“Nofo ʻi he ʻOfa ʻa e Fakamoʻuí,” Ki Hono Fakamālohia ʻo e Toʻu Tupú, Sune 2023.
Lea Fakaʻosí
Nofo ʻi he ʻOfa ʻa e Fakamoʻuí
Mei ha lea ʻi he konifelenisi lahi ʻo ʻOkatopa 2016.
Naʻe folofola ʻa Sīsū:
“Hangē ko e ʻofa ʻa e Tamaí kiate aú, ʻoku pehē ʻeku ʻofa kiate kimoutolú.
Ngaahi tā fakatātā ʻa Jarom Vogel
“Kapau ʻoku mou fai ʻeku ngaahi fekaú, te mou nofo ʻi heʻeku ʻofá; ʻo hangē ko ʻeku fai ʻa e ngaahi fekau ʻa ʻeku Tamaí, peá u nofo ʻi heʻene ʻofá” (Sione 15:9–10).
ʻOku ʻuhinga ʻa e “hoko atu” pe “nofo ʻi he” ʻofa ʻa e Fakamoʻuí, ke maʻu ʻEne ʻaloʻofá pea hoko ʻo haohaoa. Ke maʻu ʻEne ʻaloʻofá, kuo pau ke tau tui kia Sīsū Kalaisi pea tauhi ʻEne ngaahi fekaú, kau ai e fakatomala mei heʻetau ngaahi angahalá, papitaiso ki hono fakamolemole ʻo e angahalá, maʻu ʻa e Laumālie Māʻoniʻoní, pea hoko atu ʻi he hala ʻo e talangofuá.
Naʻe fakahaaʻi ʻe Sīsū, koeʻuhí ke lava ʻo fai ha fakalelei maʻa ʻetau angahalá pea huhuʻi fakatuʻasino mo fakalaumālie fakatouʻosi kitautolu, naʻe hoko ʻa ʻEne mamahí—ko e taupotu taha ʻo hono fakahaaʻi ʻo ʻEne ʻofá— ʻo fakatupu ʻiate Ia “ko e ʻOtuá, ko e tokotaha ʻoku mālohi tahá, [ke tetetete koeʻuhí] ko e mamahí, pea ke tafe ʻa e totó ʻi he ava kotoa ʻo hoku kilí, mo e mamahiʻia ʻi he sinó mo e laumālié fakatouʻosi” (Tokāteline mo e Ngaahi Fuakava 19:18). Naʻe mahulu hake ʻEne mamahi ʻi Ketisemaní mo e kolosí, ʻi ha faʻahinga meʻa ne malava ʻe ha tangata fakaekakano ʻo fuesia. Ka neongo ia, tuʻunga Heʻene ʻofa ki Heʻene Tamaí mo kitautolú, naʻá Ne kātaki pea lava ke foaki mai ʻa e moʻui taʻe-faʻa-maté mo e moʻui taʻengatá fakatouʻosi.
He toki meʻaʻofa mahuʻinga fau moʻoni ko e ʻofa fakalangí!
ʻE ʻikai nai ke ke ʻofa ʻiate Ia naʻe tomuʻa ʻofa ʻiate koé (vakai, 1 Sione 4:19)? Tauhi leva ʻEne ngaahi fekaú. ʻE ʻikai ʻapē te ke hoko ko ha kaumeʻa kiate Ia naʻe tuku hifo ʻEne moʻuí maʻa Hono ngaahi kaumeʻá (vakai, Sione 15:13)? Tauhi leva ʻEne ngaahi fekaú. ʻE ʻikai ʻapē te ke maʻu ʻEne ʻofá pea maʻu kotoa ʻa e meʻa kuó Ne foaki atu kiate koé? Tauhi leva ʻEne ngaahi fekaú. ʻOku ou lotua te tau ongoʻi mo nofo kakato ʻi Heʻene ʻofá.