“Eu le Ki!” Mo Le Malosi o le Autalavou, Iuni 2023.
Eu le Ki!
O loo i ai se malosiaga faaleoleo e mafai ona e valaau atu i ai pe a e lagona le gaogao, tuuatoatasi, po o le leiloa.
Ata na tusia e Dean Macadam
I le taimi o la’u taumafanafana mulimuli e lua o le aoga maualuga, sa auina atu ai a’u e o’u matua ou te faigaluega mo le uso o lo’u tamā i Idaho. Sa ia faagaoioia le Budge’s Golden Sunshine Honey, o se pisinisi faaleaiga na amataina e lo’u tamamatua.
Sa iloa e lo’u tamā le mea sa ou manao i ai. Sa tuputupu ae o ia “ma galue i lagomeli.” Sa manao o ia ia ou aoao pe faapefea ona galue e pei ona sa ia faia. Sa faigata le galuega, ma sa itiiti ni penefiti, sei vagana ai le tasi: mai lea taimi i lea taimi, sa tuu mai ai e le uso o lo’u tamā ou te tietie i lana uila afi.
I se tasi aso, sa ou filifili ai ou te alu mo se tietiega. O lagi lanumoana, o le la susulu, ma le agi mai o le matagi i lo’u lauulu sa faagaeetia! Mo sina taimi, o itula uumi uma o galuega faigata na foliga mai e matua aoga lava. Na faafuasei lava, ona tu le uila afi. Sa uma le kesi i le ogatotonu o se nofoaga tuufua! Na tupu lenei mea a o lei i ai ni telefoni feaveai, o lea sa tuua toatasi ai au.
Sa ou manatu o le a le fiafia le uso o lo’u tamā pe afai ou te lafoaia le uila afi ma toe savali atu i le taulaga, o lea sa ou filifili ai e tulei le uila afi i le fale. Ua leva na pogisa i le taimi na ou taunuu ai i le taulaga. Sa tapuni le pamu kesi. Sa ou fia inu, fiaai, ma vaivai.
A o ou tuleiina le uila afi i le taulaga, sa ou vaaia le loli a le uso o lo’u tamā o paka i fafo o le fale tifaga. Sa ou mauaina o ia ma ta’u atu ia te ia le mea na tupu. Sa faateia a’u i lana tali.
“E mafai faapefea ona uma lau kesi?” na ia fesili mai ai.
Sa savali atu o ia i le uila afi ma eu se ki. Ona ia kiina lea o le ki ma kiki i lalo le vae e ola ai. I lo’u te’i, sa ola leotele le afi!
“Na faapefea ona e faia lena mea?” Sa ou fesili atu ai.
“O loo i ai se tane faaleoleo nei uma lau kesi,” o lana tala lea. “Pau le mea e tatau ona e faia o le eu o le ki.”
I le maasiasi ma le toilalo, sa ou tietie atu ai i le fale i le uila afi.
O Le Faataoto i le Uila Afi
E masani ona ou mafaufau e uiga i lo’u aafiaga i le uila afi. I le aluga o tausaga, ua avea ai e pei o se faataoto ia te au.
I lenei olaga, “e uma a tatou kesi,” tautala ai faaleagaga. Tatou te mananao e faalagolago ia tatou lava punaoa ma le malosi e foia ai o tatou faafitauli. O nisi taimi tatou te oo i ai i faafitauli, ae ua tatou maasiasi tele e fesili atu mo se fesoasoani. Ae i le faaleagaga, e pei lava o le taumafai e savali i le fale ma le uila afi e aunoa ma se fesoasoani. Tatou te le o iloa o loo i ai se ki e mafai ona maua ai le mana.
Nai lo le taumafai e tulei la tatou “uila afi” i lalo o lo tatou lava malosi, e tatau ona tatou “eu le ki” ma maua le punavai sili o le mana i lenei olaga: o le mana togiola a Iesu Keriso. Ina ia maua Lona mana, e manaomia ona tatou o mai ia te Ia ma se loto momomo ma le agaga salamo, ia salamo, ma talitonu (tagai 2 Nifae 2:7; Alema 26:35). E ala i le Togiola a Iesu Keriso, e mafai ai ona tatou eu le ki faaleagaga lea e tuuina mai ia i tatou le mana tatou te manaomia e toe foi atu ai i lo tatou aiga faalelagi.1
E i ai lava o Ia iina i taimi uma.
Afai ua tatou afaina i le agasala, ua faamanino mai e le Alii e tatau ona tatou “salamo pe mafatia” (Mataupu Faavae ma Feagaiga 19:4). Ua Ia aioi mai ia i tatou ia talia Lana taulaga togiola. “O A’u, o le Atua, na puapuagatia i nei mea mo tagata uma,” ua Ia fetalai mai ai ia i tatou, “ina ia latou le mafatia pe afai latou te salamo” (Mataupu Faavae ma Feagaiga 19:16).
O nisi taimi o lo tatou salamo e ono manaomia ai ni “lipea” loloto ma le fesoasoani a se “enisinia faaleagaga” e pei o se matua po o se epikopo. Ae e tatau lava ona tatou valaau atu i le Alii i taimi uma. E maoae Lona olioli pe a tatou salamo (tagai Mataupu Faavae ma Feagaiga 18:13).
Ou te molimau atu o loo i ai Iesu Keriso iina e fesoasoani ia i tatou i taimi uma ma i nofoaga uma. Tatou te le tau faalagolago i lo tatou lava malosi. Pe a tatou valaau atu ia te Ia ma tausi Ana poloaiga, o le a Ia taitai lemu i tatou “mai le pouliuli i le ao.” 2 E tusa lava pe tatou te lagonaina le gaogao, tuuatoatasi, ma le leiloa, e mafai lava ona tatou “eu le ki” ma maua ai le malosi ma le taitaiga faafouina.