“Ngaahi Founga ʻe 4 ke Poupouʻi e Ngaahi Kaungāmeʻa ʻi he Ngaahi Fāmili ʻoku Mēmipa Pē Hanau Niʻihí,” Ki Hono Fakamālohia ʻo e Toʻu Tupú, Siulai 2023.
Tokoni ʻo e Moʻuí
Ngaahi Founga ʻe 4 ke Poupouʻi e Ngaahi Kaungāmeʻa ʻi he Ngaahi Fāmili ʻoku Mēmipa Pē Hanau Niʻihí
Te ke lava ʻo tokoni ki he tokotaha kotoa pē ke nau ongoʻi ʻoku ʻofeina mo tokangaekina kinautolu ʻi he lotú neongo pe ko e hā honau ngaahi tūkungá.
ʻOku kehekehe pē e ngaahi faʻunga ʻo e fāmilí. Hangē ko ʻení, ko e kakai ʻokú ke sio ki ai ʻi he lotú, mahalo ʻoku ʻi ai ha kau mēmipa ʻi honau fāmilí ʻoku ʻikai ke nau kau ki he Siasí pe kuo nau fili ke mavahe mei he Siasí. ʻE lava ke faingataʻa ki he kakaí ke nau kau mai ki he lotú, pe ongoʻi ʻoku nau kau ki ai, ʻo ka ʻikai ha poupou mei he fāmilí.
Ko e taimi ia te ke hū aí!
Te ke lava ʻo fakahoko ha fatongia mahuʻinga ʻi hono tāpuakiʻi e faʻahinga kotoa pē ʻo e ngaahi fāmilí, ʻi he tūkunga kotoa pē. Ko ha ngaahi founga ʻeni te ke lava ai ʻo tokoni:
ʻŪ tā fakatātā ʻa Oksana Grivina
Lotua ha Ngaahi Founga ke Tokoni Ai
Lotua ke ke ʻiloʻi e founga te ke lava ai ʻo tokoniʻi ʻa kinautolu ʻoku omi ki he lotú pea mo honau ngaahi fāmilí foki. Mateuteu ke ngāueʻi e ngaahi tali te ke maʻú.
Feinga ke Maheni mo e Fāmilí
Kapau ʻe lava, feinga ke ke maheni mo e kau mēmipa kotoa ʻo e fāmili ʻo ho kaungāmeʻá. ʻE tokoni ʻeni ke ke ʻiloʻi e poupou ʻoku maʻu ʻe hoʻo kaungāmeʻá ʻi ʻapí pea mo e meʻa ʻoku faingataʻa ai kiate kinautolu ke nau kau mai ki he lotú. ʻI he fakaʻau ke ke maheni lelei ange mo e fāmilí, ʻe lava ke ueʻi koe ke ke tokoni ʻi ha ngaahi founga pau ʻoku fiemaʻú.
Fakapapauʻi ke Moʻui ʻAki Maʻu Pē ʻa e Ongoongoleleí
ʻOku ʻi ai ha kakai tokolahi ʻoku nau saiʻia ʻi he Siasí ʻi he taimi ʻoku nau sio ai ki he kāingalotú ʻoku nau moʻui ʻaki e meʻa ʻoku nau tui ki aí. ʻOku ʻikai ke ke teitei ʻilo pe ko hai ʻokú ne siofi koé. Te ke lava ʻo fakahoko ha lelei lahi ʻi hoʻo moʻui ʻaki pē ʻa e ongoongoleleí. ʻI hoʻo fai iá ʻe tāpuekina ai hoʻo moʻuí pea ʻe lava ke tokoni ia ke ʻomi e maama ʻo e ongoongoleleí ki he niʻihi ʻoku mou feohí.
Angaʻofa Pē
ʻOua naʻá ke fakasiʻia e founga ʻe lava ai ʻe he angaʻofá ʻo fai ha fuʻu liliu lahí. Hangē ko ʻení:
Kapau te ke sio ki ha taha ʻoku tangutu toko taha ʻi he lotú, tangutu ʻi hono tafaʻakí pe kole ange ke mou tangutu fakataha mo ho fāmilí.
Kapau ʻoku ʻikai ke ne lava ʻo ʻalu ki he lotú pe ngaahi ʻekitivitī kehé ʻiate ia pē, talaange te ke ʻave ia pe fakaafeʻi ke haʻu ke mou ō mo ho fāmilí.
ʻOku mahuʻinga foki ke fakakau mo ho ngaahi kaungāmeʻá ʻi he ngaahi ʻekitivitií. Mahalo ʻe ngali meʻanoa pē ʻa e fakaafe ki ha ʻekitivitī fakauooti pe fakafāmili, ka ʻe ala tokoni ia ki ho kaungāmeʻá ke ne fili ke nofo ofi ki he Fakamoʻuí mo Hono Siasí kapau ʻokú ne ongoʻi ʻoku fakakau ia.