“4 Wei blong Sapotem Ol Fren we Sam Famli blong Olgeta Oli No Joenem Jos O Nomo Kam Kam long Jos” Blong Ol Yut Oli Kam Strong, Julae 2023.
Laef Help
4 Wei blong Sapotem Ol Fren we Sam Famli blong Olgeta Oli No Joenem Jos O Nomo Kam Kam long Jos
Yu save helpem evriwan i filim se oli lavem olgeta mo oli kea long olgeta long jos nomata ol situesen blong olgeta.
I gat ol defdefren kaen famli. Eksampol, olgeta we yu stap luk long jos maet oli gat ol memba blong famli we oli no ol memba blong Jos o oli jusum blong kamaot long Jos. I save had long sam man blong tekpat long jos o iven filim se oli pat blong jos taem oli nogat sapot blong famli.
!Yu kam insaed long ples ia nao!
Yu save mekem wan impoten pat blong blesem evri kaen famli, long evri kaen situesen. Hemia sam long ol wei we yu save help:
Ol pikja droing oli kam long Oksana Grivina
Prea from Ol Wei blong Help
Prea blong save olsem wanem yu save helpem olgeta we oli stap kam long jos wetem ol famli blong olgeta. Stap redi blong mekem aksen folem ol ansa we yu kasem.
Kam blong Save Famli Ia
Sapos i posibol, traem blong save ful famli blong fren blong yu. Hemia bae i helpem yu blong save wanem sapot fren blong i gat long hom mo wanem i stap mekem i had blong olgeta i tekpat long jos. Taem yu kam blong save famli ia moa gud, yu save kasem insperesen blong help long ol spesifik wei olsem we i nidim.
Yu Mas Stap Laef Folem Gospel Oltaem
Plante man oli stap intres long Jos taem oli stap luk ol memba oli stap laef folem wanem oli bilivim. Yu neva save huia i stap wajem yu. Yu save mekem fulap gudfala samting taem yu laef folem gospel nomo. Taem yu mekem olsem, bae i blesem laef blong yu mo i save help blong karem laet blong gospel i kam long olgeta raon long yu.
Stap Kaen Nomo
No ting daon long olsem wanem blong stap kaen nomo i save mekem samting i defren bigwan. Eksampol:
Sapos yu luk wan man i stap sidaon hemwan long jos, go sidaon narasaed long olgeta o askem blong oli sidaon wetem famli blong yu.
Sapos oli no save kam long jos o ol nara aktiviti olgetawan, askem blong oli folem yu o invaetem olgeta blong kam wetem famli blong yu.
Hem i impoten tu blong mekem ol fren blong yu oli tekpat long ol aktiviti. Wan invitesen long wan wod o famli aktiviti i maet luk smol, be i save helpem fren blong yu blong jusum blong stap kolosap long Sevya mo Jos blong Hem sapos oli filim oli pat tu.