“Taulimaina o se Faafitauli o Ponokalafi,” Mo le Malosi o le Autalavou, Iuni 2023.
Ou Te Mafaia Mea Uma ia Keriso
Taulimaina o se Faafitauli o Ponokalafi
Ata mai faaaloaloga a Smith Alley
Na amata lava i se taumemumemu. O le a ta’u atu e lo’u tina ia te oe e manaia, ae o le a ou aioi atu e ese. O le aso muamua o le vasega muamua, na fai mai ai e le faiaoga ia i matou e tutu taitoatasi ma faailoa atu i matou lava. Ina ua oo i lo’u taimi, sa ou tu ma sa vave ona ou popole i luma o le toatele o tagata.
“T-t-t-talofa, o-o-o-o-o-o lou igoa o Samita.”
Sa ou maasiasi ona sa ou sese i luma o la’u vasega fou. Sa ou nofo i lalo, ma sa tilotilo mai se teineitiiti ia te au i ou mata (sa pei na tilotilo mai o ia i totonu o lo’u agaga) ma fai mai, “Aisea e le mafai ai ona e tautala lelei?”
O lena aso sa ou filifili ai sa ou ese ma, ona sa ou ese, sa ou le taua tele nai lo isi tagata uma.
I le aluga o taimi, sa atili ai ona leaga lo’u manatu ia te a’u lava. Ou te lei talitonu e mafai ona i ai ni au uo e popole moni ia te au. Ou te lei talitonu sa lava lo’u tagata e mitamita ai o’u matua. Ma i le iuga, ou te lei talitonu sa i ai se Atua na auina mai Lona Alo e maliu mo au.
I le iva o o’u tausaga sa ou aafia ai i ponokalafi i luga o le initoneti. Ou te lei alu e saili mea na ou vaaia. Ae ona sa ou talitonu ou te le taua, sa ou manatu afai ou te ta’u atu i ou matua, o le a laua maasiasi ia te au. O lenei mea na taitai lemu atu ai au i lalo o se ala o vaisu.
Ina ua 10 ou tausaga, sa ou alu i luga o ala o faasalalauga faaagafesootai, lea na tuuina mai ai ia te au ni auala se tele e maua ai ponokalafi. I le taimi lava lea e tasi, sa amata ai ona ou faatusatusaina lo’u olaga i olaga “atoatoa” sa ou vaaia i luga o ala o faasalalauga faaagafesootai. Sa ou vaai i faasoa o tagata i tafaoga po o le tafafao faatasi ma uo ae e lei valaauliaina au. Sa ou vaai i tagata o i ai nei tino “atoatoa”, ma ou te lei manatu ua lava le lelei o lo’u tino. Faatasi ai ma lenei taamilosaga o le ita o le tagata ia te ia lava ma vaisu, sa vave ona faavauvau lo’u olaga. I le 14 o o’u tausaga, sa ou fuafua ai e pule i lo’u lava ola.
I se aso sa ou lagonaina e pei ua masofasofa ai lo’u olaga, sa iloa e o’u matua e uiga i o’u tofotofoga ma taialaina a’u i le Faaola ma Lana Togiola. O se liua tele lea i lo’u olaga talavou. Sa ma feiloai ma lo’u epikopo, ma sa la tuuina mai ma lo’u tamā se faamanuiaga ia te a’u. O le taimi muamua lea i le ono tausaga na ou lagonaina ai le Agaga. Sa ou lagonaina le tino mai.
Taulai Atu i le Olioli, saunia e Michael Malm
E tele se taimi ma se taumafaiga, ae ona o lo’u Faaola, o Iesu Keriso, ua mafai ai ona ou salamo ma tuputupu ae malosi o se tagata. Ua ou vaai i vavega matagofie i lo’u olaga o se taunuuga tuusao o le mana faaola o le Togiola a Keriso.
Ua ou faaaluina nei lo’u taimi o se failauga lautele, malaga i le atunuu ma talanoa atu i vaega a le autalavou, aoga, ma nuu e uiga i aafiaga faataumaoi o ala o faasalalauga faaagafesootai ma ponokalafi. Ou te aoao atu e uiga i le taua o le soifua maloloina faalemafaufau ma le manaomia o le puipuiga mai le pule i le ola. Ua ou fausia se tulaga i luga o ala o faasalalauga faaagafesootai e mafai ona ou faaaogaina mo le lelei. Faatoa ou faauu i le aoga maualuga. Ua ou fausia ni pisinisi se lua ma ni sootaga malolosi ma i latou ou te alofa i ai. O le mea e sili ona taua, ua ou toe maua le Atua. E i ai sa’u molimau mautinoa i le Atua le Tama, Lona Alo, o Iesu Keriso, ma lo Laua mana ma le tosinaga.
E leai se mea o nei mea na tupu ona e i ai ni a’u taleni faapitoa po o ni tomai e le masani ai. E ala i le Togiola a Iesu Keriso, ua mafai ai ona ou salamo, faatoilalo luitau, ma maua le filemu ma le faamalologa. Afai e te manatu ua e matua mamao lava, o la’u tali ia te oe e faapea e te sese. Sa ou naunau e lolo atu i le mana togiola o Iesu Keriso. E te mafaia foi.
Smith Alley, Iuta, ISA