“O Le Mana Sui Olaga o le Manatuaina o Ia,” Mo Le Malosi o le Autalavou, Iuni 2023.
Sau, Mulimuli Mai ia te A’u
Mataio 26:26–29; Mareko 14:22–25
O Le Mana Sui Olaga o le Manatuaina o Ia
E ala i le faamanatuga ma le Agaga Paia, tatou te manatua ai Iesu Keriso ma maua ai le malosi, filemu, ma le olioli.
Ina ua faapotopoto faatasi e Iesu Keriso Ana Aposetolo i se afeafe pito i luga i Ierusalema mo le Paseka, o Lana talisuaga mulimuli faatasi ma i latou i le olaga nei, sa Ia silafia “ua oo mai ona po” (Ioane 13:1). E le o toe mamao ona Ia ofoina mai lea o Lana taulaga togiola e le iu ma faavavau.
Sa savavali aposetolo ma talanoa ma Iesu. Sa latou faalogo i Ana aoaoga ma vaaia Ana vavega. O lea ua tatau ona alu o Ia? E faapefea ona latou fealofani e aunoa ma Ia?
O Le Talisuaga Mulimuli, saunia e Simon Dewey
Sa faasoa atu e Iesu ia i latou le auala e mafai ai ona latou manatua o Ia pe a le toe faatasi o Ia ma i latou. Sa ia faailoa atu le faamanatuga ma folafola atu e auina mai le Agaga Paia.
I le avea ai ma soo o le Alii i aso e gata ai, ua poloaiina i tatou ia manatua peao Ia. A o ou faasoa atu le auala e fesoasoani ai le faamanatuga ma le Agaga Paia ia i tatou ia manatua ma mulimuli ia Iesu Keriso, ou te valaaulia outou e mafaufau i auala e mafai ona e manatua atili ai ma mulimuli ia te Ia i aso uma.
Faamanuiaga o le Faamanatuga
I le taimi o le Tausamaaga Mulimuli, sa faamanuia ai e Iesu le areto ma avatu i Ana Aposetolo, ma fetalai atu, “Ina tago ia, ina aai; o lo’u tino lenei. Ua tago foi o ia i le ipu, ua faafetai, ona avatu ai lea e ia ia te i latou, ua faapea atu, ina inu ia outou uma i ai, aua o lo’u toto lenei” (Mataio 26:26–28).
Sa Ia fetalai atu ia i latou, “Tou te faia le mea nei e fai ma faamanatuga ia te au” (Luka 22:19).
I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua poloaiina i tatou e aai ma feinu i le faamanatuga i vaiaso taitasi (tagai i le Mataupu Faavae ma Feagaiga 59:9, 12). O lenei sauniga paia faaleperisitua o se valaaulia faifai pea ina ia salamo faamaoni, ia faafouina faaleagaga, ma manatua Iesu Keriso.
O le ’ai ma le inu o le falaoa ma le vai e le faamagaloina ai agasala. Ae a tatou saunia ma le agaga tatalo ma le faamaoni ma auai ma le agavaa i le sauniga, tatou te iloiloina a tatou faatinoga ma manaoga o o tatou loto ma opogi le valaaulia a le Alii ia salamo (tagai Mose 6:57). Pe a tatou ofoina atu le taulaga na te manaomia—o se loto momomo ma se agaga salamo (tagai 3 Nifae 9:20)—ua folafola mai ia i tatou e mafai ona tatou maua pea Lona Agaga e faatasi ma i tatou. Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala (tagai Moronae 6:4).
I le maea ai o le tagofia o le faamanatuga i se fonotaga faaletaitai, na saunoa ai Peresitene Russell M. Nelson: “Ua ou osia se feagaiga a o ou ai i le faamanatuga o le a ou loto e ave i o’u luga le suafa o Iesu Keriso ma ua ou loto e usitai i Ana poloaiga. E tele ina ou faalogo i faaupuga tatou te aai i le faamanatuga e faafou ai feagaiga na osia i le papatisoga. E ui e moni lena mea, ae e matua sili atu i lo lena. Ua ou osia se feagaiga fou. Ua outou osia ni feagaiga fou. … O le taui la, lea Na te faia ai le fetalaiga o le a tatou maua pea Lona Agaga e faatasi ma i tatou. E maeu lea faamanuiaga!”1
I le taimi o le faamanatuga, tatou te manatua ai Iesu Keriso ma le ala na “puapuagatia ai o Ia, sa ia afutoto ma maliu ai”2 mo i tatou. O le saunia ma le manatunatu loloto mo le aai ma feinu ma le faamaoni i le faamanatuga e aumaia ai le faafouga faaleagaga, mana faalelagi, ma faamanuiaga folafolaina a le Alii.
Valaaulia le Agaga Paia
Sa folafola atu e Iesu i Ana Aposetolo o le a auina atu e le Tama ia i latou le Fesoasoani, po o le Agaga Paia, e faamanuia i latou pe a mavae Lona afio ese (tagai Ioane 14:26).
O le matafaioi a le Agaga Paia o le taiala (tagai Ioane 16:13), faatonu (tagai 2 Nifae 32:5), faamafanafana (tagai Ioane 14:26), puipui (tagai Mosaea 2:36), ma faapaia (tagai 3 Nifae 27:20) i tatou. E faatoa mafai ona ia galue faatasi ma i tatou ma ala mai ia i tatou pe afai tatou te mananao ma le faamaoni i Lana mafutaga faifai pea ma saunia ma le talafeagai ma valaaulia o Ia i o tatou olaga.
Ina ia valaaulia le Agaga Paia, suesue, mafaufau loloto, ma taumamafa fiafia i afioga a Keriso i tusitusiga paia (tagai 2 Nifae 31:20). Tatalo e le aunoa. Faatino ma le faamaoni uunaiga. Saili mafaufauga, amioga, ma gagana mama. Tapuai i le aiga, i le malumalu, ma i le lotu.
A o e faaaogaina nei faiga amiotonu i lou olaga, o le folafolaga a le Alii e faapea ia e “maua pea lona Agaga e faatasi ma oe]” (Mataupu Faavae ma Feagaiga 20:77; faaopoopo le faamamafa).
Tulai ae o Alema, saunia e Walter Rane
O Se Suiga Mamana
Ina ua faaali atu se agelu a le Alii ia Alema le Itiiti ma valaauina o ia e salamo, sa pau Alema i le eleele ma sa le mafai ona tautala pe minoi mo ni nai aso.
I le taimi lena, sa puapuagatia o ia i le manatuaina o ana agasala, ona ia manatuaina lea na vavalo lona tama “e uiga i le afio mai o se tasi o Iesu, o se Atalii o le Atua, e togiola mo agasala a le lalolagi.” Na ia tusia mulimuli ane, “ina ua tau ane lou mafaufau i lenei manatu, sa ou tagi ifo i totonu o loʼu loto: E, Iesu e, oe le Alo o le Atua, ia e alofa mutimutivale mai ia te au. … Ma o lenei, faauta, ina ua ou mafaufauina lenei mea, sa ou le toe manatuaina ou tiga” (Alema 36:17–19).
E le o le faaali mai o le agelu na suia ai Alema. O lemanatuaina o Iesu Keriso ma Lana taulaga togiola na taitai atu ai o ia ia salamo ma tatalo mo le faamagaloga ma le alofa mutimutivale, ia lagona le olioli silisili, ma avea ma se soo tuuto.
A e manatua Iesu Keriso ma saili ma le naunautai ma mulimuli ia te Ia, e avea o Ia ma tagata e sili atu nai lo le tagata autu i tala o tusitusiga paia. O Lona paia ma le ola moni e aafia ai au filifiliga i aso taitasi, faamanuia oe, ma faaolaola oe ia avea atili e faapei o Ia. O lenei suiga mamana e amata pe a e manatua Iesu Keriso!
O Loʼu Faamoemoe mo Oe
Ou te molimau atu o le a faamanuia outou e le Alii o Iesu Keriso pe a outou manatuaina o Ia, tauave Lona suafa i o outou luga, ma tausi Ana poloaiga (tagai Mataupu Faavae ma Feagaiga 20:77, 79). Na Ia fetalai, “Afai tou te manatua pea a’u o le a outou maua lo’u Agaga e faatasi ma outou” (3 Nifae 18:7).
Ou te faamoemoe o le isi taimi tou te aai ai i le falaoa ma le vai i le taimi o le faamanatuga, o le a e fai atu ai i lou loto: “O le a le galo lava ia te au o Ia po o Lana taulaga mo au. O le a ou alofa ma mulimuli ia te Ia.” Ou te tatalo o le a outou tauaveina lenei faaiuga ma oe i lou olaga atoa.
Tau ina ia outou agai i luma ma le malosi, filemu, ma le olioli lea e oo mai i le manatuaina ma le mulimuli ia Iesu Keriso e le aunoa.