“ʻI Nomi Peni, Kemipoutiá,” Ki Hono Fakamālohia ʻo e Toʻu Tupú, Sune 2023.
Founga ʻo ʻEmau Moihuú
ʻI Nomi Peni, Kemipoutiá
Laʻitā mei he Getty Images
Mālō e Lelei! Ko hoku hingoá ko Meli V.
Ko hoku taʻu 16 ʻeni, pea ʻoku ou nofo ʻi Nomi Peni, ko e kolomuʻa ʻo Kemipoutiá. ʻOku ou manako ke vaʻinga sipoti mo hoku ngaahi kaungāmeʻá, pea ʻoku ou saiʻia ke ako ha ngaahi meʻa foʻou.
Naʻá ku faʻa fakafehoanaki au ki he kakai kehe naʻá ku pehē naʻe lelei ange ʻenau moʻuí ʻiate au, tautautefito ki he kakai naʻe lelei ange ʻenau tuʻunga fakapaʻangá. Ka neongo ia, ʻi heʻeku lotu ki he Tamai Hēvaní, naʻá Ne ʻomi ha loto falala kiate au.
ʻOkú Ne Teuteuʻi ʻa e Halá
Kuó u ako ʻo ʻiloʻi neongo pe ko e hā hoku ngaahi faingataʻaʻiá, ʻe ʻiate au maʻu pē ʻa e ʻOtuá mo tokoniʻi au. ʻOku ou ʻiloʻi kuo teʻeki ai ke Ne tuku mai ha fekau kiate kitautolu kae ʻoua kuó Ne ʻomi ʻa e hala ke tau lavaʻi ai iá (vakai, 1 Nīfai 3:7).
Ko e meʻa ʻoku ou saiʻia taha ai ʻi heʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ʻeku tui te u toe lava ʻo nofo ʻi hēvani mo hoku fāmilí hili ʻetau maté. ʻOku ou maʻu ha fāmili fiefia, ʻa ia ʻoku nau hoko ko ha faʻifaʻitakiʻanga lelei ki he kakai ʻoku nau feohí. ʻOku nau foaki ʻi heʻenau ʻofá mo tokoniʻi au ke u mālohi ange.
ʻOku ʻOmi ʻe he Tuí ʻa e Loto Falalá
ʻOku ʻikai faingataʻa kiate au ʻeku hoko ko e mēmipa ʻo e Siasí koeʻuhí ʻoku tokoniʻi au ʻe heʻeku tui ki he ʻOtuá ke u maʻu ha loto falala mo ha moʻui ʻoku lelei angé. ʻOku ou fiefia ʻaupito ʻi he ngaahi pongipongi Sāpaté he te u lava ʻo ʻalu mo hoku fāmilí ki he lotú. ʻOku mau faʻa lau e folofolá kimuʻa pea mohé, pea taimi ʻe niʻihi ʻoku mau ako mei he Haʻu, ʻo Muimui ʻIate Aú.