“Fēfē nai kapau ʻe talamai ʻe ha taha ʻoku fakahalaki ʻe he saienisí ha meʻa ʻoku tau tui ki ai?,” Ki Hono Fakamālohia ʻo e Toʻu Tupú, Siulai 2023.
ʻAi Hangatonu
Fēfē nai kapau ʻe talamai ʻe ha taha ʻoku fakahalaki ʻe he saienisí ha meʻa ʻoku tau tui ki ai?
Kuo akonaki mai ʻa Palesiteni Lāsolo M. Nalesoni ʻo pehē: “Ko e ʻOtuá ʻa e tupuʻanga ʻo e moʻoni kotoa pē. ʻOku tali ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ni ʻa e moʻoni kotoa pē ʻoku fakahā mai ʻe he ʻOtuá ki Heʻene fānaú, ʻo tatau ai pē pe naʻe ʻilo ia ʻi ha loki saienisi pe maʻu mei ha fakahā fakahangatonu meiate Ia” (“Ko e Hā e Meʻa ʻOku Moʻoní?” Konifelenisi lahi ʻo ʻOkatopa 2022 [Liahona, Nōvema 2022, 30]).
Kapau ʻoku pehē ʻe he kakaí ʻoku fehangahangai ʻa e saienisí mo ha moʻoni ʻo e ongoongoleleí, ko ha ngaahi meʻa ʻeni ke fakakaukau ki ai:
ʻOku totonu ke ke maʻu ʻa e ngaahi moʻoniʻi meʻá. Feinga ke ʻiloʻi pe ko e hā e meʻa ʻoku fakamatalaʻi ʻe he saienisí (mo e meʻa ʻoku ʻikai ke ne fakamatalaʻí), kae pehē ki he meʻa ʻoku fakamatalaʻi ʻe he ongoongolelei ʻo Sīsū Kalaisi kuo fakafoki maí (mo e meʻa ʻoku ʻikai ke ne fakamatalaʻí). Fakamuʻomuʻa hono ako e folofolá mo e lea ʻa e kau palōfitá.
Ko e ʻilo fakalaumālié ʻoku moʻoni ia. Ko e saienisí ko ha founga ia ki hono ako e ngaahi moʻoni fekauʻaki mo e māmani fakamatelié. Ka ʻoku ʻi ai ha ngaahi moʻoni ʻoku toki foaki mai ʻe he ʻOtuá ʻo fakafou pē ʻi he fakahā. Te ke lava ʻo tui ko e Laumālie Māʻoniʻoní “ʻokú ne folofola ki he ngaahi meʻa ʻo hangē ko honau angamoʻoní” (Sēkope 4:13).
Ko e tuí ʻoku fiemaʻu ki ai ʻa e faʻa kātakí. Ko e ʻilo fakasaienisí ʻoku toe vakaiʻi ia ʻi he hili ha ngaahi taimi. Ko e taimi ʻe niʻihi ʻoku fiemaʻu pē ke tau tatali ki he saienisí ke tulituli hake ki he moʻoni taʻengata kuo fakahā maí. Te tau lava ʻo tokanga taha ki he ngaahi moʻoni fakalaumālie lahi angé kae ʻoua kuo tau ʻilo e ngaahi fakaikiiki ʻo e ongoongoleleí.