Ako Makahimo sa Tanan nga Butang pinaagi kang Kristo

Ang kabatan-onan nagpakigbahin kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).

Nagtabang Siya Nako sa Paghimo sa Lisod nga mga Butang

Ako natawo uban sa sakit nga gitawag og pagka-yellow sa panit ug sa mata [jaundice]. Adunay dili maayo nga nahitabo atol sa pagpaayo niini nga sakit, mao nga nawala og gamay akong pandungog ug adunay murag Cerebral Palsy nga nakapalisod sa akong paglihok-lihok ug pagbalanse.

Lisod ang pag-eskwela tungod sa ubang mga bata. Manuot sila, mangigo, mosulti og dili maayo, mosulti og mga bakak, ug manutok. Dili ko makabalos, mao nga ang ako rang mahimo mao ang pag-ampo. Usahay ang akong mga pag-ampo gitubag dayon, ug sa ubang panahon mokabat og dugay nga panahon. Apan misalig ako sa Langitnong Amahan, mao nga sige ako og ampo.

Niadtong 15 pa ko, ako ang presidente sa klase sa Young Women ug adviser sa family history sa ward. Nahadlok ko nga dili ako makahimo sa tanang butang. Wala kaayo koy nahibaloan mahitungod sa family history. Nag-ampo ako alang sa panabang, nakadawat og instruksiyon gikan sa Ginoo ug sa dinasig nga mga lider, ug mitrabaho. Mapasalamaton kaayo ko alang sa pagsalig sa Langitnong Amahan nga gibutang diri kanako. Matag ngalan nga gipadala ngadto sa templo nakapalipay kaayo nako. Ang Langitnong Amahan ug si Jesukristo nakatabang ug nakahatag og gahom kanako.

Nasayod ako nga ang Langitnong Amahan ug ang Manluluwas wala nagbutang og pagpugong kanato tungod sa pisikal nga mga kondisyon. Mahigugmaon sila ug mapailubon, andam motudlo, molig-on, ug motabang kanato.

Ang akong pisikal nga mga kondisyon wala magpugong kanako, tungod kay kon adunay mga babag nga mopakita, ang Dios anaa nga mohatag og suporta. Kinahanglan lang akong modangop ngadto Kaniya ug mohangyo alang sa panabang.

Jordana S., Goiás, Brazil

Sa pagsulat niini nga artikulo, si Jordana nakaserbisyo og 18 ka bulan nga service mission alang sa Seminaries ug Institute sa Goiania.