Karem I Kam Tugeta—No Seraotem

I Kam long David A. Edwards

Ol Magasin blong Jos

God i no stap soem se hem i laekem sam pipol bitim ol narawan, mo yumi tu i mas mekem semmak.

Afta long sam wik we i pas taem mi kam long Jemani olsem wan misinari, trena blong mi mo mi i noknok long doa blong wan olfala woman, we i agri blong mitufala i tijim hem.

Long fas lesen blong mifala, mifala i invaetem hem blong ridim wan skripja laod. Tru long ol tik glas blong hem, hem i traehad blong rid, mo i mesmestem sam toktok. Mo ol ansa long ol kwestin blong mitufala oli sot. Mitufala i no sua hamas hem i andastanem.

Mitufala i askem hem blong ridim sam ves long Buk blong Momon bifo mitufala i visitim hem bakegen. Taem mitufala i kam bakegen, hem i bin ridim olgeta be i luk olsem hem i no andastanem olgeta. Mitufala i stap tingting se maet hem i gat sam jalenj blong stap lan. Mitufala i stap tingting sapos mitufala i sud gohed blong stap tijim hem. Be mitufala i gohed blong go.

Long nekis visit blong mitufala, mitufala i sapraes taem hem i talem se hem wantem kasem baptaes. Afta, taem mitufala i gohed blong tijim hem, mitufala i luksave se riding blong hem i stap kam moa gud. Ol ansa blong hem long ol kwestin blong mitufala oli sot yet be i luk olsem oli moa gud mo moa sua.

I no longtaem, mi muv i go long wan defren siti, be trena blong mi i raet long mi afta blong talem se woman ia i kasem baptaes mo ol memba blong branj oli stap sapotem hem. Sapos yu bin askem long mitufala long sam wik moa eli, se huia long ol kontak blong mifala bae i baptaes faswan mo faenem wan ples long Jos, bae olfala woman ia i no stap long top blong lis blong mitufala.

Mo olsem nao yumi lanem wan olfala lesen—semmak lesen we Aposol Pita i bin lanem long taem i pas mo we wanwan long yumi i nidim blong gohed blong lanem samting: “God i stap mekem i semmak nomo long olgeta man” (Ol Wok 10:34).

Wan Bigfala Jenis

Pita i prisaed ova long Jos long wan impoten taem. Sevya i bin talem long Aposol blong Hem, “Yufala i mas go long evri ples long wol, yufala i talemaot gud nius blong mi long olgeta man” (Mak 16:15). Be oli bin stap prij mo baptaesem ol man Jiu nomo.

Afta sam gudfala samting i hapen. Wan man Rom we i komanda we nem blong hem Konilias—wan laen blong Isrel, wan we i no man Jiu, wan soldia we i wetem semmak yunifom olsem olgeta we oli bin kilim Jisas Kraes—i bin luk wan enjel long wan visen. Enjel ia i talem long Konilias blong sendem toktok from wan man we nem blong hem Pita, blong i tijim hem. I no long taem afta, Pita i bin gat wan visen we hem i luk se oli no givim raet long kaekae anda long loa blong ol man Jiu, be yet oli talem long hem blong kakae from God i bin mekem kaekae ia i klin. Stret afta long taem ia we Pita i bin luk visen ia, ol wokman blong Konilias oli kam mo askem hem blong go wetem olgeta. Spirit i talem long Pita blong go.

Afta we hem i mitim Konilias mo i luk se hem i gud mo tru, Pita i save mining blong visen blong hem. Gospel i nidim blong go long ol laen blong Isrel olsem Konilias tu. Long taem ia nao Pita i talem, “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta” (Ol Wok 10:34–35). Pita i tijim Konilias abaot Jisas Kraes mo invaetem hem i kam long haos blong hem blong kasem baptaes. (Luk long Ol Wok 10.)

Blong stap karem gospel i go long ol laen blong Isrel i makem wan bigfala jenis long Jos long taem blong bifo. Sam pipol oli fesem hadtaem blong akseptem jenis ia. Be hem i bin raet samting, mo i bin tijim wan stamba trutok abaot God mo ol brata blong yumi ol man.

Nogat Fasin blong Laekem Wan Bitim Narawan

Taem God i blesem ol pikinini blong Hem, Hem i no soem se hem i no laekem wan bitim narawan folem kantri we hem i kamaot long hem, seks, hamas hem i rij, edukesen blong hem, paoa blong hem, olsem wanem ol man oli luk hem, o eni nara defdefren samting we i seraotem ol pipol.¹ Hem i luk se “evri bodi blong mit mo bun i semmak nomo; God i laekem man we i stret mo gud” (1 Nifae 17:35). Evri wan i save kam long Hem, from “evriwan i semmak long God” (2 Nifae 26:33). Hem i “stap lukluk long [hat] blong hem” (1 Samuel 16:7). Lod i akseptem olgeta we oli “mekem samting i stret,… lavem sore, mo wokbaot wetem Hem we tingting we i stap daon” (Maeka 6:8).

Eni wan i save jusum blong kam long Jisas Kraes, mekem ol kavenan wetem Papa long Heven, mo folem ol wei blong Tufala. Mo trutok ia i sapos blong gaedem olsem wanem yumi serem gospel blong Lod mo lav blong Hem.

Yumi no save jes lukluk nomo long ol fasin blong olgeta aotsaed mo tingting se oli no ol “kaen man ia” blong gospel. Yumi no save jes putum ol nem we wol i putum long ol pipol mo ting se ol nem ia oli no kwalifaem olgeta blong stap pat tu insaed long jos. Yumi no save jes disaedem blong no givim seves long wan man from nomo se oli gat ol defren lukluk long saed blong politik, o gat ol defren intres long ol samting we yumi yumi laekem.

God i no luk wan man o woman olsem wan koleksen blong ol nem we i stap ripresentem ol defdefren grup o fasin. Hem i luk wanwan man mo woman—pikinini blong Hem. Mo hem i olsem ia nao we yumi mas lukluk wanwan long yumi—olsem ol defren man mo woman wetem semmak janis mo paoa blong kam long God.

Kam Wan Man blong Karem Ol Man I Kam Tugeta

Presiden Russell M. Nelson, i leftemap tingting blong yumi blong tekpat long kam tugeta blong Isrel.² Be sapos yumi, no mekem olsem God, mo jusum blong no mekem semmak long olgeta man, taem yumi stap serem gospel mo mekem ol pipol oli kam pat long jos, yumi stap seraotem o divaedem moa bitim we yumi stap karem i kam tugeta mo stap joenem.

Letem wanwan long yumi i mekem wan komitmen: nomo seraotem. Stap olsem wan man blong karem ol man i kam tugeta. Lavem, serem mo invaetem.

Kompanion blong mi mo mi i no bin sua sapos woman ia we mitufala i stap tijim long Jemani bae i baptaes o no. Mitufala i no bin save hat blong hem, be God i save. Mi glad se mitufala i lisin long toktok blong spirit blong gohed blong tijim hem.

Taem yu stap traem blong folem Spirit mo traem blong stap mekem semmak long olgeta man, bae Hem i gaedem yu blong helpem olgeta raon long yu blong kam long Kraes, nomata long ol samting we i defren long olgeta.