“O le Isi Tulaga,” Mo Le Malosi o le Autalavou, Iuni 2023.
O Le Isi Tulaga
E te manao i se isi laasaga i lau suesuega o le talalelei? Faataitai le motugaafa lenei.
Ata na tusia e Emily Jones
I taaloga vitio, e te “siitia atu i le isi tulaga” pe a e faatoilaloina se tasi o tulaga o se taaloga ma agai atu i le isi tulaga O lenei mea e mafai ona aumaia ai se lagona o le ausiaina. Tau lava o le mafaufau i le faamalieina o lagona o le oo atu i le isi tulaga i se mea e sili atu ona taua—e pei o lou malamalama i le talalelei.
O se tasi lenei o motugaafa e fesoasoani ia te oe e “faagatusa” i lau suesuega o le talalelei: alu i se tulaga e loloto atu.
O Le Mana o Faatusa Faigofie
A o e faitau i tusitusiga paia ma mafaufau e uiga i mea faaleagaga, o se tasi o auala e alu ai i se tulaga loloto atu o le vaavaai lea mo faatusa.
O faatusa o ni mea faigofie (ata, lanu, mea faitino, faatinoga, taga) e faamanatu mai ai ia i tatou isi mea e sili atu ona faigata (manatu, aoaoga, mataupu faavae). Latou te fesoasoani ia i tatou e vave fesootai ma aoao atili ai.
Ua i ai faatusa o le talalelei talu mai le amataga. Na ta’u atu e le Alii ia Atamu, “Ua i ai i mea uma o latou foliga, ma ua foafoaina mea uma ma faia e molimau ia te a’u” (Mose 6:63). O lea la, e faaaoga e le Alii ia faatusa e fesoasoani ia i tatou e aoao ai e uiga ia te Ia ma Lana talalelei.
O se faataitaiga se tasi lea.
Vaai i Faatusa
A o e suesue i le talalelei, e mafai ona e maua faatusa o le a fesoasoani ia te oe e aoao ai. O ni nai auala nei e mafai ona e vaai ai ma malamalama gofie i ai.
-
Vaavaai mo tala, faataoto, miti, ma faaaliga vaaia. O nei mea o le a tele ina i ai ni faatusa i totonu.
-
Siaki e vaai pe o faamatala mai faatusa i tusitusiga paia. Ua aoao atu e le Faaola le faataoto i le lulu saito. Na maua e Nifae se faaaliga vaaia e faamalamalama ai le miti a lona tama i le laau o le ola. E mafai foi ona e maua se faamalamalamaga i le Taiala i Tusitusiga Paia po o le Bible Dictionary (scriptures.ChurchofJesusChrist.org).
-
Vaavaai mo ata, mea faitino, po o faatinoga. Afai e i ai ni ata, mea faitino, po o ni faatinoga i le totonugalemu o se mea (e pei o le falaoa ma le vai i le faamanatuga po o le faatofuina i le vai i le papatisoga), mafaufau po o a na mea, mea latou te faia, pe faapefea ona faaaoga, mea latou te foliga i ai, ma isi mea faapena. O lena mea e mafai ona taitai atu ai i nisi malamalamaaga.
-
Matau pe a oo mai mea lava na e tasi i nofoaga eseese. O laau, vai, falaoa, mamoe, vaa, malaga—e tele mea o loo i ai i ni nofoaga eseese i tusitusiga paia. Ia matau, ma e mafai ona e faia nisi fesootaiga.
Ua na o se amataga lenei. A o e agai atu i se tulaga loloto atu, atonu e amata ona e lagona ua e “faalaugatasia” i lau suesuega o le talalelei. Ioe, o le aoaoina sili ona taua o le a oo mai e ala i le Agaga Paia, o le a taialaina oe ma molimau atu ia te oe a o e faaaluina le taimi ma taumafaiga i mea faaleagaga.