“Tumau i le Alofa o le Faaola,” Mo le Malosi o le Autalavou, Iuni 2023.
Upu Faaiu
Tumau i le Alofa o le Faaola
Mai se lauga o le konafesi aoao o Oketopa 2016.
Sa fetalai mai Iesu:
“Faapei ona alofa mai o le Tama ia te au, e faapea lava ona ou alofa atu ia te outou; ia tumau pea outou i lo’u alofa.”
Ata na tusia e Jarom Vogel
“Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa” (Ioane 15:9–10).
O le “faaauau pea i le” po o le “tumau i le” alofa o le Faaola o lona uiga ia maua Lona alofa tunoa ma ia faaatoatoa ai. Ina ia maua Lona alofa tunoa, e tatau ona tatou maua le faatuatua ia Iesu Keriso ma tausi Ana poloaiga, e aofia ai le salamo i a tatou agasala, papatisoina mo le faamagaloga o agasala, taliaina o le Agaga Paia, ma le faaauau pea i le ala o le usiusitai.
Sa faaali mai e Iesu, ina ia togiola mo a tatou agasala ma faaola i tatou mai le oti, faaletino ma faaleagaga, o Ona mafatiaga—le faaaliga pito sili o Lona alofa—na oo ai ia te Ia lava, “o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga” (Mataupu Faavae ma Feagaiga 19:18). O Ona tiga i Ketesemane ma luga o le satauro sa sili atu i lo tiga e mafai e se tagata ona lavatia. Ae ui i lea, ona o Lona alofa mo Lona Tama ma mo i tatou, sa Ia tumau ai ma ua mafai ai ona Ia ofoina mai ia i tatou le tino ola pea ma le ola e faavavau.
E maeu lenei meaalofa taua o le alofa paia!
E te le alofa ea ia te Ia o lē na muai alofa ia te oe? (tagai 1 Ioane 4:19)? Tausi la Ana poloaiga. E le avea ea oe ma se uo ia te Ia o lē na foai mai Lona ola mo Ana uo? (tagai i le Ioane 15:13)? Tausi la Ana poloaiga. E te le tumau ea i Lona alofa ma maua mea uma ua Ia ofo maia ma le alofa tunoa ia te oe? Tausi la Ana poloaiga. Ou te tatalo o le a tatou lagonaina ma tumau atoatoa i Lona alofa.