“Stap Hang Strong long Trutok” Blong Ol Yut Oli Kam Strong, Julae 2023.
Stap Hang Strong long Trutok
Ol droing oli kam long Ben Simonsen
Fas taem we mi bin luk wan bilding blong Jos, mi bin ting se hem i wan hospital. Hem i klin mo kwaet we. Mi lavem gospel blong Jisas Kraes stret long taem we mi bin go long ol seves blong jos.
Ol sista misinari oli stat blong tijim mi, mo mi disaed blong kasem baptaes. !Dei ia i gud bitim evri dei!
Neba blong mi i bin introdiusum gospel long mi, we hem i wan riten misinari. Hem i singaotem mi long wan Sandei moning mo askem mi blong go long jos wetem hem mo famli blong hem. Fastaem, mama blong mi i se bae mi no save go from mifala i no gat mane blong pem bas. Taem mi talem hemia long neba blong mi, hem i talem se bae hem i tekem mi, mo mama blong mi i letem mi go.
Iven Taem Mifala I Wokbaot Mifalawan
Afta we mi kasem baptaes, mi gat plante hadtaem wetem famli blong mi. Samtaem oli wantem mi blong stap long haos long Sandei, be bae mi jusum blong go long jos. Plante taem hem i had blong gohed traem blong stap long rod blong kavenan.
Sam long ol memba blong famli blong mi oli agensem Jos mo oli bin talem long mi se mi mekem rong joes blong joenem jos. Taem oli stap talem hemia long mi, ol toktok ia oli stap kam long maen blong mi: “Mi save se Papa long Heven mo Jisas Kraes i laef. Mi save se Jos i tru.” Ol tingting ia oli bin helpem mi blong hang strong long trutok.
Ol Aksen blong Yumi I Save Tajem Laef blong Ol Nara Wan
Taem mi stap traehad blong save olsem wanem blong pem taeting, neba blong mi i soem long mi olsem wanem blong pem taeting. Naoia taem mama blong mi i givim smol poket mane blong mi, oltaem mi pem taeting blong mi. Famli blong mi mo mi i bin luk ol blesing blong taeting. !Famli blong mi tu i stat blong givim mane blong olgeta blong pem olsem taeting! Hemia i bin wan sapraes.
Plante taem mi stap go long jos miwan, be samtaem mama blong mi i stap kam wetem mi. Mama blong mi i disaed blong lanem moa abaot gospel mo hem i faenem se hem i hapi tumas, nomata we hem i no baptaes yet.
Prea mo Fet I Jenisim Ol Hat
Mi bin luk han blong Lod insaed long laef blong famli blong mi taem mi stap prea from olgeta mo askem ol nara wan blong prea from olgeta long tempol. Ol memba blong famli blong mi oli kam blong sapotem mi moa, mo naoia oli stap leftemap tingting blong mi blong go long jos mo stap tru long huia mi.
Bubuman blong mi i bin ded i no longtaem, mo mi faenem nem blong hem taem mi stap mekem wok blong famli histri. Mi askem papa blong mi sapos mi save mekem ol odinens blong hem long tempol. Hem i talem se, “Mekem nomo sapos hem i stret samting blong mekem.”
Tru Glad mo Hapines
Blong stap ridim ol skripja mo blong save abaot Atonmen blong Jisas Kraes, i bin karem glad, hapines, pis, mo kamfot long mi.
Mi save se tru long sakrifaes blong Atonmen blong Sevya, mi save stap wetem Papa blong mi long Heven bakegen mo famli blong mi i save stap wetem mi blong taem we i no save finis, sapos mifala i sil long tempol wan dei.
Hem we i raet i blong Vanuatu mo i stap laef long Fiji.