“N̄e Kāālet ko An Armej Ro Jet Rej Kōmetak Eok,” N̄an Kōkajoorļo̧k Jodikdik Ro, Juļae 2023.
N̄e Kāālet ko An Armej Ro Jet Rej Kōmetak Eok
Erkein jet men ko n̄an kemeemeji n̄e ro jet rej kāālet anemkwoj in kāālet eo aer ilo jekjek ko me rej kōmetak eok.
Kōmeļeļe ko jān Shana Keegan
Kwoj kōm̧m̧an elōn̄ im lōn̄ kāālet ko kajjojo raan—ta eo n̄an kōņake, ta eo n̄an m̧ōn̄ā in jibbon̄, wōn ro m̧ōttam̧ n̄an aitōl er. Anemkwoj in kāālet, ak anemkwoj eo n̄an kāālet im n̄an m̧akūtkūt, ej juon iaan menin letok ko reļaptata em̧ōj an Anij letok n̄an kōj.
Kāālet ko ad ebar wōr aer ajāllik, im jet iien kāālet ko an ro jet remaron̄ kōmetak kōj. Eļan̄n̄e kar kalbuuji kwe kōnke kōn juon men bratōr eo am̧ ekar kōm̧m̧ane, kwojeļā jon̄an an pen n̄e jet armej rej kōjerbal anemkwoj in kāālet eo aer ilo jekjek ko kwodiki!
Bōtaab jet iien ewōr men ko eļapļo̧k aer nana me armej remaron̄ kōjerbal anemkwoj in kāālet eo aer n̄ani. Ajri ro ilo jikin jikuuļ remaron̄ kamijak eok, ak bōlen juon uwaan baam̧le eo am̧ ej kāālet n̄ān eļļo̧k jān Kabun̄ in. Elōn̄ im lōn̄ iien ko jej loe an mour in jab jejjōt. Āliktata in men otemej, kwoj kajjeon̄ n̄an kōjerbal anemkwoj in kāālet eo am̧ n̄an kōm̧m̧ane kāālet ko rejim̧we—kōn menin etke rejjab?
Aaet, koban maron̄ kōjebwebweik ro jet. Ak nuuj eo em̧m̧an in bwe kwe komaron̄ ukōt eok make. Karōk in kōttōpar eo ej n̄an ukōt ta eo kwoj mije im n̄an kōm̧m̧an kāālet ko rem̧m̧an men̄e ro jet rejjab.
Erkein jet men ko n̄an kemeemeji kōn wōnm̧aanļo̧k wōt kōn tōmak, men̄e armej ro jet rej kōjerbal anemkwoj in kāālet ko aer ilo jekjek ko me rej kōmetak eok:
-
Setan ekar kappukot n̄an kakkure anemkwoj in kāālet (lale Moses 4:3). Jekdoon ta epen n̄an lale an ro jet kōm̧m̧ani kālet ko renana, kwoj barāinwōt anemkwoj n̄an kōm̧m̧ani kāālet ko rem̧man n̄an ļoor Jisōs Kraist im erom̧ āinwōt E!
-
Kōm̧m̧an ko am̧ ewōr tokjān. Kemeemej, “Jej anemkwoj n̄an kāālet, bōtaab jejjab maron̄ kāālet ajāllik ko.”1 Loe wāween an kāālet ko an ro jet jelōt eok emaron̄ juon kein kakemeemej n̄an eok n̄an kōm̧m̧ani kāālet ko me rejjab kōjorreen eok ak ro jet.
-
Aolep rej eddo n̄an kāālet ko aer make (lale Katak im Bujen Ko 101:78). Kwojjab aikuj in eddodo kōn en̄jake eo ke ej am̧ eddo eo n̄an ukōt ro jet ak kāālet ko aer. Ijjelo̧kin, kwomaron̄ pedped ioon kōm̧m̧an kāālet ko rem̧m̧an im ļoor Jisōs Kraist.
-
Kwomaron̄ kāālet n̄an jouj. Juon armej emaron̄ nana n̄an kwe, ak kwomaron̄ kāālet wōt n̄an jouj n̄an er. Ebōk peran n̄an jouj n̄an armej im jeorļo̧k aer bōd n̄e rejjab jouj n̄an kwe, ak lukkuun en̄in ta eo Jisōs enkar kōm̧m̧ane (lale Luk 23:34).
-
Kwoj aikuj pedped ioon ta eo kwomaron̄ kōjebwebweik. Kwomaron̄ jab maron̄ in kabōjrak ro jinōm̧ im jem̧ōm̧ jān aer jepel, n̄an waanjon̄o̧k, ak kwomaron̄ kāālet n̄an ped wōt ilo iaļan bujen eo, jipan̄ ro jeim̧ im jatūm̧, ekkatak kōn jemjerā ko rewāmourur, im kōm̧m̧ani kōttōpar ko n̄an baam̧le eo am̧ make ilju im jakļaj. Kāālet n̄an ukot apan̄ ko am̧ n̄an iien ko raorōk n̄an eddōkļo̧k im ekkatak.
-
Ewōr ippam̧ juon piktok im un ekwojarjar. N̄e kwoj kemeemej piktokim̧ āinwōt juon ajri nejin Anij im kajim̧we mije eo am̧ ilo kōttōpar ko am̧ ilo mour in, kwomaron̄ loe pija eo ekilep. Mije jibadbad eo am̧ im lo bwe apan̄ kein rej juon m̧ōttan edik ilo bwebwenato in mour eo am̧ emaron̄ jipan̄ eok wōnm̧aanļo̧k ilo tōmak.
-
Kōn tōmak ilo Jisōs Kraist, kwomaron̄ lo aeņōm̧m̧an eo am̧ make, men̄e men ko ipeļaakūm̧ rejjab aeņōm̧m̧an. Būreejtōn Russell M. Nelson ekar ba, “Jemaron̄ en̄jake niknik in aeņōm̧m̧an im lan̄lōn̄, men̄e ilo iien ko renana.”2 Mour in ej juon lo̧jet elim̧aajņo̧ņo, im epidodo n̄an kōņaan bwe Anij en kalūr ļan̄ ko n̄an kōj. Ak jet iien ijjeļo̧kin An kalūr lo̧jet eo, E ej kalūr kōj, rijerakrōk ro. Oktakļo̧k n̄an E kōn inepata ko am̧, im E enaaj jipan̄ eok.
Anij ekar lewaj n̄an eok anemkwoj eo n̄an kāālet n̄an ļoor E im aaet erom̧ āinwōt E. Ilo am̧ kōm̧m̧ane, kwonaaj make ekkatak jān kāālet ko im bōd ko am̧ make im jān kāālet ko an ro jet. Men̄e epen n̄an lale an armej kōm̧m̧ani kāālet ko me rej kōmetak eok, kwomaron̄ ekkatak jān en̄jake ko im wōnm̧aanļo̧k kōn un, tōmak, im lan̄lōn̄.