Fesili ma Tali

“E mafai faapefea ona ou maua ni uo o le a fesoasoani foi ia te a’u e ola i le talalelei?”

“Ina ia maua ni au uo e ola i tulaga faatonuina maualuluga, o e tutu atu mo le mama ma le amiolelei, o e e faamaoni ma tuuto i a latou feagaiga, e tatau ona avea oe ma se tagata faapena ia i latou.”

Elder Ronald A. Rasband o le Korama a Aposetolo e Toasefululua, “Faauoga Moni,” New Era, Oke. 2016, 5.

Tatalo ma Saili

“Muamua, tatalo. O le ole atu i le Tama Faalelagi mo se fesoasoani o se laasaga lelei muamua lea i taimi uma. O le isi, tuu oe lava i nofoaga e faaalu ai e tagata lelei o latou taimi. A e i ai i nofoaga faagaeetia, o le a e feiloai i tagata lelei. Ma le mea mulimuli, ia talanoa sao atu i ituaiga o tagata eseese. E te le iloa lava po o ai o loo faapolopoloina e le Tama Faalelagi mo oe e te feiloai i ai.”

Tate N., 14, Karolaina i Saute, ISA

Faasoa atu le alofa o le Atua

“E mafai ona e amata i le taulimaina o isi i le ala e te manao e taulimaina ai oe. Fesoasoani ia latou ola i le talalelei ma lagona le alofa o le Faaola. O lau faatosinaga e mafai ona fesoasoani ia i latou e faia lea lava mea e tasi mo oe.”

Sadie M., 13, Iuta, ISA

E Faamaai e le Uamea i le Uamea

“Ia ola faamaoni i taimi uma i ou tulaga faatonuina, ma o tagata sa’o o le a tosina atu ia te oe. Afai e le ola au uo i tulaga faatonuina e pei o oe, ia manatua e mafai ona avea oe ma se faataitaiga faaKeriso ia i latou. ’E maamaai le uamea i le uamea; e faapea foi ona faamafanafana o le tagata i lana uo’ (Faataoto 27:17).”

Clark H., 16, Iuta, ISA

Valaaulia ma Ia Lototele

“O le valaauliaina o tagata e taaalo i taaloga ma meaai ua fesoasoani ia te au e faia ai ni uo fou. Ou te talanoa foi i tagata i siva a le Ekalesia. Ou te matamuli laitiiti, o lea e masani lava ona ou pipii ai i la’u vaega, ae ou te fiafia sa ou filifili ia maua le lototele e feiloai ai i tagata fou, e tusa lava pe faaleseki i nisi taimi.

Hannah P., 14, Hawaii, ISA

Fai le Laasaga Muamua

“Fai le laasaga muamua ma fai atu ’malo’ i se tasi. E mafai ona e valaaulia i latou i lou fale. O nisi taimi ou te tatalo ai, ma e fesoasoani ou te mautinoa atili ai pe a latou le fai mai ioe.”

Anaya P., 12, Hawaii, ISA

Saili mo le Fiafia

“E tatau ona tatou vaai atu i tulaga faatonuina o le Ekalesia. Ia faauo ma i latou o loo mulimuli i le Atua. Vaavaai mo isi o e fiafia ma taumafai e ola i le talalelei.”

Amelie P., 14, Pasila

Ia Talanoa sao e uiga i Ou Talitonuga

“E tele ina fesiitai soo lo’u aiga, o lea ou te iloa ai le faigata ona maua ni uo fou—aemaise lava uo e mafai ona fesoasoani ia te au e ola i le talalelei. Ua ou aoao e talanoa sao i mea ou te talitonu i ai. Faailoa atu i isi po o ai oe ma le mea o loo e tu ai. O tagata e te fesootai i ai atonu e le o ni tagata o le Ekalesia, ae e mafai lava ona avea i latou ma ni uo lelei.”

Sophia N., 15, Filipaina

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“E le’i leva atu talu ona maliu lo’u tamā. E faapefea ona ou toe lagonaina le fiafia? O ia o la’u uo mamae.”

Auina mai lau tali ma lou ata ae le‘i oo i le aso 15 o Iulai, 2023.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.