“11 Bwebwenato ko Relukkuun Kadu kōn Kwaļo̧k kōn Gospel ,” N̄an Kōkajoorļo̧k Jodrikdrik Ro, Juļae 2023
11 Bwebwenato ko Relukkuun Kadu kōn Kwaļo̧k kōn Gospel
Im kwomaron̄ bar kwaļo̧ki!
Kwaļo̧k Wāween an Gospel eo Maron̄ Jipan̄
Ikar pād ilo kūlaaj eo juon raan jijet tūrin juon m̧ōtta. Kōm ekar kōppopo n̄an bōke juon exam, im ekar ba n̄an eō bwe ekar kanoojin ikūm̧kūm̧. Ikar en̄jake bwe ikar aikuj katakin e kilen jar. Innem kom̧ro jim̧or ekar jillak im jar ilo buruōm̧ro n̄an jipan̄ kōn test eo. Ij kam̧m̧oolol bwe jar emaron̄ jipan̄ kaeņōm̧m̧an ikūm̧kūm̧ eo an eo m̧ōtta.
Abigail, Uruguay
Jerbal in Karejar n̄an Armej ro rej Aikuj
Ekar wōr juon leļļap ilo ward eo amim eo ekar jab maron̄ itok im jar ilo kweilo̧k in kwojkwoj eo kōn jet m̧ōjņo̧ ilo ānbwin. Kom̧ro jema ekar kajjitōk ippān bisop eo eļan̄n̄e kom̧ro maron̄ bokļo̧k kwojkwoj eo n̄an m̧weo im̧ōn aolep wiik. Ļāeo ippān, eo ekar jako an kobatok, ekar jino bar bōke kwojkwoj eo. Kobaiktok Israel ej meļeļein jej aikuj karuwaineneik ro jet n̄an itok epaakļo̧k n̄an Jisōs Kraist. Jerbal in karejar ej m̧ōttan eo eļap.
Shion, Utah, USA
Karuwaineneik n̄an juon Makūtkūt
Ikar iuwe ilo juon baajkōļ itūrinļo̧k juon m̧ōn jar ke ikar loe bujin armej ro rej tuuj. Ikar ikkūrļo̧k n̄an juon likao (ņae etan Courage) im kajjitōk ippān ta eo rej kōm̧m̧ane. Ekar ba rekar itok n̄an kūlaaj ko ņae etan jemenere. Ekar jiron̄ eō bwe enaaj kar wōr juon m̧akūtkūt ilo m̧ōn jar eo im ekar kajjitōk eļan̄n̄e imaron̄ etal ippān. Courage, āinwōt juon m̧ōtta, ekar kanoojin ukōt mour eo aō ilo an jipan̄ eō jeļā kōn gospel eo.
David, Ghana
Erom̧ juon Waanjon̄ak
Ekar ļap aō ekkatak jān aō alooje ļaddik eo jeiū. Em̧m̧an ippa ikkure video game im soccer, im, m̧ool, imaron̄ kar bōlen kōm̧mane men kein aolep iien n̄e enkar jab e. Ebar em̧m̧an ippān men ko, im eļap iien ko kom̧ro ej ikkure kaki jim̧or, bōtaab aolep iien ekar kōm̧m̧an iien n̄an eddōkļo̧k im em̧m̧anļo̧k. Ijjāmin meļo̧kļo̧k aer kar kapoik eō n̄an bōk uno ko rekajoor ilo jikin jikuuļ. Ikar m̧ōkaj aō ļōmņak kōn brother eo aō im ikar jeļā ta eo enkar kāālete; kōnke ikar kōņaan āinwōt e, ikar kōm̧m̧ane kāālet eo ejim̧we im ba jaab.
Emilio, Tennessee, USA
Jipan̄ Ro Jet En̄jake Iakwe eo An Kraist
Ilo juon iien kweilo̧k an FSY, ikar kanoojin en̄jake aō ajimakeke. Ikar jar aolep raan, kōjatdikdik n̄an en̄jake Jetōb im iakwe eo an Jisōs Kraist. Ālkin juon iaan ekōnono ko, juon jiron̄ ekar jab ļap aō jeļā kajjeen ekar itok im atabo̧kwij eō. Ikar en̄jake iakwe eo an Kraist ilo atabo̧kwij eo an, āinwōt n̄e E ekar jirōn eō bwe E ej iakwe eō.
Natalie, Chile
Ļoor Im̧we ko
Juon raan ekar wōr juon aō im̧we jān jetōb bwe ij aikuj karuwaineneik eo lukkuun m̧ōtta ilo jikin jikuuļ n̄an juon nokon. Ikar kōņaan kejool im̧we eo, bōtaab āliktata ikar jilkinļo̧k juon text n̄ane raan eo m̧okta. Ilo am̧ro jijet ippān doon ilo nokon eo, ikar ikūm̧kūm̧. Ak ke ej jem̧ļo̧k kweilo̧k eo, ekar wōr juon mejen etōn̄dikdik eļap ilo mejen. Ekar juon kein kakemeemej n̄an eō bwe Anij ejeļā ajri ro Nejin eļapļo̧k jān aō jelā im bwe ij aikuj iien otemjej ļoor im̧we ko n̄an kwaļo̧k gospel eo an Jisōs Kraist.
Eliza, Minnesota, USA
Jar kōn Ta eo n̄an Ba
Kom̧ro sister eo aō kar membōr ro wōt ilo Kabun̄ in ilo m̧ōn jikuuļ eo amim. Armej rekar kile bwe kōm ekar oktak im aolep iien rej kajjitōk kajjitōk ko. Kar m̧okta ikar ikūm̧kūm̧ in kōņono n̄an er, ak ikar jar n̄an maron̄ ba ta eo ejim̧we, im rekar ron̄jake im kautiej kāālet ko aō.
Ruben, Norway
Kwaļo̧k M̧ool ko An Goslep ilo Online
N̄an juon kōttōpar, ikar lale Itok, Ļoor Eō im lo eoon ko im kout ko n̄an kwaļo̧ki ilo social media. Ikar bōk jet kakkobaba jān armej ro rej ba rekar en̄jake Jetōb eo kōn post ko aō. Kwaļo̧k gospel eo emaron̄ jipan̄ ro jet ilo wāween ko jejjab maron̄ ļōmņaki ilo iien eo.
Raquel, Brazil
Kwon Mejādik!
Ilo juon iaan kūlaaj ko aō ilo jikin jikuuļ, kōm ekar riiti juon bok me ej kōknanaik Kabun̄ in. Ikar aikuj kwaļo̧k ainikiō kōn m̧ool ko an gospel eo me em̧ōj an jepļaaktok. Kōn menin ikar kajutak peiū. Rikaki eo ekar jitōn̄ eō, ak ikar jaje ta eo in ba. Kōn jet un ko, ikar jinoe al al ko an Laajrak ko in Tōmak. Ikar ilbōk, ekar itok juon en̄jake in kautiej ilo ruum̧ eo. Ālkintok ekar dikļo̧k pok ilo kōļmenļo̧kjeņ, im rikaki eo aō im ro ilo kūlaaj eo aō rekar em̧m̧an aer tōl ekōnono ko an kūlaaj eo im n̄a ilo eļapļo̧k kautiej.
Monique, Massachusetts, USA
Erom̧ juon Meram
Ke ekar 15 aō iiō, ikar kāālet bwe inaaj kar kappukot juon m̧ōnjar n̄ān kobaļo̧k ie. Jejjo raan tokālik, Ikar jino m̧ōttā ippān juon leddik ilo jikuuļ eo me ekar wōr juon meram kōn e. Jejjo wiik ko tokālik, ekar karuwaineneik eō n̄an m̧weo im̧ōn. Ke ikar tōparļo̧k ijo, baam̧le eo an rekar karuwaineneik eō n̄an kobaļo̧k ippāer ilo nokon eo an baam̧le. Ikar jino ikdeelel ilo Kabun̄ eo an Jisōs Kraist im Armej ro Rekwojarjar ilo Raan ko Āliktata, eļaptata kōn jon̄an an baam̧le eo an eo m̧ōtta m̧ōņōņō joteenen eo.
McKaylie, Colorado, USA
Jeer Kōn Iakwe
Eo riilikū ekar rojan̄ eō n̄an ioon mijenede ro, ikar ļōmņak, kōnke ekar kōņaan bwe in m̧ōņōņō ilo kōjeram̧m̧an ko ej m̧ōņōņō kaki ilo iien eo. Ikar en̄jake bwe eo riilikū im eo m̧ōtta, Enoch, rekar iakwe eō im kōņaan juon men em̧m̧an n̄an eō. Ekar kōm̧m̧ane menin an koņ aō etal im jar.
Eric, Ghana