“O Le Lotogatasi o Le Matou Sini Lea,” Mo le Malosi o le Autalavou, Iuni 2023.
O leLotogatasi o Le Matou SiniLea
E tulaga ese uma Tia ma Alice. Ae o o la faanaunauga silisili e tutusa—ia tasi ma Keriso.
Ata na pueina e Richard M. Romney
Faatasi ai ma se saoasaoa e pei o se roketi e maualalo le lele, ua ii atu ai le polo soka (lakapi) i le tulimanu o le upega. Ae ua saunia le puipui mai. I le taulai atoa atu i ai, ua oso atu ai Tia J. i le taimi mulimuli e mafai ai. Ua ia osofaia le roketi (aa, le polo) i le ea.
I se isi malae lata ane, o loo osofai ai Alice J. Ua ia pasi atu le polo i se tasi o le au, lea ua toe pasi atua. Ua kiki atu Alice. Ua pasia e le polo ia lima faaloaloa o le puipui. Ai!
Tutusa ae Ese
O le auuso o Tia, 16, ma Alice, 15, e fiafia i le soka. Ae o le soka ua na o se tasi lea o le tele o mea la te tutusa ai. La te fiafia i ituaiga uma o taaloga. E fiafia i la’ua i musika. Sa la fananau uma i Saina ma vaetamaina e le aiga lava e tasi i Idaho, ISA. Sa toeitiiti atoa le tausaga la te va ai, o lea la mo le lua vaiaso i le tausaga e “tutusa” ai o la tausaga. O Tia ma Alice e taulimaina lelei luitau faaletino. La te alolofa uma i lo la aiga. Ma e fiafia uma i laua i le talalelei.
Ae e eseese foi i laua mai le tasi ma le isi. O Alice o loo i ai i se vasega i le aoga e tasi le tausaga i tua atu o Tia. I luga o le malae soka, e fiafia Tia i le puipuiga ae e fiafia Alice i le osofai. I musika, e taina e Tia le saxophone ma le clarinet, ae e ta e Alice le piano ma le percussion. Na sau Tia i totonu o le aiga i le lua tausaga ma manatua le taimi na vaetamaina mai ai Alice i le iva o ona tausaga. Sa fanau mai Tia ma se vaega o lona vae o loo misi. E savali o ia ma tamoe ma taalo soka e faaaoga ai se vae faapipii. Ma sa fanau mai Alice e leai ni ona putaliga. Ua faalogo o ia e faafetai ai i masini faalogo e taofia e maneta ua faapipii i totonu o lona atigipoo.
Fesoasoani le Tasi i le Isi
A o latou potopoto faatasi ma o la matua e suesue le Sau, Mulimuli Mai ia te A’u, e talanoa Tia ma Alice e uiga i mea e faamalosia ai i laua o ni uso ma mea e faamalosia ai lo latou aiga.
“O le i ai o se uso e latalata i lo’u matua e fesoasoani ia te a’u,” o le tala lea a Tia. “E i ai se tasi e malamalama teisi ia te au. O Alice o se tagata e faalogo lelei, ma o nisi taimi pau lena o le mea e te manaomia, o se tasi i le tulaga lava e tasi o le a faalogo. A avea foi lou uso ma au uo, e avea le fale o se nofoaga e sili atu ona lelei.”
“E ese le manaia o le i ai o se uso e latalata mai,” o le tala lea a Alice. “Na te fa’a’ataina au. Ma te fiafia e tausua soo. Ma te talanoa e uiga i taaloga, aoga, ma mea faapena. Ma o nisi taimi na te faia ai a’u meaai o le taeao. O ia o se kuka lelei.”
O Se Au Faaleaiga
“O lo’u tama o lo’u faiaoga i le soka,” o le tala lea a Tia. “Ae e malie lena mea aua o ia foi o lo’u ’faiaoga’ i le olaga. Ma e faapena foi Tina. Ou te matea ua avea ai Alice ma au ‘au i taaloga.”
O le mea moni, o le faatusatusaina o le aiga i se ‘au e sa’o i le tele o auala. “Matou te tatalo faatasi, matou te suesue faatasi i le talalelei, matou te o faatasi i le lotu,” o le tala lea a Alice. “E pei o se aoaoga faamasani. E i ai mea tou te faia faatasi e faamalosia ai oe lava ia ma o se ’au.
Ona i ai lea o mea e pei o loo i ai moni lava i le taaloga. Ua fai e Alice se lisi:
-
Filifili po o le a le mea sa’o
-
Auauna atu i isi
-
Taumafai ia avea e faapei o Iesu
-
Salamo
“O le talanoa e uiga i le talalelei e maoae,” o lana tala lea. “Ae e tatau foi ona e ola ai.”
“E pei foi o taaloga,” o le tala lea a Tia. “E ese le talanoa ai e uiga i le taaalo. E ese foi le i ai i fafo i le malae.”
Ina ia Tasi
E pei ona iloa e Tia ma Alice, o se tasi o vaega sili ona taua o se au maoae o le lotogatasi. E atiae e tagata taaalo taitoatasi ia tomai ma le malamalama, ae latou te faataitai ma taaalo faatasi. Ma e saofaga taitoatasi i le manuia o le ’au.
Peitai, pe a oo mai i le au a le aiga i le talalelei, e i ai se sini e sili atu ona maualuga: “Ia tasi” (Mataupu Faavae ma Feagaiga 38:27).
“E eseese tagata taitoatasi o lo matou aiga,” o le tala lea a Alice. “Ae a matou taulai atu i le mulimuli ia Iesu Keriso, ua i ai sa matou sini e tasi.”
Ma e moni lena mea mo le uso, aiga, vasega ma korama, uarota ma siteki, ma tagata uma i le Ekalesia. E pei lava o Tia ma Alice, o i tatou taitoatasi e tulaga ese mai le tasi ma le isi i se auala. Atonu e eseese o tatou talaaga, faapea foi a tatou meaalofa, taleni, mea e fiafia i ai, ma tofo i ai. Ae a o tatou o mai faatasi ma taumafai ia tasi ia Iesu Keriso, tatou te maua le malosi e ausia ai a tatou sini sili ona taua.