“Pikitai ki he Moʻoní,” Ki Hono Fakamālohia ʻo e Toʻu Tupú, Siulai 2023.
Pikitai ki he Moʻoní
Tā fakatātaaʻi ʻe Ben Simonsen
Ko e fuofua taimi naʻá ku sio ai ki ha falelotu ʻo e Siasí, naʻá ku fakakaukau ko ha falemahaki ia. Naʻe maʻa mo lōngonoa ʻaupito ia. Naʻá ku saiʻia ʻi he ongoongolelei ʻo Sīsū Kalaisí ʻi he momeniti pē naʻá ku maʻulotu aí.
Naʻe kamata akoʻi au ʻe he ongo sisitaá, peá u fakakaukau ai pē ke papitaiso au. Ko e ʻaho lelei tahá ia!
Naʻe fakafeʻiloaki au ki he ongoongoleleí ʻe hoku kaungāʻapí, ʻa ia ko ha taha ne ʻosi ngāue fakafaifekau. Naʻá ne tā mai ʻi ha pongipongi Sāpate ʻe taha ʻo ne kole mai ke ma ō mo hono fāmilí ki he lotú. ʻI he kamataʻangá, naʻe talamai ʻe heʻeku faʻeé he ʻikai ke u lava ʻo ʻalu koeʻuhí naʻe ʻikai haʻama paʻanga totongi pasi. ʻI heʻeku talaange ki hoku kaungāʻapí ʻa e meʻá ni, naʻá ne talamai te ne ʻave au, pea naʻe fakangofua au ʻe heʻeku faʻeé ke u ʻalu.
Naʻa mo e Taimi ʻOku Tau Tuenoa Aí
Hili hoku papitaisó, naʻe lahi e ngaahi taimi naʻá ku faingataʻaʻia ai ʻi hoku fāmilí. Ko e taimi ʻe niʻihi naʻa nau fiemaʻu ke u nofo pē ʻi ʻapi ʻi he Sāpaté, ka naʻá ku fili pē ke u ʻalu ki he lotú. Ko e taimi lahi naʻe faingataʻa ʻa e feinga ke nofo maʻu ʻi he hala ʻo e fuakavá.
Ko ha niʻihi ʻo hoku fāmilí ne nau fakafepakiʻi ʻa e Siasí pea naʻa nau talamai naʻe hala ʻeku fili ke u kau ki aí. ʻI he taimi ʻoku nau talamai ai ʻení, ʻoku ongo mai e ngaahi lea ko ʻení ki heʻeku fakakaukaú: “ʻOku ou ʻiloʻi ʻoku moʻui ʻa e Tamai Hēvaní mo Sīsū Kalaisi. ʻOku ou ʻiloʻi ʻoku moʻoni ʻa e Siasí.” Kuo tokoniʻi au ʻe he ngaahi fakakaukau ko ʻení ke u pikitai ki he moʻoní.
ʻE Lava Ke Tākiekina ʻe Heʻetau Ngaahi Tōʻongá ʻa e Moʻui ʻa e Niʻihi Kehé
ʻI he taimi naʻá ku fāifeinga ai ke ʻiloʻi e founga ʻo e totongi vahehongofulú, naʻe fakaʻaliʻali mai ʻe hoku kaungāʻapí ʻa e founga ke fai ai iá. ʻI he taimi ní ko e taimi pē ʻoku ʻomi ai ʻe heʻeku faʻeé haʻaku paʻanga, ʻoku ou totongi maʻu pē ʻeku vahehongofulú. Kuó u mātā mo hoku fāmilí ha ngaahi tāpuaki mei ai. Kuo aʻu ki hono foaki mai ʻe hoku fāmilí ʻenau paʻangá ke totongi ko e vahehongofulu! Kuo hoko ia ko ha meʻa fakaʻohovale.
Ko e taimi lahi ʻoku ou ʻalu toko taha pē ki he lotú, ka ko e taimi ʻe niʻihi ʻoku ou ʻalu fakataha mo ʻeku faʻeé. Naʻe fakakaukau ʻeku faʻeé ke ako lahi ange ki he ongoongoleleí pea ʻokú ne pehē ʻoku fakafiefia ʻaupito ia, neongo ʻoku teʻeki ai ke papitaiso ia.
ʻOku Liliu ʻe he Lotú mo e Tuí ʻa e Lotó
Kuó u mātā ki he ivi tākiekina ʻo e ʻEikí ʻi he moʻui ʻa hoku fāmilí ʻi heʻeku lotua kinautolu mo kolea e niʻihi kehé ke nau lotua kinautolu ʻi he temipalé. Kuo poupouʻi lahi ange au ʻe he kau mēmipa ʻo hoku fāmilí, pea ʻoku nau fakalotolahiʻi eni au ke u ʻalu ki he lotú pea ke u fai maʻu pē ʻa e meʻa ʻoku ou ongoʻi ʻoku totonú.
Ne toki mālōlō atu ʻeku kuitangatá, pea naʻá ku maʻu hono hingoá lolotonga ʻeku fai e ngāue hisitōlia fakafāmilí. Naʻá ku kole ki heʻeku tamaí pe ʻe lava ke u fakahoko hono ngaahi ouaú ʻi he temipalé. Naʻá ne pehē mai, “Fai pē ia kapau ko e meʻa totonú ia.”
Nēkeneka mo e Fiefia Moʻoní
Kuó u maʻu e nēkeneká, fiefiá, nongá, mo e fiemālié ʻi hono lau e folofolá mo e ʻilo fekauʻaki mo e Fakalelei ʻa Sīsū Kalaisí.
ʻOku ou ʻiloʻi ʻoku fakafou ʻi he feilaulau fakalelei ʻa e Fakamoʻuí, ʻa e lava ke u toe fakataha mo ʻeku Tamai Hēvaní pea ʻe lava ke u fakataha mo hoku fāmilí ʻo taʻengata kapau te mau sila ʻi he temipalé ʻi ha ʻaho.
Ko e tokotaha naʻá ne faʻú mei Vanuatu pea ʻoku nofo ʻi Fisi.