“Padayon sa Pagkakabig,” Alang sa Kalig-on sa mga Kabatan-onan, Ago. 2023.
Padayon sa Pagkakabig
Ang pagpaninguha alang sa padayon nga pagkakabig dili komplikado. Makahimo ka niini.
Ang pagkakabig dili usa ka ganti nga gihatag kanimo sa bunyag ug nga imong gamiton matag Dominggo sa simbahan. Ang pagtuo kinahanglan nga tun-an. Ang imong pagkakabig kinahanglan nga magpadayon. Dili ka makasalig sa dakong hitabo nga maoy makaingon ug paabuton kini nga mas molawom sama sa walay pagpaningkamot nga buhat nga napakyas.
Imbes, mohimo kita og tinuyo nga mga lakang aron sa paghimo og mas maayo nga mortal ug mahangturon nga kinabuhi. Ang padayon nga pagkakabig moabot sa ginagmay nga mga butang nga imong gihimo matag adlaw, sama kon ikaw mangayo og pasaylo sa pagsulti og dili maayo nga pulong (o mopahunong sa imong kaugalingon sa pagsulti niini) o kon mohinumdom ka nga mobasa sa mga kasulatan. Kini ang pabalikbalik nga desiyon sa pagpabilin nga matuohon. Kanunay kini nga maninguha sa pagbuhat ug pagkahimong labing maayo. Mao kana kon unsaon nimo pagkahimo nga labing maayo ug paglig-on sa imong pagtuo sa Langitnong Amahan ug ni Jesukristo.
Si Elder David A. Bednar sa Korum sa Napulog Duha ka Apostoles miingon: “Ang ebanghelyo sa Manluluwas … mahitungod kini sa kamahinungdanon sa pagbuhat ug pagkahimong maayo. Ug ang Pag-ula [ni Jesukristo] naghatag og tabang kanato sa pagbuntog ug paglikay sa dautan ug sa pagbuhat ug pagkahimong maayo. Ang panabang gikan sa Manluluwas maanaa alang sa tibuok nga panaw sa pagka-mortal—gikan sa pagkadautan ngadto sa pagkamaayo ngadto sa labing maayo ug sa pag-usab sa atong pinakakinaiyahan.”1
Ania ang pipila ka ideya nga lagmit nga makatabang.
Irekord ang Inyong mga Kalamposan
Kon mobati ka nga ang imong pag-uswag nahunong, sulayi pagtan-aw ang maayo nga mga butang nga imong gibuhat matag adlaw. Paggahin ug panahon sa pagsulat sa tanan nimong nahimo nga maayo karong adlawa.
Pagtambong sa simbahan, pagtuon sa mga kasulatan, paghupot sa mga pakigsaad, pagkahimong mabination, pag-ampo—kining ginagmay nga mga kalamposan mga panahon sa kamaayo nga nahitabo diha sa imong inadlaw nga kinabuhi. Kini mao ang pag-uswag; kini mao ikaw nga nagpadulong paingon sa imong mahangturon nga destinasyon!
Maningkamot alang sa Dugang nga Kahayag
Ang Dios moganti sa imong ginagmay nga buhat sa hugot nga pagtuo sa matag higayon nga ikaw mopili og usa ka butang nga maayo. Siya naghimo sa imong mga paningkamot nga mapuslanon pinaagi sa paghatag kanimo og kalig-on, kaisog, ug kahibalo sa pagpadayon paingon sa mahangturon nga kinabuhi.
Si Elder Neil L. Andersen sa Korum sa Napulog Duha ka Apostoles miingon: “Sa tibuok nga mga katuigan kita balik-balik nga naghimo niining mahinungdanon nga espirituhanong mga lakang. Magsugod kita sa pagkakita nga ‘siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtod sa hingpit nga adlaw’ [Doktrina ug mga Pakigsaad 50:24]. Ang atong mga pangutana ug mga pagduhaduha masulbad o mahimong dili na angayang kabalak-an alang kanato. Ang atong hugot nga pagtuo mahimong simple ug putli.”2
Sa imong pagkahimong mas nakabig sa ebanghelyo, nahimo kang mas maayo kay sa imong naandan. Nakat-on ka mahitungod kon unsay gipasabot nga mahimong usa ka maayong tawo ug unsay mahimo pa nimo. Ang Espiritu Santo nagtudlo kanimo samtang nagsiksik ka nga molambo. Sa imong pagdawat og dugang nga kahayag, mahimo kang mas nahisama sa Dios ug ni Jesukristo, kinsa mapailubon, maalagaron, mahigugmaon, maalamon, mabination, ug mapasayloon. Sa laktod, nahimo kang mas duol ngadto sa pagkahingpit (tan-awa sa 3 Nephi 12:48).
Paghimo og Maayong mga Batasan
Paghunahuna mahitungod kon unsaon nimo paghimo og maayong batasan. Magbuhat og usa ka butang nga balik-balik hangtod maanad. Ang samang butang mahimong mahitabo sa maayong mga hunahuna. Kon tuyoon nimo og suway sa paghunahuna nga mahimong mas mabination, mahigugma og mas maayo, moalagad sa uban, o mahimong mas mapasalamaton, ang imong utok makaangkon kanunay niadto nga mga hunahuna. Dayon kon buhaton nimo kadto nga mga hunahuna, makahimo ka og maayo nga batasan.
Aron mahimong mas may katuyoan mahitungod sa pagkahimong mas maayo, mahimo kang mokonsiderar sa paghimo og mga tumong sa pagpunting sa pagpalambo og piho nga Kristohanong mga hiyas.
Pananglitan:
-
Modayeg ko og tulo ka tawo matag adlaw aron makakat-on ko sa pagtan-aw og mas daghang kaayo sa mga tawo.
-
Dili ko maminaw sa dili maayo nga mga musika aron ang Espiritu kanunay nga maanaa kanako.
-
Mag-ampo ko kon masuko ko aron mas mabination ko.
Ang mga batasan sama niini makahimo niini nga mas simple aron makapadayon paingon sa pagkahingpit ug magpuyo nga mas malipayon karon. Mas sayon kini nga mahimong maayo kon ikaw adunay batasan sa “pagbuhat og maayo sa kanunay” (tan-awa sa Alma 63:2).
Hinumdomi ang Maayong Balita
Samtang maninguha ka sa pagkab-ot sa inadlaw nga tumong sa pagpuyo nga mas malipayon, mas Kristohanon nga kinabuhi karon, ikaw usab molambo paingon sa pagkahingpit. Dili ba kana talagsaon? Nagtubo ka ngadto sa tawo nga ikaw mamahimo gayod. Ug sa samang higayon, ikaw molambo sa imong mortal nga kinabuhi. Niining tanan, magmalipayon ka karon ug sa kahangtoran.
Ingon niana ang plano sa Dios. Ang pagpili nga mahimong mas maayong “ikaw” pinaagi sa pagsunod ni Jesukristo makatabang kanimo ug niadtong anaa sa imong palibot. Ug modala kini kanimo ngadto sa Iyang mahigugmaong mga bukton alang sa kahangtoran.
Ang maayong balita sa ebanghelyo ni Jesukristo naghatag kanimo sa dili katuohan nga kahigayonan sa pagsabot sa katuyoan sa kinabuhi ug pagtuman niini. Apan naa ra kana nimo. Mopili ka kon kuhaon ba o dili kana nga kahigayonan. Tungod sa imong kabubut-on, ang imong “desisyon motino sa [imong] padulngan.”3 Ang imong mga pagpili may kahulogan tungod kay magtukod kini kon si kinsa ka karon ngadto sa kon si kinsa ka nga mamahimo. Ug kon kinsa nga ikaw mamahimo mao ang imong padulngan.
Ang Dios nagsalig kanimo. Gusto Niya nga mobalik ka ngadto Kaniya ug mahimong sama Kaniya, ug Siya mimugna sa hingpit nga plano aron pagtabang kanimo sa pagbuhat niini. Ang tanan nimong buhaton—unsay Iyang nahibaloan nga mahimo nimo—mao ang pagsulay sa imong labing maayo sa pagsunod niini.