosoo ai, sa faaauau pea ona ou vaai i tala e uiga i osofaiga. Sa ou faalogo foi i tagata o le vasega o faaalia le fefefe ma le feita. O nei mea uma na ou popole ai e uiga i le lumanai ma le mea e ono tupu i lo’u tamā.
Hal Murdock, Kapeteni, Neivi a le Iunaite Setete, i le nofoa o se F/A-18F Super Hornet i le Naval Air Station i le 2008.
Mafanafana mai le Tatalo a se Perofeta
Sa faia le konafesi aoao i le tolu vaiaso mulimuli ane. A o ou faalogo, sa saunoa mai le perofeta, o Gordon B. Hinckley (1910–2008), ua tatou ola i taimi faigata, ae “o le Atua ou te talitonu i ai … o se Atua o le alofa mutimutivale. O Ia o se Atua o le alofa. O Ia o se Atua o le filemu ma le faamautinoaga, ma ou te vaai atu ia te Ia i taimi faapenei o se faamafanafanaga ma se puna o le malosi.”1
I le sauniga mulimuli, sa tapunia ai e Peresitene Hinckley lana saunoaga i se tatalo. Sa ia tatalo mo faamanuiaga o le faatuatua, alofa, alofa mama, ma “se agaga o le onosai e lia’i ese ai mea leaga matautia o loo i lenei lalolagi.” Sa ia tatalo ina ia tuuina mai e le Atua le “puipuiga ma le taitaiga ia i latou o e punouai i le tauaveina o le taua. Faamanuia ia te i latou; faasao o latou ola; laveai i latou mai lamatiaga ma mea leaga. Faafofoga i tatalo a e pele ia i latou mo lo latou saogalemu.” Sa ia tatalo foi mo le Atua ina ia “faasaoina i matou ma fesoasoani mai ia matou savavali ma le faatuatua e faavavau i Lau Afio ma i Lou Alo Pele.”2
Na ofoina atu e Peresitene Gordon B. Hinckley se tatalo i le taimi o le konafesi aoao ia Oketopa 2001.
Sa masani ona ou faalogo i le perofeta o fai mai e tatalo o ia mo le tele o mea, ae o se aafiaga tulaga ese lenei. Ou te lei faalogo muamua lava i le perofeta o faia moni lava se tatalo i konafesi aoao. O le faalogo i le perofeta o tatalo na ou maua ai le mafanafana ou te lei lagonaina i ni vaiaso. Sa ia tatalo e uiga i o’u atugaluga. Sa ou lagonaina sa ia tatalo mo lo’u aiga. A o faia lana tatalo mo le lalolagi, sa ou maofa ona o le tatalo a se perofeta e mafai foi ona mo au.
O Se Tusi Faapitoa
I ni nai masina mulimuli ane, sa maua ai e lo matou aiga se tusi mai lo’u tamā. Sa ia tusia e faapea i le aso o le tatalo a Peresitene Hinckley, sa amata ai e ia ma tagata uma sa i luga o le vaa o vaalele se misiona e taofia nisi osofaiga mai ia i latou o e na osofaia Amerika.
“A o ou tomanatu i le tatalo na ofoina mai e le perofeta,” na tusia e lou tamā, “Ua ou iloaina ni mea ofoofogia. Matou te lei mafatia i ni manuaga po o ni maliu i le taimi atoa o le gaoioiga. E i ai taimi, sa matou iloa ai ma o’u uso a pailate le tele o maila matou te mamao ese ai mai le vaa, ma felelea’i ai i luga o teritori o le fili i misiona e 12-itula. Pe a matou toe foi atu i le vaa o vaalele e tulaueleele ai a matou vaalele tau i le po, sa tumau pea le malū o le sami ma le tau i le taimi e masani ona leaga ai le tau i lena vaega o le lalolagi. O le aumaia o tagata uma i le aiga o se faamanuiaga faavavega. Ou te iloa mai aafiaga patino na tali mai ai le tatalo na ofoina mai e le perofeta mo i tatou.”
Ina ua ou faitau i le molimau a lo’u tamā e uiga i se tali i le tatalo a le perofeta, sa faatumulia lo’u loto i le Agaga ma sa oo mai nei upu i lo’u mafaufau: “Vaai atu i le perofeta, ma o le a lelei mea uma mo oe.”
O Taitai’au Murdock ma lona aiga i le aso na ia toe foi saogalemu mai ai i le aiga mai le malaga faamiliteli.
Taiala mo Taimi o Luitau
I le taimi nei, e tele leo le mautonu ma lē lelei o loo taumafai e taitai sese i tatou ma faia mea e foliga mai e ese mai mea o loo latou i ai moni e ala i le fefulisa’iina ma le faauiga sese o le upumoni.
Ua valoia foi i o tatou aso e faapea o Satani foi o le a “sasao [ai o ia] i loto o le fanauga a tagata, ma faaoso i latou ia feita e faasaga i mea lelei” (2 Nifae 28:20). O le a i ai “taua ma tala o taua” (Mataio 24:6) ma le atuatuvale ma le fememeai i malo (tagai Luka 21:25), ma “o le a vāvāō mea uma” (Mataupu Faavae ma Feagaiga 88:91). O le taunuuga, e toatele tagata e oti i le matata’u (tagai Luka 21:26).
O le mea e faafetai ai, ua silafia e le Alii “le iuga mai le amataga” (Aperaamo 2:8) ma e lei tuua lava i tatou e aunoa ma se fesoasoani. I le avea ai ma se faailoga o Lona alofa mo i tatou, ua Ia valaauina ai perofeta e faamanuia ma taiala i tatou.3
O le perofeta i aso nei, o Peresitene Russell M. Nelson, e aoao maia poloaiga a le Atua ma maua faaaliga e taiala ai le Ekalesia. E mafai ona ia vaai i mea e le mafai ona tatou vaaia ma tuuina mai le taitaiga e puipuia ma fesoasoani ia i tatou. Mo se faataitaiga, ua ia folafola mai afai e te faatuatua ia Iesu Keriso, “e le manaomia la ona e fefe.”4
O loo i ai le mafanafana ma le saogalemu i le faatuatuaina, talitonu, ma mulimuli i le perofeta, o ona fesoasoani i le Au Peresitene Sili, ma uso o le Korama a Aposetolo e Toasefululua. Afai tatou te taulai atu ia i latou ma a latou upu, o le a latou le taitai seseina lava i tatou.5 Na folafola mai e le Faaola, “Pe i lo’u lava leo po o i le leo o a’u auauna, ua tutusa lava” (Mataupu Faavae ma Feagaiga 1:38).
O Taitai’au Murdock i le nofoa o le F/A-18C Hornet i se misiona umi i se taimi o Oketopa–Tesema 2001. Sa ia pueina se ata ma se savali mo lona aiga. Sa ia fai mai, “Sa ou faapa’ūina le ufi fofoga o le okesene mo le ata ina ia latou iloa ai o au moni lava.”
O se F/A-18C Hornet o loo agai e tulaueleele i luga o le USS Carl Vinson. O le faamātau i tua o le vaalele tau e faaaoga e apo ai se tasi o uaea taofi i luga o le vaa o vaalele.
E Mafai Ona E Iloa le Upumoni
E le faigofie i taimi uma ona mulimuli i le perofeta ma aposetolo. Pe a le lauiloa a latou aoaoga pe foliga mai e le taliaina e le lautele, atonu e faaosoosoina le ilo ma filifili po o a aoaoga e talia. Ae o a latou upu e faavae i luga o le aoaoga faavae e le masuia ma upumoni e faavavau e tatau ona tatou iloa. “Atonu tatou te le ta’u atu i tagata i taimi uma mea latou te mananao e faalogo i ai,” na aoao mai ai Peresitene Nelson. “O perofeta e seāseā ona lauiloa. Ae o le a tatou aoao atu pea le upumoni!”6
Ua faafeiloai e Peresitene Russell M. Nelson tagata i se faigalotu i Sigapoa i le aso 20 Novema, 2019.
E mafai ona tatou iloa lenei mea mo i tatou lava. Na aoao mai foi Peresitene Nelson: “Fesili atu i lou Tama Faalelagi pe o matou moni o ni aposetolo ma perofeta a le Alii. Fesili atu pe ua matou mauaina faaaliga [e taitai ai le Ekalesia].”7 E mafai e le Agaga Paia ona faamautinoa atu ia te oe upumoni latou te aoao atu. O le isi auala e iloa ai pe moni a latou upu o le faaaogaina lea i lou olaga “i le onosai ma le faatuatua atoa” (Mataupu Faavae ma Feagaiga 21:5). Na o le faia loa! Faatino mea latou te aoao atu, ma vaai po o le a le mea e tupu.
Ou te faafetai mo le molimau mai le Agaga Paia sa ou mauaina a o 13 tausaga le matua i le valaauga paia o se perofeta. Ua sili atu ona ou mautinoa i le asō. Afai o le a tatou vaai atu i le perofeta ma mulimuli i ana aoaoga, o le a lelei mea uma mo i tatou e tusa lava po o a luitau e ono siomia ai i tatou.