“Hugot nga Pagtuo, mga Buhat, Grasya … ug Pagbisikleta?!,” Alang sa Kalig-on sa mga Kabatan-onan, Ago. 2023.
Dali, Sunod Kanako
Mga Buhat
Hugot nga Pagtuo, mga Buhat, Grasya … Pagbisikleta?!
Pagkat-on mahitungod kon unsay makatabang kanimo sa pagpadayon sa unahan.
Gitan-aw nako sa samin ang nakiskis nga panit ubos sa akong ilong ug sa akong suwang. Sa hinay, akong gitrapohan ang pipila ka pino nga balas. Oo, mura gyod og bungot. Murag bungot sa kanding!
Sayo niana, nakat-on ko og mahinungdanon kaayo nga leksiyon mahitungod sa pagsakay og bisikleta: ang pagpabiling matarong lisod gyod gawas kon magdagan ka na! Imbis nga motindak, nagpanuko ko og dugay, gikalitan og brake, ug natulimbang.
Unsay kalabotan niini sa ebanghelyo? Aniay usa ka koneksiyon nga angay hunahunaon. Susama kon unsaon nato nga magkinahanglan og balanse ug kakusog aron magpabiling tarong diha sa bisikleta, ang atong mahangturon nga paglambo nag-agad sa hugot nga pagtuo ug maayong mga binuhatan. Ug ang tibuok nga pagsakay gihimong posible pinaagi sa grasya ni Jesukristo.
Hunahunaa og ingon ani: Si Jesukristo mihatag kanimo sa bisikleta. Siya ang nagtabang nimo unsaon sa pagmaneho. Siya nagsulti kanimo unsay imong buhaton, naghatag kanimo sa mga tip, ug gani naggunit sa lingkoranan samtang mosakay ka. Apan ikaw ang mopili nga moabante na.
Si Elder Dieter F. Uchtdorf bag-ohay lang mipakigbahin og susama nga mga hunahuna kabahin sa mga bisikleta aron pag-awhag kanato sa pagpadayon sa unahan uban sa hugot nga pagtuo.
“Ipunting ang inyong panan-aw diha sa dalan sa inyong atubangan. Tutoki ang inyong destinasyon,” miingon siya. “Ug padayon sa pagsikad. Ang pagpabilin nga balanse mao ang pagpadayon sa unahan.”1
Sa inyong pagbasa sa Bag-ong Tugon karon, makabantay mo nga ang sayo nga Apostoles mitudlo og daghan mahitungod sa pagsakay og bisikleta. Komedya lang! Apan mitudlo sila bahin sa hugot nga pagtuo, grasya, ug mga buhat sa makadaghan.
Sama pananglitan, si Pablo mitudlo nga “pinaagi sa grasya sa Ginoong Jesukristo maluwas kita” (Mga Buhat 15:11).
Ug tan-awa asa ang iyang pagtulon-an mahitungod sa grasya makita—diha sa basahon sa Mga Buhat, diin ang mga aksyon sa mga disipulo narekord! Kadaghanan sa Bag-ong Tugon naghulagway giunsa sa matinud-anong mga lalaki ug mga babaye pagbiyahe ug pagtudlo bahin kang Jesukristo. Kini nagrepresentar sa kombinasyon sa pag-angkon og hugot nga pagtuo, pagtrabaho og maayo, ug pagdawat sa makadasig nga tabang sa Manluluwas.
Unsa ang uban pang mga kasulatan ang inyong makaplagan nga naghisgot mahitungod sa hugot nga pagtuo, mga buhat, ug grasya? Sa unsang paagi nga inyong nakita kadtong tulo nga miepekto sa inyong kaugalingong kinabuhi? Aniay pipila ka mga bersikulo sa inyong pagsugod: Santiago 2:14–17; Taga-Efeso 2:8–10; ug Moroni 10:32–33.
Karon, ang pag-agid-agid [analogy] sa bisikleta dili hingpit, mao nga ayaw kaugtas kaayo mahitungod sa pagkaguol unsay girepresentar sa tanan. Ato lang kining gamiton isip usa ka butang sa pagtabang kanato sa paghinumdom nga dili kita makaluwas sa atong kaugalingon, ug ang Manluluwas dili mopugos kanato nga luwason. Kini mao kon kita magtrabaho og dungan uban Kaniya, maninguha sa pagsunod sa Iyang mga pagtulon-an ug magpakita og gugma alang sa uban, nga ang magic mahitabo. Si Satanas gusto nga moundang kita, molingkod, ug malunod ngadto sa sala ug sa pagkawalay paglaom. Apan ang Langitnong Amahan ug si Jesukristo nahigugma kanato ug namakpak kanato sa matag lakang—o tindak—diha sa agianan!
Mao nga lingkod na niana nga lingkoranan, abante na, sugdi na ang pagtindak, ug paglingaw sa nindot nga hangin nga mohapak sa imong nawong. Ang pag-abante nindot gayod nga bation, dili ba?!
Beside Still Waters [Tapad sa Tin-aw nga Katubigan], ni Simon Dewey