“Vahevahe e Meʻa ʻOkú Ke ʻOfa Aí,” Ki Hono Fakamālohia ʻo e Toʻu Tupú, Siulai 2023.
Vahevahe e Meʻa ʻOkú Ke ʻOfa Aí
ʻOku fakamālohia koe ʻe hoʻo ʻofa ki he ongoongoleleí, ki he niʻihi kehé, pea mo e ʻEikí ke ke vahevahe ʻa e ongoongoleleí.
For This Purpose [Koe‘uhí Ko e Taumuʻa Ko ʻEní], tā ‘a Yongsung Kim, Havenlight.com
Naʻá ku fuofua ʻaʻahi ki he Vaitafe Līpoló ofi ki Pelesitoni, ʻIngilani, lolotonga ʻeku ngāue fakafaifekau kei talavou ʻi he Misiona Pilitāniá. Naʻe papitaiso ai ʻe he ʻAposetolo mo e faifekau ko Hiipa C. Kimipoló ʻa e kau fuofua papi ului ki he Siasi ʻo Sīsū Kalaisi kuo fakafoki maí, mavahe mei ʻAmelika Tokelau, ʻi Siulai ʻo e 1837.
ʻI heʻeku tuʻu ʻi ha hala fakakavakava ʻo vakai hifo ki he vaitafé mo fakakaukau ki he meʻa naʻe hoko aí, ne u maʻu ha fakamoʻoni mālohi kia Sīsū Kalaisi mo ʻEne ongoongolelei kuo fakafoki maí.
Naʻe hoko ʻeku ngāue fakafaifekaú ko ha aʻusia fakaʻofoʻofa mo mahuʻinga ʻi heʻeku moʻuí. ʻI he ʻaho ní, ʻoku ou faʻa fakakaukauloto ki he fiefia kuó u maʻu ʻi hono fakaʻaongaʻi ha konga lahi ʻo ʻeku moʻuí ki hono vahevahe ʻo e ongoongolelei ʻo Sīsū Kalaisí. ʻOku ʻikai ke u lava ʻo fakakaukau ki ha meʻa ʻe toe mahuʻinga ange.
Ko e Fiemaʻu ke Vahevahe ‘a e Ongoongoleleí
Fakakaukauloto naʻá ke hoko ko ha ākonga ʻo Sīsū Kalaisi ʻi he taimi ʻo ʻEne Toetuʻú. Ne mei fakaʻofoʻofa fēfē nai ke mamata kiate Ia mo fanongo ki Heʻene pōpoakí?
Ko e pōpoaki fakaofo ʻa e ʻEiki kuo toetuʻú ko ha fakaafe mo ha fekau ke vahevahe ʻEne ongoongoleleí. Naʻá Ne folofola, “Ko ia ke ʻalu ʻa kimoutolu, ʻo fakalotuʻi ʻa e ngaahi puleʻanga kotoa pē” (Mātiu 28:19), pea “mou ʻalu atu ki māmani kotoa pē, ʻo malanga ʻaki ʻa e ongoongoleleí ki he kakai fulipē” (Maʻake 16:15).
Naʻe fakahā ʻe Palesiteni Lāsolo M. Nalesoni ʻo pehē “ʻoku fiemaʻu lahi ange e ongoongolelei ʻo Sīsū Kalaisí ʻi he ʻahó ni ʻi ha toe taimi kimuʻa. … ʻOku ʻi ai hotau fatongia toputapu ke vahevahe e mālohi mo e melino ʻa Sīsū Kalaisí kiate kinautolu kotoa pē ʻe fie fanongo mo tuku ke pule e ʻOtuá ʻi heʻenau moʻuí.”1
ʻOku Fiemaʻu Koe ʻe he ʻEikí he Taimí Ni
ʻOkú ke moʻui ʻi ha kuonga makehe mo mahuʻinga—ko e kuonga fakaʻosi kimuʻa ʻi he Hāʻele ʻAnga Ua Mai ʻa Sīsū Kalaisí. Naʻe kikiteʻi ʻe he Palōfita ko Siosefa Sāmitá ʻe to e hāʻele mai ʻa e ʻEikí, “ko e moʻoni ʻa e ʻOtuá ʻe kei laka taʻeufi atu pē, ʻi he fakaʻeiʻeiki mo e tauʻatāina, kae ʻoua kuo hū atu ki he konitinēniti kotoa pē, aʻu ki he faʻahinga kotoa pē, ʻuʻufi ʻa e fonua kotoa, pea mo ongona ʻe he telinga kotoa, kae ʻoua kuo fakahoko ʻa e ngaahi taumuʻa ʻa e ʻOtuá, pea folofola ʻa Sihova Māfimafi kuo lava ʻa e ngāué.”2
Ko hai ʻe tokoni ke aʻusia ʻení? Ko koe!
ʻOku ʻikai fiemaʻu ia ke ke hoko ko ha faifekau taimi kakato ke vahevahe ʻa e ongoongoleleí. ʻOku fiemaʻu koe ʻe he ʻEikí he taimí ni ke ke vahevahe ʻEne ongoongolelei fakafiefia mo mahuʻinga taʻengatá ʻi he leá mo e ngāué ko ha tōʻonga moʻui pea mo ha konga ʻo ho tuʻunga totonú.
Nofotaha ‘i he ʻOfá
Ko e ʻuhinga mahuʻinga taha ʻoku tau vahevahe ai e ongoongoleleí koeʻuhí he kuo kole mai ʻe he ʻEikí ke tau fai ia. ʻE lava ke faingataʻa ʻeni he taimi ʻe niʻihi, ka ʻoku ou palōmesi atu ʻi hoʻo tokanga taha ki he ʻEiki ko Sīsū Kalaisí pea mo e lahi hoʻo ʻofa kiate Iá mo e lahi ‘o ʻEne ʻofa ʻiate koé, ʻe tataki koe ʻi hoʻo ngaahi feingá.
Kuó Ne Toe Tuʻu, tā ʻa Greg Olsen
ʻE fakamālohia koe ʻe hoʻo ʻofa ki he ongoongoleleí, ki he niʻihi kehé, pea mahuʻinga tahá, ʻa hoʻo ʻofa ki he ʻEikí ke ke tali ʻEne fakaafe fakalangi ke vahevahe ʻEne ongoongoleleí.
ʻOfa ʻi he Ongoongoleleí
Kuo folofola ʻa e ʻEikí ʻo pehē, “Ako ʻiate au” (Tokāteline mo e Ngaahi Fuakava 19:23; Mātiu 11:29). Ko e lahi ange hoʻo ako e ongoongoleleí mo ako kia Sīsū Kalaisi mo Hono misiona toputapu ko e Fakamoʻui mo e Huhuʻí, ko e lahi ange ia e tupulaki hoʻo ʻofa ki he ongoongoleleí.
ʻOkú ke vahevahe hoʻo ʻofa ki he ongoongoleleí ʻi hoʻo moʻui ʻaki iá. Naʻe akonaki ʻa e ʻAposetolo ko Paulá ʻo pehē, “[Ke] ke ʻi he kakai tuí ko e fakaʻilonga, ʻi he lea, mo e ʻulungaanga, mo e ʻofa, mo e faianga, mo e tui, mo e māʻoniʻoni” (1 Tīmote 4:12). ʻOku faʻa tali ʻe he kakaí ʻa e ongoongoleleí koeʻuhí he kuo nau maʻu ha ngaahi aʻusia lelei mo ha kāingalotu ʻo e Siasí. Kātaki ʻo ʻoua naʻa mou fakapulipuliʻi hoʻomou ʻilo fakalaumālié. “Tuku ke ulo [atu] hoʻomou māmá” (Mātiu 5:16) pea fakahā ki he niʻihi kehé ko e ongoongoleleí ko ha konga mahuʻinga ia ʻo ho tuʻunga totonú mo e meʻa ʻokú ke faí.
ʻOfa he Niʻihi Kehé
Fakakaukau ki hoʻo ngaahi kaungāmeʻá. ʻOkú ke vahevahe nai ʻa e ʻū faiva, mūsika, mo e meʻakai ʻokú ke saiʻia aí mo kinautolu? ʻOkú ke vahevahe nai ho ngaahi talēnití mo e ngaahi meʻa ʻokú ke manako aí? Mahalo kuó ke fifili pe te nau tali nai ʻa e ongoongoleleí kapau te ke vahevahe ia mo kinautolu. He ʻikai te ke teitei ʻilo kae ʻoua leva kuó ke ʻahiʻahiʻi. Kuo akoʻi mai ʻe Palesiteni Nalesoni ʻo pehē, “ʻE fiemaʻu ʻe he taha kotoa pē ha faingamālie ke ne ʻilo fekauʻaki mo e ongoongolelei ʻo Sīsū Kalaisi kuo fakafoki maí.”3
Tokoniʻi ʻi he ʻofa ʻa e ngaahi kaungāmeʻá, kau mēmipa ʻo e fāmilí, kaungāʻapí, kaungāakó, pea mo e niʻihi kehé—ʻo manatuʻi ko ho ngaahi tokoua, tuofāfine, tuongaʻane mo e fānau ʻofeina kinautolu ʻa hoʻo Tamai ʻi Hēvaní—pea te ke ʻiloʻi leva ai ʻoku faingofua ange ke vahevahe ʻa e ongoongoleleí mo kinautolu.
ʻOfa ki he ʻEikí
ʻI heʻetau hoko ko e kāingalotu ʻo e Siasi ʻo e Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko ʻetau pōpoaki ki he māmaní ʻoku moʻui ʻa Sīsū Kalaisi! Kuó Ne fakafaingofuaʻi ke tau takitaha malava ʻo maʻu e fakamoʻuí mo e hakeakiʻí.
Te ke ongoʻi e ʻofa ʻa e ʻEikí kiate koé ʻi hoʻo fakalaulauloto ki he meʻa kotoa pē kuó Ne fai maʻau. ʻE fonu ho laumālié ʻi he ʻofa kiate Iá, pea te ke ʻiloʻi he ʻikai te ke lava ʻo taʻe vahevahe ʻa e ngaahi moʻoni fakaʻofoʻofa kuó ke maʻu meiate Iá.
ʻE Lahi Hoʻomou Fiefiá
Naʻe ʻomi ʻe heʻeku aʻusia fakalaumālie ʻi he hala fakakavakava he Vaitafe Līpoló ʻi heʻeku hoko ko ha faifekau kei talavoú, ʻa e fiefia taʻengata naʻe talaʻofa maʻanautolu ʻoku nau vahevahe ʻa e ongoongoleleí (vakai, Tokāteline mo e Ngaahi Fuakava 18:15).
ʻI heʻeku hoko ko ha ʻAposetolo ʻa e ʻEiki ko Sīsū Kalaisí, ʻoku ou toe fakapapauʻi ange he ʻahó ni ko hono vahevahe ko ia ʻo e ongoongoleleí ko ha fiefia mo ha fakahaaʻi moʻoni ia ʻo ʻetau ʻofa ki he ongoongolelei kuo fakafoki maí, ki he fānau ʻa e ʻOtuá, pea ki he ʻEikí.
Ko e talanoa ʻa ʻEletā Kuki mo e toʻu tupu ne nau hola mei he Moʻunga Afi Taʻala ʻi Patangasi, Filipaini, ʻi he ʻaho 15 ʻo Sānuali 2020.
ʻOku ou fakamoʻoni ko e taimi te ke tali ai e fakaafe ʻa e ʻEikí mo vahevahe ʻa e meʻa ʻokú ke ʻofa aí, ʻokú ke tokoni ai kiate Ia ke langa hake Hono Siasí mo teuteuʻi ʻa e māmaní ki Heʻene liuaki maí, ki he taimi “te Ne pule ai ko e Tuʻi ʻo e Ngaahi Tuʻí mo e ʻEiki ʻo e Ngaahi ʻEikí.”4 ʻOku ou lotua te mou muimui kiate Ia mo vahevahe ʻEne ongoongoleleí ʻi he kotoa hoʻomou moʻuí.