11 Sot Stori blong Stap Serem Gospel

!Mo olsem wanem yufala i save serem gospel tu!

Soem Olsem Wanem Gospel I Save Help

Mi stap sidaon narasaed long fren blong mi long klas. Mifala i stap redi blong mekem wan eksam, mo hem i talem long mi se hem i fraet tumas. Mi filim se mi nidim blong tijim hem olsem wanem blong prea. Afta mitufala tugeta i putum hed i go daon mo prea kwaet from help long tes ia. Mi talem tangkyu we prea i save mekem fren blong i filim kwaet.

Abigail, Uruguay

Givhan long Ol Pipol long Nid

Mifala i gat wan olfala woman long wod blong mifala we i no save stap kam long sakramen miting from sam problem blong helt. Papa blong mi mo mi i askem bisop sapos mifala i save tekem sakramen i go long haos blong hem evri wik. Hasban blong hem, we i wan we i nomo stap kam tumas long jos, i stat blong tekem sakramen tu. Blong karem Isrel i kam tugeta, i minim se yumi nidim blong invaetem ol narawan blong kam moa kolosap long Jisas Kraes. Wok blong givhan i wan bigfala pat blong hem.

Shion, Yuta, YSA

Invaetem blong wan Aktiviti

Mi stap ron long baeskel mo mi pas bitim wan jos taem mi luk fulap man oli stap danis. Mi singaotem wan yang man (we nem blong hem Courage) mo askem hem se oli stap mekem wanem ia. Hem i se oli stap kam from ol klas we oli singaotem seminari. Hem i talem long mi se bae i gat wan aktiviti long jos mo askem sapos bae mi save go wetem hem. Courage, olsem fren blong mi, i bin rili jenisim laef blong mi taem hem i helpem mi blong save abaot gospel.

David, Gana

Stap Wan Eksampol

Mi lanem fulap taem mi stap wajem bigfala brata blong mi. Mi lavem ol vidio gem mo futbol, mo blong talem tru, bae mi stap mekem ol samting ia nomo evri taem sapos i no from hem. Hem i laekem ol samting ia tu, mo plante taem, mitufala i stap plei long hem tugeta, be oltaem hem i mekem taem blong gro mo kam moa gud. Bae mi neva fogetem taem oli invaetem mi blong tekem ol drag taem mi stap long skul. kwiktaem mi tingting long brata blong mi mo mi save wanem bae hem i jusum; from se mi wantem kam olsem hem, mi mekem raet joes mo talem no.

Emilio, Tenesi, YSA

Helpem Ol Narawan blong Filim Lav blong Kraes

Long taem blong wan BYKS konfrens, mi stap filim se mi stap miwan. Mi prea evri dei mo hop blong filim Spirit mo lav blong Jisas Kraes. Afta long wan long ol toktok, wan yang woman we mi no save tumas i kam long mi mo haggem mi. Mi filim lav blong Kraes long hag blong hem, olsem se Hem i stap talem long mi se Hem i lavem mi.

Natalie, Jael

Folem Ol Toktok blong Spirit

Wan dei mi gat wan filing we i kam long spirit se mi sud invaetem bes fren blong mi long skul i kam long wan divosen. Mi wantem blong no lisin long filing ia, be long en, mi sendem wan teks i go long hem long dei bifo divosen ia. Taem mitufala i sidaon tugeta long divosen, mi bin fraet. Be taem miting i finis, hem i gat wan bigfala smael long fes blong hem. Hem i wan rimaenda long mi se God i save ol pikinini blong Hem moa gud bitim mi mo we mi mas oltaem folem ol toktok blong spirit blong serem gospel blong Jisas Kraes.

Eliza, Minesota, YSA

Prea abaot Wanem blong Talem

Mi mo sista blong mi nomo i ol memba blong Jos long skul blong mifala. Ol pipol oli luksave se mitufala i defren mo oltaem stap askem ol kwestin. Fas taem, mi stap fraet blong toktok long olgeta, be mi prea blong save talem stret samting, mo oli bin lisin mo respektem ol joes blong mi.

Ruben, Nowei

Serem Ol Trutok blong Gospel Onlaen

Blong wan gol, mi bin go tru long Kam Folem Mi mo mi bin faenem ol skripja mo kwot blong serem long sosol media. Mi bin kasem sam komen long ol pipol we oli stap talem se oli filim Spirit tru long ol post blong mi. Blong stap serem gospel i save helpem ol narawan long ol wei we yumi no tingting long hem long tetaem ia.

Raquel, Brasil

Yusum Tingting mo Krietem Samting

Long wan long ol klas long skul blong mi, mifala i stap ridim wan buk we i tokbaot nogud Jos. mi save mi nidim blong toktok abaot ol trutok blong gospel we i kambak bakegen finis. Mekem se mi leftemap han blong mi. Tija i singaotem mi, be mi no bin save wanem blong talem. Mo from sam risen we mi no save, mo stat blong singsing ol singsing blong Ol Toktok blong Bilif. Mi sapraes taem wan bigfala kwaet mo respek i kavremap rum. Afta long hemia, i nomo gat tumas samting i konfius, mo tija blong mi mo ol fren long klas blong mi i gat moa respek taem mifala i storian raon long topik ia long klas.

Monique, Masajusets, YSA

Stap Wan Laet

Taem mi gat 15 yia, mi disaed blong stat blong lukaotem wan jos blong stap go long hem. Sam dei afta, mi mekem fren wetem wan gel long skul we i luk olsem i gat wan laet abaot hem. Sam wik afta, hem i invaetem mi i go long haos blong hem. Taem mi kasem long we, famli blong hem i invaetem mi blong joenem olgeta blong mekem famli haos naet. Mi intres long Jos Ia blong Jisas Kraes blong Ol Lata-dei Sent, mo fulap long intres ia i from hamas mi bin luk famli blong fren blong mi i hapi tumas long naet ia.

McKaylie, Kolorado, YSA

Serem from Lav

Kasen blong mi i bin leftemap tingting blong mi blong mit wetem ol misinari, mi ting se, from se hem i wantem mi blong enjoem ol blesing we hem i stap enjoem long taem ia. Mi filim se kasem blong mi mo fren blong mi, Enoch, i lavem mi mo wantem wan samting we i gud blong mi. Hemia i mekem mi filim fulap kamfot blong stap kam long jos.

Eric, Gana