“Seven Dei blong Stap Serem Gospel,” Blong Ol Yut Oli Kam Strong, Julae 2023.
Seven Dei blong Stap Serem Gospel
Yu save serem gospel long ol nomol wei mo fasin. ?Yu redi blong mekem jalenj ia?
Taem yumi stap tokbaot blong serem testemoni blong yumi, plante taem yumi stap tingting long serem testemoni blong yumi long sakramen miting o long sam nara impoten ples. Be oli leftemap tingting blong yumi blong “lukaotem janis blong tokbaot fet blong yu long wan nomol wei.”1
Long seven-dei jalenj we i stap andanit ia, yu save serem testemoni blong yu long wan defren wei evri dei blong wan wik. Yu save mekem ol samting ia long eni oda, !o yu save mekemap ol aedia blong yuwan! ?Yu redi blong mekem jalenj ia?
Ol pikja droing oli kam long Emily Davis
Dei 1: Jos
Tingting blong serem testemoni blong long wan fast mo testemoni miting long jos, sapos hemia i wan samting we yu filim gud blong mekem. Sapos no, yu save serem testemoni blong yu long jos taem yu tekpat long ol klas blong yu long Sandei mo long seminari. Ol komen we yu serem long we i save leftemap tingting blong ol nara wan mo mekem testemoni blong olgeta i kam moa strong, mo blong yuwan tu.
Dei 2: Ol Fren
?Wanem nao yu bin lanem long jos long Sandei? ?Yu bin laekem wan samting we wan i bin serem long wan toktok long sakramen miting o long ol storian long klas blong yu? Maet fas singsing i wan fevret hym blong yu. !Tokbaot long wan fren blong yu! Afta askem tu abaot wiken blong olgeta.
Dei 3: Sosol Media
Sosol media i wan bigfala ples blong serem ol samting long saed blong spirit long wan nomol wei mo fasin. Blong dei blong jalenj ia, tingting blong serem wan post abaot:
-
Wan long ol fevret skripja ves blong yu.
-
Wan kwot blong jeneral konfrens we i leftemap tingting.
-
Wan toktok long sad blong spirit o wan eksperiens.
-
Wan samting we yu lavem o talem tangkyu from abaot Sevya.
-
Wan wei we Hem i bin helpem yu i no longtaem i pas o wan gudfala fasin we yu laekem abaot Hem mo from wanem.
Dei 4: Teks o Vidio
Sendem wan mesej we i leftemap tingting long wan fren tru long teks o vidio. Yu save serem wan toktok blong konfrens we yu ting we bae oli laekem, talem wan samting we talem tangkyu long olgeta from, o serem abaot fet blong yu long Jisas Kraes. Olsem, maet oli nidim blong save abaot lav we Papa long Heven i gat long olgeta. !Yu save oltaem talem long olgeta fes tu fes tu!
Dei 5: Seves
Maet yu stap tingting olsem wanem blong givim seves long ol nara wan i save kam wan wei blong serem testemoni blong yu. Aposol Pol i talem long Timoti: “Oltaem yu mas soemaot gudfala eksampol long ol Kristin man, [long fasin blong raet, blong toktok, wetem bigfala lav, wetem spirit, wetem fet mo wetem fasin we i klin evriwan” (Fas Timoti 4:12). So yu save soem ol bilif blong yu tru long eksampol blong yu, taem yu givim seves long ol nara wan olsem we Sevya bae i mekem.
Dei 6: Art
Samtaem ol man oli yusum art olsem wan defren wei blong serem ol tingting mo filing blong olgeta. Yu save yusum ol peinting, kaving, poem, miusik, o eni nara kaen art, blong serem olsem wanem yu filim abaot Jisas Kraes mo gospel blong Hem.
Dei 7: Ol Nomol Storian
Yu no fraet blong tokbaot ol bilif blong yu long ol nomol ples, semmak olsem we bae yu serem eni nara tingting we yu gat long wan topik we oli givim.
Yu save tokbaot ol aktiviti blong Jos o wan skripja we yu bin ridim i no longtaem, be i save nomol moa bitim hemia. Eksampol:
-
Sapos yu filim insperesen tru long neja, serem fasin blong talem tangkyu blong yu abaot kriesen blong God long wan nara man.
-
maet yu bin gat wan taf eksperiens long saed blong spirit i no long taem i pas. Tokbaot long wan fren blong yu sapos yu filim gud blong serem.
-
Faenem ol samting blong komperem abaot gospel long wan buk o muvi we yu laekem, mo serem ol tingting blong yu.
Nomol
Taem yu stap faenem ol defren wei blong serem ol bilif blong yu, bae i kam moa nomol long yu blong mekem. I maet filim defren smol long stat, !be hemia i oraet! Tingbaot se, testemoni blong yu hemwan i wan nomol samting finis long yu—hem i wan pat blong huia yu. Blong stap serem i save kam nomol tu. I nidim nomo blong yu stap serem smosmol moa evri dei.
?Olsem wanem bae yu serem testemoni blong yu tedei?