“Te u lava fēfē nai ʻo hoko ko ha faʻifaʻitakiʻanga ki he kau mēmipa ʻo e fāmilí ʻoku nau fāifeinga ke moʻui ʻaki e ngaahi akonaki ʻa Sīsū Kalaisí?” Ki Hono Fakamālohia ʻo e Toʻu Tupú, Siulai 2023.
Ngaahi Fehuʻí mo e Talí
“Te u lava fēfē nai ʻo hoko ko ha faʻifaʻitakiʻanga ki he kau mēmipa ʻo e fāmilí ʻoku nau fāifeinga ke moʻui ʻaki e ngaahi akonaki ʻa Sīsū Kalaisí?”
Fakaʻaliʻali, Ngāue Tokoni, pea Vahevahe
“Fakaʻaliʻali ki ho fāmilí ʻa e founga ʻokú ke ongoʻi fiefia ai ʻi hono moʻui ʻaki e ongoongoleleí. Te ke lava ʻo tokoniʻi kinautolu mo vahevahe hoʻo ngaahi aʻusiá mo kinautolu. Te ke lava foki ʻo fakaafeʻi e ongo faifekaú ke fakahoko ha efiafi [fakafāmili] ʻi homou ʻapí.”
Lūsiana M., 18, Menitosa, ʻĀsenitina
Feinga ke Mahino
“Kuo fai ʻe ha kau mēmipa ʻe niʻihi ʻo hoku fāmilí ha ngaahi meʻa ʻoku ʻikai ke fenāpasi mo e ngaahi tuʻunga moʻui ʻa e ʻOtuá. Feinga ke mahino kiate koe ʻa ʻenau fakaʻuhinga ki he meʻa ʻoku nau fakahokó. ʻOku ʻikai ʻuhinga ia kuo pau ke ke fai e meʻa ʻoku nau faí. Kae mahuʻinga angé, ʻofa ʻiate kinautolu ʻo tatau ai pē pe ko e hā e meʻa ʻoku nau faí pe lea ʻakí.”
Melotī E., 13, Tekisisi, USA
Muimui ki he Fakamoʻuí
“ʻOku ou feinga maʻu pē ke u hoko ko ha faʻifaʻitakiʻanga ki hoku fāmilí ʻaki ʻeku talanoa fekauʻaki mo e ngaahi akonaki ʻa e Siasí. ʻOku ou feinga maʻu pē ke hāsino ʻa Kalaisi ʻiate au. ʻOku ou ʻiloʻi kapau te u muimui ‘iate Ia, te u lava ʻo hoko ko ha faʻifaʻitakiʻanga lelei ki hoku fāmilí pea tokoni ke ʻomi e maama ʻo Kalaisí ki heʻenau moʻuí.”
ʻAtalia C., 19, Lio Kuleni to Sula, Palāsila
Tā ha Mūsika ʻOku Langaki Moʻuí
“ʻOku ou ʻātakaiʻi au ʻaki e mītia lelei ʻokú ne ʻomi e Laumālié ki hoku ʻapí. ʻOku tokoni hono tā ha himi ʻi he pianó ke u ongoʻi fiefia neongo ʻoku faingataʻaʻia e kau mēmipa hoku fāmilí. Hokohoko atu ke falala ki he Fakamoʻuí ke maʻu ha fiefia mo e nonga, ʻo aʻu ai pē ki he taimi ʻoku ʻikai ke ongoʻi pehē ai e niʻihi ʻoku mou feohí.”
Loleini B., taʻu 14, Melilani, USA
ʻOfa ʻIate Kinautolu
“He ʻikai te ke lava ʻo liliu e ngaahi fili ʻa e kau mēmipa ho fāmilí ʻo tatau pē mo e ʻikai ke nau lava ʻo liliu hoʻo ngaahi filí, ka te ke lava maʻu pē ʻo ʻofa ʻiate kinautolu. Naʻe fakahaaʻi ʻe Kalaisi ha ʻofa lahi ki he kakai naʻe ʻikai ke nau loto tatau pe saiʻia ʻiate Iá. Ko e tokotaha kotoa pē ko e fānau ia ʻa e ʻOtuá, pea ʻi hoʻo ʻofá, ʻe lava ai ke nau ongoʻi e ʻofa ʻa e Tamai Hēvaní.”
Polokilini D., 17, ʻIutā, USA
Fekumi ke Mamata ʻo hangē ko e ʻAfio (Mamata) ʻa Kalaisí
“ʻE lava ke tokoni ʻa e maʻu e ʻofa faka-Kalaisí mo e feinga ke sio ʻo fakalaka atu ʻi honau ngaahi vaivaí ke mahino kiate kitautolu e meʻa ʻoku nau fouá. ʻOku mahino lelei kia Sīsū Kalaisi ʻa kitautolu kotoa. Pea te tau lava ʻo kamata ke fakakaukau ki he niʻihi kehé mo tokoniʻi kinautolu ʻo hangē ko ia ʻokú Ne fakahokó ʻo kapau te tau kole kiate Ia ke Ne tataki kitautolu.”
Sione K., 17, ʻInitiana, USA
ʻOua ʻe Loto-Fakamaau
“ʻOku ou ako ke ʻofa ʻiate kinautolu, angaʻofa kiate kinautolu, pea ʻoua naʻa fakamāuʻi kinautolu.”
Lōkani C., 18, ʻIutā, USA