“Stap Olsem wan Ansa long Prea blong Wan Man” Blong Ol Yut Oli Kam Strong, Julae 2023.
Kam Folem Mi
Stap Olsem wan Ansa long Prea blong Wan Man
Blong stap folem ol toktok blong spirit i i helpem yumi blong mekem wan samting i defren.
Wanem Mi Gat Mi Givim long Yu Masta, i kam long Walter Rane
Pita mo Jon i hilim wan man long tempol.
Maet yu filim se yu nogat fulap blong givim. Be yu gat fet blong yu long Jisas Kraes, mo fet blong yu long Hem i inaf blong lidim ol samting i go long ol bigbigfala samting.
I no longtaem afta long ded blong Jisas Kraes mo Hem i Girap Bakegen long Ded, Pita mo Jon i bin go long tempol, mo long ples ia, wan man we i no save wokbaot i sidaon aotsaed mo askem tufala from wan donesen.
Pita i talem long man ia se, “Mi mi no gat mane nating, be wan samting we mi mi gat, bambae mi givim long yu, long nem blong Jisas Kraes, man Nasaret, mi mi talem long yu, !Yu girap, yu wokbaot!” (luk long Ol Wok 3:6; oli ademap long italik).
Pita i pulum man ia i stanap. Blong fas taem long laef blong hem, man ia i save stanap. Hem i girap mo jiam from glad. Fet blong Pita long Kraes i givim hem strong paoa long tingting blong hilim man ia tru long paoa blong prishud.
Be bae yumi toktok tru mo stret. Maet bambae yu no stap hilim ol sik blong evri man evri taem. Be fet blong yu i save help long ol nara wei. Olsem Pita, wanem we yu gat, yu save givim.
Foto i kam long Getty Images
Mekem Wan Samting I Defren
?Yu bin prea blong filim se yu no stap yuwan tumas? ?O wan man ia i save fren blong yu?
?Wan man i bin kamkamaot, i ring, o teksem yu long taem olsem? Maet oli bin stap folem wan toktok blong spirit o stap traem blong kam moa gud, semmak nomo olsem yu. Wanem nomo we oli mekem hem i blong yusum smol taem blong olgeta wetem fet, sam long strong paoa blong tingting blong olgeta, mo smol fasin blong stap kaen—long ol nara toktok, hem i wanem we oli bin gat. Yu tu yu save letem fet blong yu i pusum yu blong mekem folem ol toktok blong spirit.
Elda Ronald A. Rasband blong Kworom blong Olgeta Twelef Aposol i bin tijim: “Yumi gat tabu responsabiliti ia blong lanem blong luksave paoa [blong Tabu Spirit] insaed long laef blong yumi mo ansa bak”1
I no oltaem we bae yu save taem o sapos yu bin mekem wan samting i defren long dei blong wan man, mekem se i save had blong luk stamba tingting ia blong folem ol toktok blong spirit.
Be, blong stap traem blong givim seves—blong stap mekem wanem yu save mekem—bae i mekem yu filim hapi mo se yu winim wan samting iven sapos yu no luk risal blong hem oltaem. Taem yu stap lisin long ol toktok blong spirit, Tabu Spirit bae i helpem yu blong lanem olsem wanem blong givim seves long ol narawan, iven taem yu bisi. Olsem we Elda Jeffrey R. Holland blong Kworom blong Olgeta Twelef Aposol i bin tijim: “Ol ansa blong ol prea oli kam … plante taem … tru long ol narafala pipol we God i stap yusum. So, Mi prea se Hem bae i yusum yumi. Mi prea se bae yumi kam ol ansa blong ol prea blong pipol.”2
Glad blong Evri Man
Taem yu stap mekem gud, yu save kam ansa long prea blong ol nara man mo faenem glad folem rod ia—mo long taem we i no save finis. Olsem we Elda Rasband i bin tijim: “Glad i kam olsem pis long medel blong hadtaem o taem we hat i soa. Hem i givim kamfot mo strong paoa long tingting, i soemaot ol trutok blong gospel, mo i mekem lav blong yumi long Lod mi evri pikinini blong God i kam moa bigwan.”3 Long nara toktok, yu tu yu kam moa olsem Kraes.
Jes givim wanem we yu save givim, mo stat wetem wan smol taem mo stap obei.
I tru, samtaem yu nao yu nidim wan smol ekstra help. Long ples ia tu, wan Papa long Heven wetem lav, i sendem toktok blong spirit long ol narawan. Olgeta oli save faenem glad taem oli kam ansa long ol prea blong yu, semmak olsem we yu yu bin ansa long blong olgeta. Hemia i minim se i gat ol bilian posibol ansa, mo nekis wan i maet stap wokbaot daon long rod, mo bae i talem halo.