O Nofoaga mai Tusitusiga Paia

Ketesemane

Aoao atili e uiga i le nofoaga na amata ai puapuaga o le Faaola mo i tatou.

toga olive

O Fea e I Ai?

I le malifa o le Mauga o Olive, i le itu i sasae o Ierusalema.

faafanua o Ierusalema anamua

Ata o le faafanua o Ierusalema na tusia e Jim Madsen

O Le A Le Mea Na i ai Iina?

O se togavao o laau olive ma atonu o se fale e oomi ai olive mo le mauaina o le suauu mai olive.

soliga olive

O Le A Le Mea Na Tupu Iinei?

Ina ua maea le Tausamaaga Mulimuli, sa afio atu Iesu Keriso ma le toasefulutasi o Ana Aposetolo i Ketesemane. Ona Ia afio ese lea e tatalo ma ave Peteru, Iakopo, ma Ioane faatasi ma Ia.

Ona “matautuia lea o ia ma atuatuvale.” Na Ia fetalai ai, ‘Ua matua tiga lava lo’u loto e oo i le oti’ (Mareko 14:33-34).

Na Ia tatalo, “Lo’u Tama e, a e finagalo i ai, ia e ave ese lenei ipu ia te au; a e aua le faia lo’u loto, a o lou finagalo.

“Ona faaali mai ai lea ia te ia o le agelu mai le lagi, ua faamalosi ia te ia.

“Ua puapuaga o ia, ua atili ai lana tatalo; o lona afu foi ua pei o alualu toto ua pau ifo i le eleele” (Luka 22:43–44).

Ina ua mavae lea mafatiaga tele e le Faaola, sa faalataina o Ia e Iuta ma puefaapagotaina e taitai Iutaia ma se vaega o fitafita Roma.

Na E Iloaina?

O lenei togalaau i le Mauga o Olive o se nofoaga sa tele ina afio i ai Iesu (tagai Luka 22:39; Ioane 18:2).

“I le faa-Aramaika, o le upu ketesemane o lona uiga o le ‘soliga olive.’”¹

Pe a olopalaina muamua olive i se soliga olive, o le suauu e tafe mai e mumu, e pei o le toto.

I le taimi o le Faaola, o le gaosiga o le suauu olive o se faagasologa o le faateleina o le mamafa i laasaga taitasi ina ia mafai ai ona oomi mai le tele o le suauu i le mea e mafai ai:

1. Oomi olive i lalo o se maa tele.

2. Tuu olive ua olopalaina i totonu o ato lalaga, ma faaputu ato e tuu le tasi i luga o le isi.

3. Tuu se laau faalava lapoa po o se ogalaau i luga o ato ua faaputu.

4. Faapipii ni maa i le pito e tasi o le laau faalava.²

Sa faaaoga le suauu olive anamua mo suauu o le lamepa, suauu e faaaoga i kuka, meaai, fasimoli, sauniga faalelotu, ma le uu mo le togafitia o manu‘a.

I le tele o tausaga a o lei afio mai Keriso, sa ta‘u atu ai e se agelu i le Tupu o Peniamina e uiga i mafatiaga o Keriso i Ketesemane, ma faapea atu, “E sau le toto mai ona pu afu uma, ona o le a tele naua o lona mafatia” (Mosaea 3:7).

O puapuaga o le Faaola mo i tatou e aofia ai Lona puapuagatia i Ketesemane ma luga o le satauro, lea na Ia maliu ai. Na Ia tauaveina i Ona lava luga a tatou agasala uma, tiga, puapuaga, faaosoosoga, ma’i, ma vaivaiga (tagai Alema 7:11–12).

O Iesu Keriso i Ketesemane

Ketesemane, na saunia e Michael Malm

Manatua Ketesemane

“Ia manatua, e pei lava o le tino o le olive, lea sa oomiina mo le suauu na aumaia le malamalama, o lea na faapea foi ona oomia ai le Faaola. Mai pu afu uma na puna mai ai le toto ola o lo tatou Togiola. A taumasuasua lau ipu o le olioli, ia manatua Lana ipuoona lea na mafai ai. Ma a oo mai tofotofoga tiga i o outou luga, ia manatua Ketesemane.

Peresitene Russell M. Nelson, “Why This Holy Land?” Ensign, Tes. 1989, 18.

Faamatalaga

1. Taiala i Tusitusiga Paia, “Ketesemane.”

2. Tagai D. Todd Christofferson, konafesi aoao Oke. 2016 (Ensign po o le Liahona, Nov. 2016, 50).