“Serem Wanem We Yu Lavem,” Blong Ol Yut Oli Kam Strong, Julae 2023.
Serem Wanem We Yu Lavem
Lav blong yu from gospel, blong ol nara wan, mo long Lod, i givim yu paoa blong serem gospel.
Blong Stamba Tingting Ia, i kam long Yongsung Kim, Havenlight.com
Fas taem blong mi blong go long Riva Ribol kolosap long Preston, Inglan, hem i bin taem mi stap givim seves olsem wan yang misinari long Britis Misin. Long ples ia, Aposol mo misinari Heber C. Kimball i bin baptaesem ol fas konvet i kam long Jos blong Jisas Kraes we i bin kambak bakegen, aotsaed long Not Amerika long Julae 1837.
Taem mi stanap long wan brij we i lukluk ova long reva, mi tingting abaot wanem i bin hapen long ples ia, mo mi bin kasem wan witnes we i kavremap mi abaot Jisas Kraes mo gospel blong Hem we i kambak bakegen.
Misin blong mi i bin naes tumas, mo i bin givim mining long eksperiens blong mi long laef. Tedei, fulap taem mi stap tingting bak long glad ia we mi bin gat blong spendem fulap laef blong mi blong stap serem gospel blong Jisas Kraes. Mi no save tingting long wan samting we i moa impoten.
Mi Nidim blong Serem Gospel
Pikjarem long maen blong yu se yu bin wan disaepol blong Jisas Kraes long taem we Hem i bin Girap Bakegen long Ded. ?Bae i bin naes tumas blong save luk Hem mo harem mesej blong Hem?
Mesej blong Lod we i bin girap long ded i wan invitesen mo oda blong serem gospel blong Hem. Hem i talem, “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi” (Matiu 28:19), mo yufala i mas go long evri ples long wol, yufala i talemaot gud nius blong mi long olgeta man” (Mak 16:15).
Presiden Russell M. Nelson i bin talemaot se “gospel ia blong Jisas Kraes, man i nidim moa tedei bitim bifo.… Yumi gat tabu responsabiliti blong serem paoa mo pis blong Jisas Kraes wetem evriwan we bae i lisin, mo bae i letem God i stap win insaed long laef blong olgeta.”1
Lod I Nidim Yu Naoia
Yu stap laef long wan taem we i defren mo impoten—las dispensesen bifo Seken Kaming blong Jisas Kraes. Profet Josef Smit i bin profesae se bifo we Lod i kam bakegen, “trutok blong God bae i gohed i go nomo, i klia, i stanap stret, i indipenden, kasem taem we bae i gotru long evri graon, i visitim evri kaen weta, i swipim evri kantri, mo i ring long evri sora, kasem taem ol stamba tingting blong God oli kamtru, mo Hae Jehova bae i talem se wok ia i finis”2
?Huia bae i help blong winim hemia? !Yu!
Yu no nid blong yu kam wan fultaem misinari blong serem gospel. Lod i nidim yu naoia blong mekem fasin blong stap serem gospel blong Hem we i gat glad blong taem we i no save finis; tru long toktok mo aksen i kam wan wei blong laef mo wan pat blong huia yu.
Lukluk Moa long Lav
Risen we i impoten moa bitim evriwan i we, Lod i bin askem yumi blong mekem. Samtaem hemia i save stap olsem wan jalenj, be mi promes se taem yu lukluk moa long Lod Jisas Kraes mo long hamas yu lavem Hem, mo long hamas Hem i lavem yu, bae Hem i gaedem ol traehad blong yu.
Hem i Girap Bakegen long Ded, i kam long Greg Olsen
Lav blong yu from gospel, blong ol nara wan, mo moa impoten, lav blong yu long Lod bae i givim yu paoa blong akseptem tabu invitesen blong Hem blong serem gospel blong Hem.
Lavem Gospel
Lod i bin talem, “Lanem samting aot long mi” (Doktrin mo Ol Kavenan 19:23; Matiu 11:29). Taem yu stadi moa long gospel mo lanem abaot Jisas Kraes mo tabu misin blong Hem olsem Sevya mo Ridima, bae lav blong yu long gospel i gro moa.
Yu serem lav blong yu from gospel ia taem yu laef folem. Aposol Pol i tijim: “Oltaem yu mas soemaot gudfala eksampol long ol Kristin man, [long fasin blong raet, blong toktok, wetem bigfala lav, wetem spirit, wetem fet mo wetem fasin we i klin evriwan” (Fas Timoti 4:12). Plante taem ol pipol oli akseptem gospel from oli bin gat ol gudfala eksperiens wetem ol memba blong Jos. Plis no haedem ol bilif mo save blong yu long saed blong spirit. “Yufala i mas letem laet ya i saenaot” (Matiu 5:16) mo soem ol nara wan se gospel ia i wan impoten pat blong huia yumi mo wanem yumi stap mekem.
Lavem Ol Nara Wan
Tingbaot ol fren blong yu. ?Yu stap serem ol muvi, miusik, mo kaekae we yu laekem wetem olgeta? ?Yu stap serem ol talen mo ol samting we yu laekem? Maet yu bin stap tingting sapos bae oli ansa long gospel sapos yu serem wetem olgeta. Bae yu neva save sapos yu no traem. Presiden Nelson i bin tijim, “Evriwan i mas gat janis blong save abaot gospel blong Jisas Kraes we i kambak.”3
Go aot wetem lav long ol fren, memba blong famli, ol neba, ol fren long klas, mo ol nara wan—tingbaot se oli ol brata mo sista blong yu mo oli ol pikinini blong Papa blong yu long Heven we Hem i lavem tumas—mo bae yu faenem se i moa isi blong serem gospel wetem olgeta.
Lavem Lod
Olsem ol memba blong Jos Ia blong Jisas Kraes blong Ol Lata-dei Sent, mesej blong yumi long wol i we !Jisas Kraes i stap laef! Hem i mekem i posibol blong sevem wanwan long yumi mo yumi save kam olsem wan god.
Bae yu filim lav blong Lod from yu taem yu tingting hevi long evri samting we Hem i bin mekem blong yu. Bae sol blong yu fulap long lav from Hem, mo bae yu faenem se yu no save stop blong serem ol naesfala trutok we yu bin kasem long Lod.
Bae Glad blong Yu I Bigwan Tumas
Eksperiens blong mi long saed blong spirit long brij ia ova long Riva Ribol olsem wan yangfala misinari, i bin karem glad ia we i no save finis i kam long mi, we oli bin promesem long olgeta we oli serem gospel (luk long Doktrin mo Ol Kavenan 18:15).
Olsem wan Aposol blong Lod Jisas Kraes, mi sua moa tedei se blong stap serem gospel, hem i wan glad mo i soem dip filing blong yumi abaot lav blong yumi long gospel ia we i kambak bakegen, long ol pikinini blong God, mo long Lod.
Elda Cook o toktok wetem ol yangfala we oli ronwe long Taal Volkenu long Batangas, Filipin long 12 Jenuware 2020.
Mi testifae se taem yu akseptem invitesen blong Lod mo serem wanem we yu lavem, yu stap helpem Hem blong bildimap Jos blong Hem mo stap rere long wol blong Hem i kambak bakegen, taem “bae Hem i rul olsem king blong ol King mo … Lod blong ol Lod.”4 Mi prea se bae yu folem Hem mo serem gospel blong Hem truaot long laef blong yu.