Ngaahi Talanoa Nounou Moʻoni ʻe 11 fekauʻaki mo hono Vahevahe ʻo e Ongoongoleleí

Pea mo e founga te ke lava ai foki mo koe ʻo vahevahe iá!

Fakahaaʻi e Founga ʻe Lava ke Tokoni ai e Ongoongoleleí

Naʻá ku ʻi he kalasí ʻi ha ʻaho ʻe taha ʻo tangutu ʻi he tafaʻaki hoku kaungāmeʻá. Naʻa mau teuteu ke fai ha sivi, pea naʻá ne talamai naʻá ne fuʻu tailiili ʻaupito. Naʻá ku ongoʻi naʻe fiemaʻu ke u akoʻi ia ki he founga ʻo e lotú. Hili iá naʻá ma fakatou punou homa ʻulú ʻo lotua fakalongolongo ha tokoni ki he siví. ʻOku ou houngaʻia ʻi he lava ʻe he lotú ʻo tokoni ke fakanonga e ngaahi neave ʻo hoku kaungāmeʻá.

ʻApikale, ʻUlukuei

Ngāue Fakaetauhi ki he Kakai Faingataʻaʻiá

Naʻe ʻi ai ha fefine toulekeleka ʻi homau uōtí naʻe ʻikai ke ne lava ʻo haʻu ki he houalotu sākalamēnití koeʻuhí ko ha ngaahi palopalema fakaemoʻui lelei. Naʻá ku kole mo ʻeku tamaí ki he pīsopé pe ʻe lava ke ma ʻave ʻa e sākalamēnití ki hono ʻapí ʻi he uike kotoa pē. Naʻe kamata foki mo hono husepānití, ʻa ia naʻe māmālohi peé, ke maʻu ʻa e sākalamēnití. ʻOku ʻuhinga hono tānaki ʻo ʻIsilelí ʻoku fiemaʻu ke tau fakaafeʻi e niʻihi kehé ke nau ʻunu ke ofi ange kia Sīsū Kalaisi. Ko e ngāue fakaetauhí ko ha konga lahi ia ʻo e meʻa ko iá.

Saioni, ʻIutā, USA

Fakaafeʻi ki ha ʻEkitivitī

Naʻá ku heka pasikala ʻo lele atu ʻi ha veʻe ʻapisiasi peá u sio atu ki ha kakai tokolahi ʻoku nau hulohula ai. Naʻá ku ui atu ki ha talavou (ko hono hingoá ko Toʻa) peá u fehuʻi ange pe ko e hā ʻenau meʻa naʻe faí. Naʻá ne talamai ne nau faʻa omi ki he ngaahi kalasi ai naʻe ui ko e seminelí. Naʻá ne talamai ʻe fai ha ʻekitivitī ʻi he ʻapisiasí peá ne fehuʻi mai pe te ma omi ki ai. ʻI he hoko ʻa Toʻa ko hoku kaungāmeʻá, naʻá ne liliu moʻoni ʻeku moʻuí ʻaki ʻene tokoniʻi au ke u ʻilo ʻa e ongoongoleleí.

Tēvita, Kana

Hoko ko ha Faʻifaʻitakiʻanga

ʻOku ou ako ha meʻa lahi ʻi heʻeku siofi hoku taʻoketé. ʻOku ou saiʻia ʻi he keimi vitioó mo e soká, pea ko hono moʻoní, mahalo ne u mei fakahoko pē ʻa e ongo meʻa ko iá he taimi kotoa pē kapau naʻe taʻeʻoua hoku taʻoketé. ʻOkú ne saiʻia foki ʻi he ongo meʻa ko iá, pea ko e taimi lahi ʻokú ma vaʻinga fakataha ai, ka ʻokú ne tuku maʻu pē ha taimi ke tupulaki mo fakalakalaka ai. He ʻikai toe ngalo ʻiate au hono fakaafeʻi au ke u ʻahiʻahiʻi e faitoʻo konatapú ʻi he akó. Tuaiekemo ne u fakakaukau ki hoku taʻoketé peá u ʻiloʻi e meʻa te ne filí; koeʻuhí ko ʻeku fakaʻamu ke tatau mo iá, naʻá ku fai ʻa e fili totonú peá u talaange ʻikai.

ʻĒmiliō, Tenesī, USA

Tokoniʻi ʻa e Niʻihi Kehé ke Nau Ongoʻi ʻa e ʻOfa ʻa Kalaisí

Lolotonga ha konifelenisi KFT, naʻá ku ongoʻi tuenoa ʻaupito. Naʻá ku lotu ʻi he ʻaho kotoa pē, ʻo fakaʻamu ke u ongoʻi ʻa e Laumālié mo e ʻofa ʻa Sīsū Kalaisí. Hili ha taha ʻo e ngaahi leá, ne haʻu ha finemui naʻe ʻikai ke u fuʻu ʻiloʻi lelei ʻo ne fāʻofua mai kiate au. Naʻá ku ongoʻi e ʻofa ʻa Kalaisí ʻi heʻene fāʻofua mai kiate aú, ʻo hangē ʻokú Ne folofola mai ʻokú Ne ʻofa ʻiate aú.

Natalie, Silei

Muimui ki he Ngaahi Ueʻí

ʻI ha ʻaho ʻe taha naʻá ku maʻu ha ueʻi fakalaumālie ʻoku totonu ke u fakaafeʻi hoku kaungāmeʻa mamae mei he akó ki ha fakataha lotu. Naʻá ku fie tukunoaʻi pē ʻa e ueʻi ko iá, ka naʻe faifai peá u ʻave ha text kiate ia ʻi he ʻaho kimuʻá. ʻI heʻema tangutu fakataha ʻi he fakataha lotú, naʻá ku manavasiʻi. Ka ʻi he ʻosi ʻa e fakatahá, naʻá ne malimali. Ne hoko ia ko ha fakamanatu kiate au ʻoku ʻafioʻi ʻe he ʻOtuá ʻa ʻEne fānaú ʻo lelei ange ʻiate au pea ʻoku totonu ke u muimui maʻu pē ki he ngaahi ueʻi ke vahevahe ʻa e ongoongolelei ʻo Sīsū Kalaisí.

ʻIlaise, Minesota, USA

Lotua e Meʻa ke Lea ʻAkí

Ko au pē mo hoku tuofefiné ʻokú ma kau ki he Siasí ʻi homau ʻapiakó. ʻOku fakatokangaʻi ʻe he kakaí ʻokú ma makehe pea ʻoku nau ʻeke maʻu pē ha ngaahi fehuʻi. ʻI he kamataʻangá naʻá ku manavasiʻi ke talanoa kiate kinautolu, ka naʻá ku lotua ke u lava ʻo lea ʻaki ʻa e meʻa totonú, pea kuo nau fakafanongo mo fakaʻapaʻapaʻi ʻeku ngaahi filí.

Lūpeni, Noauei

Vahevahe ʻa e Ngaahi Moʻoni ʻo e Ongoongoleleí ʻi he ʻInitanetí

Naʻá ku fekumi ʻi he Haʻu, ʻo Muimui ʻIate Aú ʻo ʻilo ha ngaahi potufolofola mo ha ngaahi lea ke vahevahe ʻi he mītia fakasōsialé, koeʻuhí ko ha taumuʻa. Ne u maʻu ha ngaahi fakamatala mei he kakaí ʻo nau pehē ne nau ongoʻi e Laumālié ʻo fakafou ʻi he meʻa naʻá ku vahevahé. ʻE ala tokoni hono vahevahe ʻo e ongoongoleleí ki he niʻihi kehé ʻi ha ngaahi founga ʻoku ʻikai ke tau lava ʻo fakakaukau ki ai ʻi he momeniti ko iá.

Lakuela, Palāsila

ʻAi ke ke Mohu Founga

ʻI ha taha ʻo ʻeku ngaahi kalasi fakaakó, naʻa mau lau ai ha tohi naʻá ne fakaangaʻi ʻa e Siasí. Naʻá ku ʻiloʻi naʻe fiemaʻu ke u lea ʻo kau ki he ngaahi moʻoni ʻo e ongoongolelei kuo fakafoki maí. Ko ia naʻá ku hiki hake leva hoku nimá. Naʻe ui mai au ʻe he faiakó, ka naʻe ʻikai ke u ʻilo pe ko e hā e meʻa te u lea ʻakí. Naʻe fakafokifā pē ʻeku kamata hivaʻi ʻa e ngaahi hiva ʻo e Ngaahi Tefito ʻo e Tuí. Naʻá ku ʻohovale ʻi he kāpui ʻa e lokí ʻe ha ongoʻi ʻapasia lahi. Hili iá naʻe siʻisiʻi ange ʻa e puputuʻú, pea naʻe fakaʻapaʻapaʻi lahi ange au ʻe heʻeku faiakó mo e kaungāakó ʻi he fealēleaʻaki fakakalasí.

Mōnika, Masasūseti, USA

Hoko ko ha Maama

ʻI hoku taʻu 15, naʻá ku fakakaukau ai ke u kamata kumi ha siasi ke u ʻalu ki ai. Hili ha ngaahi ʻaho siʻi mei ai, naʻá ku kaungāmeʻa mo ha kiʻi taʻahine ʻi he akó ʻa ia naʻe hangē naʻe ʻi ai ha maama ʻiate iá. Hili ha uike ʻe ua mei ai, naʻá ne fakaafeʻi au ki honau ʻapí. ʻI heʻeku aʻu atu ki aí, naʻe fakaafeʻi au ʻe hono fāmilí ke u kau ki heʻenau efiafi fakafāmili ʻi ʻapí. Naʻe fakaʻau ke u saiʻia ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo meimei ke fakatefito pē ʻi he fiefia naʻe maʻu ʻe he fāmili ʻo hoku kaungāmeʻá ʻi he efiafi ko iá.

Makeili, Kololato, USA

Vahevahe ʻi he ʻOfa

Naʻe poupouʻi au ʻe he taʻahine ʻoku ou tuofefine ʻakí ke u fakataha mo e ongo faifekaú, ʻoku ou tui pē koeʻuhí naʻá ne fakaʻamu ke u tofanga ʻi he ngaahi tāpuaki naʻá ne fiefia ai ʻi he taimi ko iá. Naʻá ku ongoʻi naʻe ʻofeina au ʻe hoku tuofefiné mo hoku kaungāmeʻa ko ʻĪnoké, pea naʻá na fakaʻamua ha meʻa lelei maʻaku. Ne hoko ia ke u ongoʻi fiemālie ʻaupito ai ke u haʻu ki he lotú.

ʻĒliki, Kana