“Kwaļo̧k Ta eo Kwoj Iakwe,” N̄an Kōkajoorļo̧k Jodikdik Ro, Juļae 2023.
Kwaļo̧k Ta eo Kwoj Iakwe
Iakwe eo am̧ n̄an gospel in, n̄an ro jet, im n̄an Irooj ej kōkajoor eok n̄an kwaļo̧k gospel in.
N̄an Jibadbad In, jān Yongsung Kim, Havenlight.com
Jinointata in aō kar loļo̧k River Ribble itūrin Preston, England, ke ij jerbal āinwōt juon mijenede em̧m̧an dettan ilo British Mijen eo. Jilu, Rijilōk im mijenede Heber C. Kimball rekar peptaij im erom̧ rioktak ro m̧oktata ilo Kabun̄ eo an Jisōs Kraist me em̧ōj an jepļaaktok itunam̧ōjen wōt North America ilo Juļae 1937.
Ilo aō kar jutak ioon būriij eo im laleļo̧k reba eo im ļōmņak kōn ta eo ekar bōk jikin ijo, ikar bōk juon kam̧ool ekajoor kōn Jisōs Kraist im gospel eo An em̧ōj an jepļaaktok.
Mijen eo aō ekar ļap an em̧m̧an, en̄jake eo aorōktata ilo mour e aō. Rainin, ekkā aō reilikļo̧k kōn lan̄lōn̄ eļap e ikar en̄jake ke ikar joļo̧k eļap iien jān mour e aō n̄an kwaļo̧k gospel eo an Jisōs Kraist. Ijjab maron̄ ļōmņak kōn jabdewōt men eļapļo̧k an aorōk.
Aorōk eo n̄an Kwaļo̧k Gospel eo
Pijaikļo̧k ke kwoj juon rikaļoor an Jisōs Kraist ilo iien Jerkakpeje eo An. Eo jon̄an an naaj kar em̧m̧an n̄an loe E im ron̄ ennaan eo An?
Ennaan eo eļap an Irooj eo em̧ōj an jerkakepe ekar juon kūr im kakien n̄an kwaļo̧k gospel eo An. E ekar ba, “koṃwin ilọk, im kōṃṃan ri aelōñ ko otemjej bwe ren rikaḷora” (Matu 28:19), im “koṃwin ilọk ñan aolepen laḷ, im kwaḷọk gospel ñan armej otemjeḷọk” (Mark 16:15).
Būreejtōn Russell M. Nelson ekar kwaļo̧k bwe “gospel eo an Jisōs Kraist ej jan̄in kar ļapļo̧k aikuji jān rainin. … Ewōr juon ad eddo ekwojarjar n̄an jaketo jaketak kajoor im aeņōm̧m̧an eo an Jisōs Kraist ippān aolep ro renaaj ron̄jake im wōn eo enaaj kōtļo̧k bwe Anij en anjo̧ ilo mour ko aer.”1
Irooj ej Aikuji Eok Kiiō
Kwoj mour ilo juon iien aorōk im ejenoļo̧k—epepen eo āliktata m̧okta jān Itok eo Kein Karuo an Jisōs Kraist. Rikanaan Josep Smith ekar kanaan bwe m̧okta jān an Irooj bar itok, “m̧ool eo an Anij enaaj etal wōt kōn kajoor, im jutak ļo̧k iaan, m̧ae ekobrak aolepen laļin, loļo̧k aolep jikin, aolep laļ, im lo̧jiļn̄i otemjeļo̧k renaaj ron̄, m̧ae jibadbad eo an Anij enaaj dedeļo̧k, im bwe Jeova Eļap enaaj ba jerbal in ededeļo̧k.”2
Wōn eo enaaj jipan̄ kōttōprak menin? Kwe!
Kwojjab aikuj in erom̧ juon full-time mijinede n̄an kwaļo̧k gospel eo. Irooj ej aikuji eok kiiō n̄an kōm̧m̧an bwe kwaļo̧k gospel eo An ej juon men ekam̧ōņōņō, gospel aorōk indeeo ilo naan im kōm̧m̧an ko ilo mour in im ej m̧ōttanļo̧k wōn lukkuun kwe.
Pedped ioon Iakwe
Un eo aorōktata jej kwaļo̧k gospel eo ej bwe Irooj ekar kajjitōk ippād n̄ān kōm̧mane. Jet iien emaron̄ pen menin, ak ij kallim̧ur bwe ilo am̧ mije Irooj Jisōs Kraist im jon̄an am̧ iakwe E im jon̄an an Iakwe eok, naaj tōl eok ilo kijejeto ko am̧.
Em̧ōj An Jerkak, jān Greg Olsen
Iakwe eo am̧ n̄an gospel in, ro jet, im aorōktata, iakwe eo am̧ n̄an Irooj enaaj kōkajoor eok n̄an bōk kūr in An ekwojarjar n̄an kwaļo̧k gospel eo An.
Iakwe Gospel eo
Irooj ekar ba, “Ekkatak jān Eō ” (Katak im Bujen ko 19:23; Matu 11:29). Ļapļo̧k in am̧ ekkatak gospel eo im ekkatak kōn Jisōs Kraist im mijen eo An ekwojarjar āinwōt juon Rilo̧mo̧o̧r im Ripinmuur, iakwe eo am̧ n̄an gospel in enaaj ļapļo̧k an eddōkļo̧k.
Kwoj kwaļo̧k iakwe eo am̧ n̄an gospel in ilo am̧ mour kake. Rijilōk Paul ekar katakin, “kwōn juon jon̄ak n̄an ro rej tōmak, ilo naan, ilo kōnono, ilo iakwe, ilo jetōb, ilo tōmak, im ilo kwojarjar” (1 Timote 4:12). Ekkā an armej pidodo aer bōk gospel eo kōnke rekar ioon en̄jake ko rem̧m̧an ippān ro uwaan Kabun̄ in. Jouj im jab mour ilo ittiņo ilo jetōb. “En romaak ami meram” (Matu 5:16) im kwaļo̧k n̄an ro jet bwe gospel eo ej juon m̧ōttan eo aorōk kōn wōn kwe im ta eo kwoj kōm̧m̧ane.
Iakwe Ro Jet
Ļōmņak kōn ro m̧ōttam̧. Kwoj ke kwaļo̧k pija ko, al ko, im m̧ōn̄ā ko rem̧m̧an ippam̧ n̄an er? Kwoj ke kwaļo̧k kapeel ko am̧ im men ko reitok limoim kaki? Bōlen em̧ōj am̧ ļōmņak eļan̄n̄e renaaj errā kōn gospel in eļan̄n̄e kwoj jeere ippāer. Kwojjām̧in naaj jeļā m̧ae kwonaaj kajjeon̄. Būreejtōn Nelson ekar katakin “Aolep armej rej aikuj juon iien em̧m̧an n̄an jeļā kōn jepļaaktok in gospel eo an Jisōs Kraist.”3
Tōpareļo̧k ro m̧ōttam̧, ro uwaan baam̧le eo am̧, ro ritūrum̧, ro ilo kūlaaj eo am̧, im ro jet kōn iakwe—kemeemej bwe rej ro jeim̧ im jatūm̧ im ajri ro raorōk nejin Jem̧am Ilan̄—im kwonaaj loe an pidodoļo̧k kwaļo̧k gospel in ippāer.
Iakwe Irooj
Āinwōt membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata, enaan eo ad n̄an laļ in ej bwe Jisōs Kraist emour! E em̧ōj an kōm̧m̧an bwe kajjojo iaad en maron̄ bōk mour indeeo eo im mour indeeo ijo eutiejtata.
Kwonaaj en̄jake iakwe eo an Irooj n̄an eok ilo am̧ kejo̧klo̧kjeņ kōn aolep men ko E ekar kōm̧m̧ane n̄an eok. Am̧ enaaj obrak kōn iakwe n̄an E, im kwonaaj loe bwe kwojjab maron̄ dāpiji wōt ak etal im kwaļo̧k m̧ool ko reļļap em̧ōj am̧ bōki jān E.
Ļap In Am̧ Naaj Lañlōñ
Im̧we in en̄jake eo aō ilo ioon būriij eo ioon Reba Ribble āinwōt juon mijenede em̧m̧an dettan ekar boktok n̄an eō lan̄lōn̄ indeeo eo kar kallim̧uri n̄an ro rej kwaļo̧k gospel eo (lale Katak im Bujen ko 18:15).
Āinwōt juon Rijilōk eo an Irooj Jisōs Kraist, eļapļo̧k aō jeļā rainin bwe kwaļo̧k gospel eo ej juon lan̄lōn̄ im juon wāween eļap ilo kwaļo̧k iakwe eo ad n̄an gospel eo em̧ōj an jepļaaktok, n̄an ajri ro nejin Anij, im n̄an Irooj.
Elder Cook ej kōnono ippān rūm̧m̧anded ro rekar ko jān Taal Volcano eo ilo Batangas, Philippines, ilo Janwōde 15, 2020.
Ij kam̧ool bwe ilo am̧ bōk kūr eo an Irooj im kwaļo̧k ta eo kwoj iakwe, kwoj jipan̄ E kalōk Kabun̄ eo An im kōpooj laļ in n̄an jepļaaktok eo An, n̄e “Enaaj peek kiin̄ ioon kiin̄ ro im Irooj ioon Irooj ro.”4 Ij jar bwe kwonaaj ļoor E im kwaļo̧k gospel eo An ilo aolepen mour eo am̧.