“Stap Joenem Semmak Tim,” Blong Ol Yut Oli Kam Strong, Julae 2023.
Stap Joenem Semmak Tim
Tufala gel ia we oli ol basketbol enemi long skul, oli kam ol fren blong laef taem.
Ol foto i kam long Jeffery Barker Edwards
Sista Dil i gat sikis wik nomo i stap long misin blong hem long Ostrelia taem hem i faenemaot se bae hem i spendem ol las wik ia wetem !Sista Tuala!
“Hem i las samting we bae mi wantem blong mekem,” Sista Dil i talem.
Sista Dil mo Sista Tuala oli bin ol fas pleia blong statem ol top basketbol tim blong hae skul blong olgeta long Oklan, Niu Silan. Oli stap fesem olgeta. Bae oli stap plei fesem olgeta long ol faenol gem, mo hem i no naes.
“Blong tokbaot stret moa,” Sista Tuala i talem, “bae mifala i kamaot long kot wetem ol skraj mo soa.”
Sista Dil mo Sista Tuala i spendem fulap taem blong trening mo plei basketbol. “Basketbol i bin laef blong mifala,” Sista Dil i talem.
Afta we tufala i graduet long hae skul, tufala i filim strong blong givim seves long misin—nomata se nogat wan long tufala i bin wantem blong go long wan misin bifo.
Stap Mekem Joes ia blong Givim Seves
Blong Sista Tuala, i bin tekem taem blong hem i mekem hat blong hem i stret wetem blong Lod. “Mi bin gat 21 yia taem mi mekem desisen ia blong mekem folem voes blong tabu spirit,” hem i talem. “Mi stap faet wetem tingting ia kasem taem mi stap long plen blong go long misin.”
Sista Tuala i kasem misin blong hem long Ostrelia long taem blong wol sik KOVID-19, mo nomata we i bin had, hem i tangkyu blong disaed blong kam givim seves.
“Mi no pikjarem semmak Sista Tuala ia taem mi bin gat 21 yia. Mi filim se mi bin rili gro.”
Sista Dil i bin gat wan “klia mo sua” filing blong givim seves long wan misin taem hem i bin kasem petriakel blesing blong hem. Afta long sam taem, hem i disaed blong mekem folem filing ia blong givim seves, from “wanem we Lod i wantem i oltaem stret rod mo bes samting blong mekem.” Koling blong hem i kam, mo hem i fulumap ol klos mo ol ting blong hem blong kam givim seves long Ostrelia.
Stap Joenem Semmak Tim … Longlongwe
Jes from Sista Dil mo Sista Tuala i givim seves long semmak misin i no minim se tufala i kam ol fren kwiktaem. Afta we tufala i stap ol enemi blong wan longfala taem, Sista Dil mo Sista Tuala i gat wan had taem blong stap luk tufala olsem eni nara samting moa.
I tru, fas dei we Sista Tuala i luk Sista Dil, mo wan long ol fas tingting blong hem hem i, “mi no save sapos mi mas laekem hem o no.”
Stopem Raorao
Taem oli asaenem Sista Tuala mo Sista Dil blong givim seves tugeta, i bin defren smol.
Tufala tugeta i gat ol aedia abaot wanwan long tufala folem olsem wanem tufala i bin plei long basketbol kot. Wanwan long tufala i ting se nara wan i strong tumas, wantem win oltaem, mo i no naes.
Be ol samting i stat blong jenis taem tufala i kam blong savsave tufala. Sista Dil i luksave se Sista Tuala i “oposit evriwan” long olsem wanem hem i bin stap luk hem. “Hem i wan woman we i gat fulap lav—wan long ol kompanion we i gat fulap lav we hem i bin gat olsem kompanion we i givim seves wetem,” Sista Dil i talem.
Sista Tuala i serem wan eksperiens we i semmak olsem. Hem i no luksave se ol filing blong hem blong stap fesem Sista Dil i bin “wan raorao we hem i no bin luksave” long laef blong hem.
Lav mo andastaning i tekem ples blong ol nogud filing blong raorao mo jajmen, taem hem i stat blong luk Sista Dil from huia hem tru. Mo nomata we Sista Tuala i ting se Sista Dil i kwaet, hem i faenem se “!Sista Dil i save toktok!”
Long niufala rilesensip we tufala i faenem, Sista Dil mo Sista Tuala i luksave se maet oli neva bin ol enemi.
“Long basketbol yu bildim aedia ia long maen blong yu se yumi mas win, mo evri nara tim oli ol enemi,” Sista Dil i talem. “Mo taem basketbol i finis, yu luksave se, ‘O, oli nomo ol enemi. Maet oli neva bin ol enemi.’”
Naoia, Sista Dil mo Sista Tuala tufala i luk se tufala i stap long semmak “tim”—tim blong God.
Kraes long Medel, i kam long Judith Mehr
Sakrifaes blong Jisas Kraes I blong Evriwan
Tugeta sista i bin filim han blong God long asaenmen blong tufala olsem ol kompanion mo save paoa blong Atonmen blong Jisas Kraes i bin letem tufala blong eksperiensem hiling mo jenis.
“Jisas Kraes i bin mekem sakrifaes ia mekem se evri samting ia we i bin go rong i save hil bakegen, i save kam stret bakegen mo i save kam moa gud,” Sista Dil i talem. “Yumi save fogivim. Yumi save fogetem. Yumi save muv fored, mo ol samting bae oli jenis.”
Sista Dil mo Sista Tuala i no fiksim raorao blong tufala nomo, be tufala i lanem tu olsem wanem blong luk ol nara wan olsem we God i stap luk olgeta.
“Blong kam aot long ples ia blong save luk kompanion blong mi mo ol nara man long wan defren laet, mi kam blong luksave se stori blong evri wan i impoten,” Sista Tuala i talem. “Mo evriwan i nidim Atonmen blong Jisas Kraes.”
Tufala i bin lanem se nomata we hem i had, hem i posibol blong tu man we tufala i bin luk tufala olsem ol enemi, oli kam tugeta tru long lav.
“Hem i nomata wanem yia blong yu o weaples yu kamaot long hem,” Sista Tuala i talem, “o sapos yu wan we i no biliv long God o blong ol nara biliv.
“Sapos mi save wok wetem wan man we mi neva bin gat wan gudfala rilesensip wetem hem, mo mitufala i kam tugeta from wan stamba tingting, ol nara man tu i save mekem semmak.”