“He ʻIkai Lava ʻe he Manukí ʻo Liliu ʻa e Moʻoní,” Ki Hono Fakamālohia ʻo e Toʻu Tupú, Sune 2023.
He ʻIkai Lava ʻe he Manukí ʻo Liliu ʻa e Moʻoní
Te ke lava ʻo taukaveʻi ʻa e meʻa ʻoku moʻoní neongo kapau ʻe fakakata ʻaki koe ʻe he kakaí.
Tā fakatātaaʻi ʻe David Klug
ʻOku tau moʻui ʻi ha kuonga ʻoku fakaʻau ke tokolahi ange e kakai ʻoku nau manukiʻi ʻa Sīsū Kalaisi, ʻEne ngaahi akonakí, mo Hono kau muimuí.
ʻOku ʻuhinga ʻa e manukí ke fakaangaʻi, fakakata ʻaki, pe fakamataliliʻi. ʻOku ʻikai faingofua ke manukia kita], ka ʻoku hoko ha meʻa mahuʻinga ʻi he anga hoʻo fakafeangaí.
Muimui ‘i he Sīpinga ʻa e Fakamoʻuí
Ko e Fakamoʻuí ʻa e sīpinga haohaoa ʻo e founga ki hono tali ʻo e manukí. Naʻá Ne kātekina ʻa e manuki ʻa kinautolu naʻe ʻikai tui kiate Iá. Ka naʻe ʻikai lava ʻe heʻenau manukí ʻo liliu ʻa e moʻoní: Ko e ʻAlo Ia ʻo e ʻOtuá pea naʻá Ne fakahoko e finangalo ʻo ʻEne Tamaí. Naʻe taukaveʻi lototoʻa ʻe Sīsū ʻa e moʻoní. Pea te Ne lava foki ʻo tokoniʻi koe ke fai e meʻa tatau.
Taukaveʻi ʻa e Moʻoní
ʻI he taimi ʻokú ke ʻi ha tūkunga ai te ke lava ʻo taukaveʻi ʻa Sīsū Kalaisi mo Hono Siasí, ʻoua naʻá ke hola mei ai. ʻE lava ke iku ia ki ha fakaʻiseʻisa koeʻuhí kuo mole meiate koe ha faingamālie ke tāpuekina e niʻihi kehé ʻaki e ngaahi moʻoni taʻengata mo taʻefeliliuaki ʻoku fie maʻu ke ʻilo ʻe he māmaní.
ʻOku ʻikai faingofua maʻu pē hono taukaveʻi e moʻoní, tautautefito ki he taimi ʻoku manukiʻi ai koé. ʻE lava ke hoko ʻeni ʻi he akó, ʻi he ngāué, ngaahi kaungāmeʻá, pe naʻa mo e fāmilí.
Naʻe manukiʻi ʻa Sīsū, ʻoku manukia e kau palōfitá, pea manukia ha niʻihi tokolahi ʻi hono taukaveʻi e moʻoní. Mahalo ʻe taʻe fakafiemālie ʻi he taimi ʻoku manukiʻi ai koe ʻe he niʻihi kehé, ka ko e meʻa totonu ke faí ʻa hono taukaveʻi maʻu pē ʻa e moʻoní, koeʻuhí he ʻikai lava ʻe he manukí ʻo liliu ʻa e moʻoní.