“O Le Faatauemu e Le Mafai Lava Ona Suia le Upumoni,” Mo le Malosi o le Autalavou, Iuni 2023.
O Le Faatauemu e Le Mafai Lava Ona Suia le Upumoni
E mafai ona e tu atu mo le mea moni e tusa lava pe ulagia oe e tagata.
Ata na tusia e David Klug
Ua tatou ola i se taimi ua tele ma tele atu tagata e tauemu ia Iesu Keriso, Ana aoaoga, ma Ona soo.
O le faatauemu o lona uiga o le taufaifai, taufaalili, po o le faaita. E le faigofie le tauemuina, ae o le auala e te tali atu ai e faia ai le eseesega uma.
Mulimuli i le Faataitaiga a le Faaola
O le Faaola o le faataitaiga atoatoa lea o le auala e tali atu ai i le faatauemu. Sa Ia onosaia tauemuga a i latou o e sa le talitonu ia te Ia. Ae o a latou tauemuga e le mafai lava ona suia le upumoni: O Ia o le Alo o le Atua ma sa faia le finagalo o Lona Tama. Sa tu atu ma le lototoa Iesu mo le upumoni. E mafai ona Ia fesoasoani ia te oe ia faia foi faapea.
Tu Atu mo le Upumoni
A e i ai i se tulaga e mafai ai ona e puipuia Iesu Keriso ma Lana Ekalesia, aua e te sola ese mai ai. O lena mea e mafai ona taitai atu ai i le faanoanoa ona ua e misia se avanoa e faamanuia ai isi i upumoni e faavavau ma lē masuia e tatau ona iloa e le lalolagi.
O le tu atu mo le upumoni e le faigofie i taimi uma, aemaise lava pe a tauemuina ai oe. E mafai ona tupu lenei mea i le aoga, i le galuega, ma uo, po o aiga foi.
Sa tauemuina Iesu, ua tauemuina perofeta, ma e toatele isi ua tauemuina ona o le puipuia o le upumoni. Atonu e le lelei pe a faatauemu isi ia te oe, ae o le puipuia o le upumoni o le mea sa’o lava lea e fai, aua o le faatauemu e le mafai lava ona suia ai le upumoni.