Pe A E Lagonaina le Tuuatoatasi

Saunia e Jessica Zoey Strong

Mekasini a le Ekalesia

Sa savalia e le Faaola “le malaga aupito tuuatoatasi na faia”¹ ina ia aua ai nei tuua na o oe.

Pe sa e lagonaina ea le tuua toatasi? Sa ou lagonaina. Ina ua fitu o’u tausaga, sa ou tagi ai i lo’u tina ona sa leai ni a’u uo mamae i le aoga. A o o’u talavou, sa na o a’u o se tasi o tamaitai talavou i se vasega o le Aoga Sa ae o le toatele lava o tama (ma e mautinoalava, ou te lei fia talanoa ia i latou!). Ma o nisi taimi sa faigata ia te a’u ona fetaui ma tagata i a’u ’au po o a’u vasega i le aoga.

Ae o se tasi taimi sa ou lagona ai le tuuatoatasi o la’u misiona lea i Guadalajara, Mekisiko. Sa ou taunuu i ni nai aso na muamua atu, ma e lei tele se faaSipaniolo sa ou tautala ai. Sa na o le faaSipaniolo na tautala ai la’u soa. E tele lava ina ma fesootai i nai upu sa ou aoaoina i le nofoaga autu e aoao ai faifeautalai ma le tele o taga i lima. Ae faasilisili ai, sa lei i ai se eletise po o se vai vevela i lo matou fale mautotogi. Sa ou i ai i se tulaga sa ou le masani ai, o se suiga tele lava, ma sa ou matuai lagonaina le tuuatoatasi.

Atonu lava, sa i ai taimi na e lagona ai foi le tuuatoatasi. Atonu o loo e faapena:

O loo tauivi ina ia masani lelei i le aoga po o le sauaina foi.
E le o feoeoeai ma nisi o au uo.
Na o [oe] le tagata o le Ekalesia i lau aoga.
O loo nofo i se aai po o se atunuu fou.
O loo misia se tagata o le aiga o loo i se misiona po o le militeli pe ua maliu.
Lagonaina o le vavaeese mai le Tama Faalelagi ma Iesu Keriso ona o le agasala.

Pe a e lagonaina le tuuatoatasi, e mafai ona e vaai atu i le Faaola. Na te silafia lelei lagona o le tuuatoatasi, ma Na te silafia tonu lava le auala e fesoasoani ai ia te oe. O nisi nei o mea e mafai ona tatou aoaoina e uiga i le faatoilaloina o le tuuatoatasi mai mea na onosaia e le Faaola i le taimi o Lana taulaga togiola.

O Le A Faamalosia Oe

Ua ta’ua e Elder Jeffrey R. Holland o le Korama a Aposetolo e Toasefululua le Togiola a le Faaola “o le malaga aupito tuuatoatasi na faia.” ² A o puapuagatia Keriso ma tafetoto mai pu afu uma i le faatoaga o Ketesemane, sa momoe Ona soo.

Ao puapuagata Iesu, na Ia tatalo, “Lo’u Tama e, a e finagalo i ai, ia e ave ese lenei ipu ia te au; a e aua le faia lo’u loto, a o lou finagalo.” E ui ina sa lei aveesea le avega a le Faaola, “Ona faaali mai ai lea ia te ia o le agelu mai le lagi, ua faamalosi ia te ia” (Luka 22:42–43).

Na auina mai e le Tama Faalelagi se agelu e faamalosia Lona Alo i Ona puapuaga. Ma o le a Ia faamalosia i tatou i lo tatou tuuatoatasi. I la’u misiona, sa auina mai ia i matou ni “agelu” i foliga o tagata o le uarota, o e na ofoina mai ia i matou ni palanikeke mafanafana, taelega, ma meaai i le taimi tonu lava sa sili ona taua ia te au.

O Iesu Keriso o loo fusiina se tamaitiiti

E Le o Tuulafoaiina Oe

O nisi taimi atonu e te lagonaina le tuuatoatasi lea e te lagona ai le tuulafoaiina, pe faagaloina, e le Atua. E Na te le’i tuulafoaiina oe. Ma e malamalama Iesu Keriso i ou lagona tuuatoatasi.

Ina ua mavae puapuaga o le Faaola i Ketesemane, sa faalataina o Ia e se tasi o Ana Aposetolo. Sa teena o ia e soo faamaoni ma uo. Ua faamalamalama mai e Elder Holland e faapea “o le a se taimi sili ona faigata i lenei malaga tuufua atoa i le Togiola [na oo mai] e faapea o le iuga o le tupuga mai i le faanoanoa matuia o le soloia mai le lagi ina ua alaga atu [le Faaola] i le tuuatoatasi silisili ’Lo’u Atua e, lo’u Atua e, se a le mea ua e tuulafoaiina ai a’u?’”³

Mo sina taimi i luga o le satauro, sa lagona ai e le Faaola le tuuatoatasi atoatoa lava.

Ae “sa lei tuulafoaiina e se Tama atoatoa Lona Alo i lena itula,” o le faamalamalama mai lea a Elder Holland. “Ioe, o lou lava talitonuga patino, i le galuega atoa a Keriso i le olaga nei atonu e lei sili atu ona latalata ai le Tama i Lona Alo nai lo nei toe taimi mafatia tele o puapuaga.”⁴

E pei lava ona le tuulafoaiina lava e le Tama Faalelagi le Faaola, o le a Ia le tuulafoaiina lava oe. Atonu e te le iloaina i taimi uma, ae e latalata mai o Ia ia te oe. Na te silafia ou faanoanoaga ma faafofoga i au tatalo. O loo i ai pea o Ia iina mo oe ma lima o loo faaloaloa mai (tagai Mosaea 16:12).

E Mafai Ona E Faatoilaloina le Tuueseeseina Faaleagaga

E ui e le tuulafoaiina lava i tatou e lo tatou Tama Faalelagi, ae o nisi taimi tatou te faia ai filifiliga e vavaeese ai i tatou mai ia te Ia ma Iesu Keriso mo se taimi. O lenei tuueseesega e mafai ona tatou lagona ai le matua tuuatoatasi. Ae e malamalama foi Iesu Keriso i lenei mea.

E lei tuulafoaiina lava e le Tama Faalelagi Lona Alo, ae sa Ia “vaeluaina puupuu mai ia Iesu le mafanafana o Lona Agaga, le lagolago o Lana mafutaga patino,” o le faamalamalama mai lea a Elder Holland. “O lenei Atalii atoatoa o le e lei tautala leaga lava pe lei faia foi se mea sese … e tatau ona iloa po o a ni lagona o tagata uma—o i tatou, uma lava—pe a tatou faia na agasala … ina ia aluese le Agaga Paia, ma tuua ai se tasi o lagona matuai le tuuatoatasi, ma le faavauvau, ma le leai o se faamoemoe.”⁵

E malamalama le Faaola i lagona o le tuuatoatasi pe a tatou agasala. Ona sa Ia tauaveina i Ona lava luga a tatou agasala, e le tatau ona tatou tuuatoatasi umi. E mafai ona tatou salamo ma toe latalata tasi atu i le Atua. E leo tuai lava.

A o tatou taumafai e tausi a tatou feagaiga, ua folafola mai ia i tatou ia maua pea Lona Agaga e faatasi ma i tatou. O lona uiga afai tatou te salamo i aso taitasi ma taumafai e filifili le mea sa’o, atonu tatou te lagonaina le tuuatoatasi, ae e le tuua lava na o i tatou.

E Malamalama le Faaola

Po o le a lava le mafuaaga e te tuuatoatasi ai pe o le a foi le tuuatoatasi e te ono lagonaina, ia iloa e malamalama le Faaola. Ua Ia oo i le tuuatoatasi silisili i le taimi o le mafatiaga aupito silisili e lei iloa lava e se tasi.

“Ua ou togitogia oe i luga o alofilima o o‘u lima,” ua Ia fetalai mai ai. “O ou pa ua i ai pea i o’u luma” (1 Nifae 21:16). Na te silafia lou tuaatoatasi. Na te silafia oe. Ona o Lana taulaga togiola, e le tatau ai ona tuua na o oe.