“Taiala mo le Ola ai o le Vasega ma Korama,” Mo le Malosi o le Autalavou, Fep. 2023.

Taiala mo le Ola ai o Vasega ma Korama

Saunia e Jessica Z. Strong

Mekasini a le Ekalesia

Taiala mo le Ola ai o Vasega ma Korama — Sii mai le PDF

1. Avea ma se Tagata Tomai o le Faamasani-Ia-Oe

Faataitai fautuaga nei e faamasani ai i tagata i lau korama po o le vasega!

Ia toa. Afai e tuitui mai se tasi i lou faitotoa ia iloa oe, mata e te ita? Ailoga. Ia toa. Taumafai e tesi, valaau, po o le tuitui atu.
Ia mau o latou igoa i lou mafaufau. O le isi taimi e ta’u atu ai e se tasi ia te oe o latou igoa, taumafai e manatua. E tutusa le faaleoga ma se mea? E tutusa o la igoa ma lou tausoga? Ia aua nei galo!
Filifili ma le atamai lou nofoa. I le taimi o le vasega po o se gaoioiga, taumafai e nofo i autafa o se tasi e te le iloa lelei. Faatalofa atu ma faailoa atu oe lava. Ona faalogo lea ma aoao e uiga ia i latou! O le a le mea latou te fiafia e fai? O a mai i latou?
Fai se mea manaia! O le a le mea o le a e talisapaia? O se meaai māmā, se ataata, o se faamalo? Liliu atu ma fai mo se isi tagata.

2. Fesoasoani i Isi ia Lagona le Taliaina

Afai e te vaavaai toto’a, atonu e te matauina se tasi i lau korama i le vasega e faigata ona faaaofia ai. Atonu latou te le o mai soo i gaoioiga po o le lotu, pe atonu foi e le tele ni a latou uo i le vaega. E mafai ona e faia se eseesega. E mafai ona e:

Valaaulia i latou i gaoioiga a le ekalesia.
Valaaulia i latou e nonofo i ou autafa i vasega o le Aso Sa po o se gaoioiga.
Faatalofa atu ia i latou i fafo atu o le lotu.
Gauai atu ia alofa ia i latou po o ai lava i latou. Ia mautinoa ua latou iloa o loo e i ai iina mo i latou e tusa lava po o le a.

3. Fealofani ma Isi

O e tauivi e fegalegaleai ma nisi o tagata i lau korama po o le vasega? O se mea masani. Ae e le faapea e lelei. Na aoao i tatou e Iesu Keriso ia alolofa i isi, e pei ona Ia alofa ia i tatou. E le faapea e tatau ona avea oe ma uo mamae a tagata uma. Ae e mafai ona avea oe ma se tasi i lau vaega e mafai ona faalagolago i ai mo le agalelei, faaaloalo, ma le faauoga.

Pe a le lelei atu isi ia te oe: Na aoao i tatou e Iesu ia “alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuua’i fua mai ma faasaua mai ia te outou” (Mataio 5:44). E le faigofie i taimi uma, ae o le a fesoasoani le Tama Faalelagi ia te oe a o e faia le mea sili e te mafaia ia agalelei ai.

Pe a ese isi mai ia te oe: E le afaina pe afai e eseese o outou manaoga po o uiga faaletagata. O le mea moni, e mafai ona avea lena ma se mea lelei (tagai Vaega 4). E le manaomia ona outou tutusa lelei e lagolago ai e le tasi le isi. Atonu e te taumafai e auai i se taaloga, konaseti, po o se gaoioiga a se tasi e faaali atu ai e te amanaiaina i latou.

4. O Le Tino o Keriso

Na aoao mai le Aposetolo o Paulo o i tatou uma lava o le tino o Keriso. Atonu e foliga fenumiai lena mea, ae sa lei faauigaina e Ia o se tino moni. Ua ia faamatala mai ua pei i tatou o ni vaega o se tino aua e eseese uma i tatou ae taua uma i le vaega atoa (tagai 1 Korinito 12:16–18). Na ia faapea mai, “Ina ne’i i ai i le tino se maseiga [feeseeseaiga], a ia fetausiai faatasi uma itu tino. “Pe afai e tiga le tasi itu tino, ia tiga faatasi ai itu tino uma lava; pe viia le tasi itu tino, ia olioli faatasi ai itu tino uma lava.” (1 Korinito 12:25-26).

I le avea ai ma se tasi o se vasega po o se korama, ua ia te oe le tiutetauave e tausia isi i lau vaega. O ai o tauivi? O ai e mafai ona e “tiga faatasi” pe “olioli faatasi”? O ai e manaomia ona lagona le lagolagoina, faaaofiaina, ma le alofaina? (Faaiteite: atonu o tagata uma!)

Ia, faaalu sina taimi e filifili ai se mea se tasi e mafai ona e faia mo se tasi ma fai se fuafuaga ia faia. O na manatu e masani ona sau mai le Agaga Paia.

5. Mo le Au Peresitene o Korama ma Vasega

E ui lava ua i ai i tagata uma le tiutetauave e tausia ai isi tagata o le korama po o le vasega, ae ua valaauina ma vaetofia oe e faia. E mafai ona fesoasoani faaaliga faaletagata lava ia. Tatalo ia iloa po o ai o loo manaomia le fesoasoani ma mea e mafai ona e faia. Ona faatino lea i luga o uunaiga e te maua.