Pikinini Ia We I Lus

Wan boe we i stronghed tumas, i askem blong oli givim wanem we hem i gat raet long hem olsem wan boe mo i lego hom.

Hem i westem evri samting we papa blong hem i givim long hem long ol samting blong mekem hem i harem gud.

Wan taem blong sot long kaekae i kam, mekem se hem i wok blong stap fidim ol pig.

Wan dei hem i luksave se hem i save gobak long hom mo askem help.

Taem hem i kasem haos, hem i askem blong stap olsem wan wokman blong famli blong hem, from hem i bilivim se hem i no gat janis ia blong oli tritim hem olsem boe blong papa blong hem bakegen.

Be papa blong hem i fogivim ol stronghed blong hem mo akseptem hem olsem boe blong hem, mo ful haos i selebret from boe ia i kambak.

Wanem I Minim

Pikinini ia we i lus i ripresentem yumi taem yumi go agensem Papa blong yumi long Heven. Be nomata long weaples yumi bin go long hem o wanem yumi bin mekem, Papa long Heven i wantem yumi blong kambak long hom long Hem mo gospel blong Jisas Kraes.

Yumi no nidim blong yumi stret evriwan. Be yumi mas harem nogud from ol nogud samting yumi mekem mo putum tingting i stap daon, kam long Kraes, mo sakem sin. God bae i kavremap yumi long glori mo soem hamas yumi gat valiu.