“Te u maʻu fēfē ha ngaahi kaungāmeʻa te nau tokoniʻi foki au ke u moʻui ʻaki ʻa e ongoongoleleí?,” Ki Hono Fakamālohia ʻo e Toʻu Tupú, Sune 2023.
Ngaahi Fehuʻí mo e Talí
“Te u maʻu fēfē ha ngaahi kaungāmeʻa te nau tokoniʻi foki au ke u moʻui ʻaki e ongoongoleleí?”
Lotu mo Fekumi
“ʻUluakí, lotu. Ko e ʻuluaki sitepu lelei maʻu pē ʻa e kole tokoni mei he Tamai Hēvaní. Hokó, ʻalu ki he ngaahi feituʻu ʻoku fakaʻaongaʻi ai ʻe he kakai leleí honau taimí. ʻI hoʻo ʻi he ngaahi feituʻu langaki moʻuí, te ke feʻiloaki ai mo ha kakai lelei. Fakaʻosí, ʻai ke ke ʻiloʻi e faʻahinga kehekehe ʻo e kakaí. ʻOku ʻikai te ke teitei ʻiloʻi pe ko hai kuo teuteu ʻe he Tamai Hēvaní ke mou fetaulakí.”
Tate N., taʻu 14, Kalolaina Saute, USA
Vahevahe ʻa e ʻOfa ʻa e ʻOtuá
“Te ke lava ʻo kamata ʻaki haʻo fakafeangai ki he niʻihi kehé ʻi he founga ʻokú ke loto ke fai kiate koé. Tokoniʻi kinautolu ke nau moʻui ʻaki e ongoongoleleí mo ongoʻi e ʻofa ʻa e Fakamoʻuí. ʻE lava ke tokoniʻi kinautolu ʻe hoʻo tākiekiná ke nau fai ʻa e meʻa tatau maʻau.”
Sati M., 13, ʻIutā, USA
Fakamāsila ʻe he Ukamea ʻa e Ukamea
“Tauhi maʻu pē ki hoʻo ngaahi tuʻunga moʻuí, pea ʻe tohoakiʻi atu ʻa e kakai totonú kiate koe. Kapau ʻoku ʻikai ke moʻui ʻaki ʻe hoʻo ngaahi kaungāmeʻá ʻa e tuʻunga moʻui tatau mo koé, manatuʻi te ke lava ʻo hoko ko ha faʻifaʻitakiʻanga ʻo e anga faka-Kalaisí kiate kinautolu. ʻʻOku fakamāsila ʻe he ukameá ʻa e ukamea; ʻoku pehē ʻa e fakalelei ʻe he tangatá ʻa e mata ʻo hono kāingá’ (Lea Fakatātā 27:17).”
Kalake H., 16, ʻIutā, USA
Fakaafeʻi pea Maʻu ha Loto-toʻa
“Kuo tokoniʻi au ʻi hono fakaafeʻi e kakaí ke mau vaʻinga mo kai meʻakaí ke u maʻu ha ngaahi kaungāmeʻa foʻou. ʻOku ou toe talanoa foki mo e kakai ʻi he ngaahi hulohula ʻa e Siasí. ʻOku ou kiʻi mā, ko ia ʻoku ou faʻa nofo pē mo ʻeku kulupú, ka ʻoku ou fiefia ne u lototoʻa ke feʻiloaki mo ha kakai foʻou, neongo ʻene ngali fakamā he taimi ʻe niʻihi.”
Hena P., 14, Hauaiʻi, USA
Fakahoko e Fuofua Foʻi Laká
“Fakahoko ʻa e fuofua laká pea fakalea ʻmālō e leleiʼ ki ha taha. Te ke lava ʻo fakaafeʻi kinautolu ki ho ʻapí. ʻOku ou faʻa lotu he taimi ʻe niʻihi, pea ʻoku tokoni ia ke u maʻu ha loto falala lahi ange ʻo kapau he ʻikai ke nau tali ʻio.”
ʻĀnaia P., 12, Hauaiʻi, USA
Fekumi ki he Fiefiá
“Kuo pau ke tau vakai ki he ngaahi tuʻunga moʻui ʻa e Siasí. Fakakaungāmeʻa kiate kinautolu ʻoku muimui ki he ʻOtuá. Kumi ha niʻihi ʻoku fiefia mo feinga ke moʻui ʻaki e ongoongoleleí.”
ʻAmelia P., 14, Palāsila
Tauʻatāina fekauʻaki mo Hoʻo Ngaahi Tuí
“ʻOku lahi e faʻa fehikitaki hoku fāmilí, ko ia ʻoku ou ʻiloʻi hono faingataʻa ke maʻu ha ngaahi kaungāmeʻa foʻoú—tautautefito ki he ngaahi kaungāmeʻa te nau lava ʻo tokoniʻi au ke u moʻui ʻaki ʻa e ongoongoleleí. Kuó u ako ke u tauʻatāina fekauʻaki mo e meʻa ʻoku ou tui ki aí. Tuku ke ʻiloʻi koe ʻe he niʻihi kehé mo e meʻa ʻokú ke taukaveʻí. Mahalo pē ʻoku ʻikai kau e kakai ʻokú ke feohi mo iá ki he Siasí, ka te nau kei lava pē ʻo hoko ko ha ngaahi kaungāmeʻa lelei.”
Sōfia N., 15, Filipaini