Ako Makahimo sa Tanan nga Butang pinaagi kang Kristo

Ang kabatan-onan nagpakigbahin kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).

Ako Nasayod nga Makita Nako ang Akong Mama Pag-usab

Ganahan ko sa mga bersikulo diha sa Basahon ni Mormon nga naghisgot kon giunsa sa mga inahan sa mga batan-ong manggugubat pagpadako kanila diha sa Ginoo (tan-awa sa Alma 56:47–48; 57:21). Ikonektar nako kadto nga mga bersikulo ngadto sa akong inahan. Sa akong hunahuna siya mao ang labing talagsaon nga tawo. Gusto ko nga mahisama niya.

Ang akong inahan nakigbisog sa kanser sulod sa tulo ka tuig. Hapit na ko mag-12 anyos sa dihang namatay siya. Human sa iyang pagkamatay, mibati ko nga morag nawala. Ang labing gikamingawan nako niya mao ang iyang pagkaanaa alang namo.

Sa akong ika-12 nga adlawng natawhan, 13 ka adlaw human sa pagkamatay sa akong inahan, ang akong higala nga si Joseph miadto sa party sa akong adlawng natawhan. Gihatagan ko niya og regalo, migakos nako, ug mihunghong, “Naguol ko mahitungod sa imong mama.” Dako kaayo kana og kahulogan kanako. Gipakita niya nga ako gihigugma ug ang mga tawo nagpakabana nako.

Sa pag-atubang sa among sitwasyon nga namatyan, ang akong papa mogahin kanunay og panahon sa paghimo og mga butang nga manag-uban ang pamilya. Ang pagserbisyo sa uban nakatabang usab kaayo nako. Bisan kon naguol ko, ang ubang tawo may mga problema usab. Mitabang ko nila, ug kana nakapaarang-arang sa akong gibati.

Adunay mga higayon sa gabii nga mohilak ko. Nianang mga higayona, mobati ko og kahupayan kon modangop ko ngadto sa Ginoo ug mag-ampo nga magmalipayon pag-usab. Nakahinumdom ko nga naghunahuna nga ako nasayod nga makita ra nako ang akong mama pag-usab.

Naguol gihapon ko nga ang akong mama wala na dinhi. Apan ang iyang pagkamatay dili ingon nga kataposan sama sa akong gihunahuna, tungod kay ako nasayod nga makita ra nako siya pag-usab. Naghinam-hinam ko niini. Usab, ang akong ina-ina buotan kaayo, ug iyang gihulipan ang tahas isip usa ka inahan.

Ang Manluluwas namatay alang kanato ug midala sa Iyang Kaugalingon sa tanan natong mga sala. Ako nasayod nga Siya nahibalo sa atong tagsa-tagsa nga mga kabalaka ug mga problema. Tungod sa Iyang sakripisyo, kita mabanhaw ug makabaton og mahangtorong pamilya. Kana nga kahibalo nakatabang gayod nako.

Ethan J., Virginia, USA