“Ol Taem blong Kam Niu Bakegen,” Blong Ol Yut Oli Kam Strong, Julae 2023.
Tijing folem Tijing
Ol Taem blong Kam Niu Bakegen
Lanem abaot wanem Aposol Pita i bin tijim abaot Restoresen.
Fas Visen, i kam long Walter Rane
niufala paoa long laef
Ol “niufala paoa long laef” we Pita i bin tokbaot oli taem we Jisas Kraes bae i kambak bakegen. Afta long Seken Kaming, “wol ia bambae i kam niufala, mo bambae i kasem glori blong hem olsem paradaes” (Ol Toktok blong Bilif 1:10).
olgeta samting oli kam niuwan bakegen
Ol taem we bambae “olgeta samting oli kam niuwan bakegen” hem i taem Restoresen blong gospel bae i hapen. Taem ia i tekem tu ol las dei (!ol dei blong yumi!) mo taem we bae Jisas Kraes i kam bakegen.
Restoresen i minim blong karem i kambak o blong gobak. Restoresen blong gospel i bin stat long taem blong spring blong 1820, taem Papa long Heven mo Jisas Kraes, Tufala i kamkamaot long Profet Josef Smit. Long taem ia nao, plante samting i stat blong kambak bakegen long wol, mo hemia i tekem tu ol klin trutok blong Jisas Kraes, atoriti blong prishud, mo Jos.
ol tabu profet blong hem bifo
Stat long ol taem bifo, ol profet oli bin tokbaot finis abaot Pikinini blong God, Jisas Kraes, we bae i kam long wol mo kam Sevya blong yumi. Oli bin talemaot bifo tu we Jisas Kraes bae i kam nambatu taem bakegen.
Ol profet oli bin talemaot bifo tu we bifo Sevya i kambak bakegen, bae Hem i putumbak gospel blong Hem mo Jos blong Hem long wol. Restoresen ia we ol profet oli bin talemaot finis bifo, i stap hapen long taem blong yumi.