“O Lau Togalaau o Avanoa,” Mo Le Malosi o le Autalavou, Iuni 2023.
O Lau Togalaau o Avanoa
O mea e te totoina e avea ai oe.
Ata na tusia e Katy Dockrill
O faataoto i tusitusiga paia ma laau toto e o faatasi e pei o le sukalati ma pata pinati. (Po o le siamu ma le paagugu, pe a e manao ai. Pe atonu foi o matagi ma maua, po o matafaga ma faleoneone?)
O loo ia te oe le faataoto i le lulu saito (tagai Luka 8), o le talafaatusa o laau o le olive fanua ma le olive vao (tagai Iakopo 5), ma le talafaatusa o le faatuatua o loo tuputupu ae e pei o se fatu laau (tagai Alema 32). O loo i ai le faataoto i le fatu o le sinapi (tagai Mataio 13), o le fatu na ola faalilolilo (tagai Mareko 4), ma le au faigaluega i le tovine (tagai Mataio 20). E tele naua faataoto.
Ioe, e i ai pea le avanoa mo se isi faataoto e tasi o laau, a ea? Sei o tatou faatusatusaina le faaolaina o se togalaau i le faatupulaia o auala autu e tolu mo le auala e te faaaogaina ai ala o faasalalauga.
Auala 1: Filifili ma le Loto i ai
I se togalaau moni lava, e tusa lava pe e te manao e toto na o tamato, e tele atu ituaiga nai lo le mea e mafai ona e faamoemoe e toto i lou olaga atoa. Ma, ioe, e mafai ona e toto se afe o isi fualaau faisua, fualaau suamalie, fualaau aina, po o fugalaau. O avanoa e toeitiiti lava leai se iuga.
Ae e oo lava i lena aofaiga o filifiliga e le latalata i le aofaiga o filifiliga o loo feagai ma oe ma ala o faasalalauga. Ua leva ona mavae aso na ta’u atu ai e ou matua matutua ia te oe e uiga i le taimi e tatau ai ona latou mimilo se ki o le televise po o se ki o le leitio e sue ai se tasi o le aofaiga faatapulaa o alaleo o loo avanoa. Ua toetoe lava a leai se tapulaa i au filifiliga i televise, faasalalauga faaagafesootai, faasalalauga i le initoneti, ma isi mea—o se taumafataga moni lava o avanoa.
Na aoao mai Peresitene Dallin H. Oaks, Fesoasoani Muamua i le Au Peresitene Sili: “E lelei le vaai atu i faafiafiaga lelei po o le mauaina o faamatalaga malie. Ae le o mea uma o lena ituaiga e aoga i le vaega o lo tatou olaga tatou te faaaluina ina ia maua ai. O nisi mea e lelei tele, ae o isi e silisili ona lelei.”1
E pei lava ona tatau ona e filifili po o le a le mea e toto i le eleele, e amata au fuafuaga o ala o faasalalauga i le faia o filifiliga fuafuaina po o fea e faaalu ai lou taimi. Aua nei faafuasei ona faatagaina ni itula e faasolosolo i luga o ala o faasalalauga. O lou taimi e taua! Faaaoga i filifiliga sili ona lelei.
Auala 2: Fui Mea e Te Manao e Ola
E faigata ona vaai faalemafaufau i se tasi o filifili e tausia se vaega o le akone oona po o le laau matuitui. Ua tumu le lalolagi i vao e mafai ona faatamaia ai i tatou, e pei lava ona tele ituaiga o ala o faasalalauga leaga. O ponokalafi o se tasi o na vao, ae e le na o le pau lea.
Ina ia leai ni vao i se togalaau, e lua auala lautele e aoga. O le mea muamua o le mea lea e masani ona tatou mafaufau soo i ai: vele ese vao mai le eleele. Faatasi ai ma ponokalafi po o isi ala o faasalalauga le lelei, o le mea e talitutusa lava o le tuu lea o ni puipuiga ina ia taofi ai lou vaai po o le faaaogaina o na ala o faasalalauga.
Ae e i ai se fofo lona lua, e itiiti le talanoa e uiga i ai lea e mafai ma e tatau ona faaaoga faatasi ma le veleina o vao: fui ma faafailele laau lelei . I se togalaau, afai e te tuuina le malosi i laau lelei e te manao e ola, e mafai ona latou lauolaola ma suia laau e le manaomia i le aluga o taimi. Ua amata ona tauivi ia vao leaga mo le vai ma le susulu o le la a o lofituina e laau manaomia o loo e faafaileleina.
E tutusa lava le moni ma mausa leaga o ala o faasalalauga. A o e iloiloina au filifiliga o ala o faasalalauga, saili ni filifiliga lelei o ala o faasalalauga—musika faagaeetia, faasalalauga lelei, vitio faamalosiau—ia e mafai ona fesoasoani e faatoilalo filifiliga e le manaomia.
Afai e te manaomia ni faaiteite i le auala e filifili ai na filifiliga lelei o ala o faasalalauga, ua faamanatu mai e Peresitene Oaks ia i tatou e faapea “e tatau ona tatou lafoai nisi o mea lelei ina ia filifili ai isi e lelei atu pe silisili ona lelei aua latou te atiina ae le faatuatua i le Alii o Iesu Keriso ma faamalolosia o tatou aiga.”2
Auala 3: Ia Magoto ma Loloto Aa a o lei Oo mai le Vevela
O nisi vaitau i le olaga e foliga mai e folau faatasi e aunoa ma le tele o taumafaiga i lau vaega. I taimi faapena atonu e te lagona e pei o loo agai atu mea uma ia te oe, e aunoa ma ni tauiviga po o ni faafitauli tetele. Mo laau, o se taimi faapea o le taimi o le tautotogo.
E faaaoga ma le atamai e laau nei taimi lelei. Nai lo le faafaigofieina, e magoto ifo o latou aa i le eleele ina ia puipuia i latou pe a oo mai le la aasa o le taumafanafana.
Faatasi ai ma au lava fuafuaga o ala o faasalalauga, mafaufau i se auala talitutusa. Faamoemoe e atiina ae ni mausa lelei o ala o faasalalauga (aemaise lava o mausa faagaeetia faaleagaga e pei o le suesueina o tusitusiga paia) a o lei taitai oo mai taimi o le atuatuvale po o tofotofoga. Ma, pe a oo mai na taimi, o le a fesoasoani au mausa lelei ia te oe e ola ai.
Na faapea mai Peresitene Henry B. Eyring, Fesoasoani Lua i le Au Peresitene Sili: “O le mea o le a tatou manaomia i o tatou aso o tofotofoga o se sauniuniga faaleagaga.”3 O se tasi o vaega o na sauniuniga faaleagaga o le faaleleia lea o au mausa o ala o faasalalauga ina ia e maua le Agaga e te utuvai mai ai pe a oo mai taimi faigata.
O le faaopoopoina o nei auala i au filifiliga o ala o faasalalauga e ono manaomia ai sina taumafaiga faaopoopo, aemaise lava i le taimi muamua, ae o lau seleselega o le a aoga!